ಪ್ರಸಕ್ತ ಹಬ್ಬದ ಋತುವಿನಲ್ಲಿ ಸ್ವದೇಶಿ ಉತ್ಪನ್ನಗಳು ಮಾರುಕಟ್ಟೆಗೆ ಬಂದಿರುವ ಪ್ರಮಾಣ ಮತ್ತು ಜನರು ಅವುಗಳನ್ನು ಖರೀದಿಸುತ್ತಿರುವ ಪ್ರಮಾಣ ಗಮನಾರ್ಹವಾಗಿದೆ. ಈ ಸಲದ ಹಬ್ಬದ ಮಾರಾಟ 5 ಲಕ್ಷ ಕೋಟಿ ರೂ. ಮೀರಬಹುದು. ಇದರಲ್ಲಿ ಮಣ್ಣಿನ ದೀಪ, ಕೈಗಾರಿಕಾ ಉತ್ಪನ್ನ, ಮೂರ್ತಿಗಳು, ಬಟ್ಟೆಬರೆ, ಎಲೆಕ್ಟ್ರಾನಿಕ್ಸ್, ಆಟಿಗೆ ಸೇರಿದಂತೆ ಸ್ವದೇಶಿ ಉತ್ಪನ್ನಗಳೇ ಪ್ರಮುಖ ಪಾತ್ರ ವಹಿಸಿವೆ. ಉದಾಹರಣೆಗೆ, ಉತ್ತರಾಖಂಡ್ನಲ್ಲಿ ಮಣ್ಣಿನ ಸಾಮಗ್ರಿಗಳ ಮಾರಾಟ ಹಿಂದಿನ ವರ್ಷಕ್ಕಿಂತ ಶೇ. 25ರಷ್ಟು ಹೆಚ್ಚಾಗಿದೆ. ಚೀನಾದಿಂದ ವಸ್ತುಗಳ ಆಮದು ಬಹುತೇಕ ಶೂನ್ಯ ಮಟ್ಟಕ್ಕೆ ಇಳಿದಿದೆ. ಹಬ್ಬದ ಖರೀದಿ ಉತ್ಸಾಹದ ಜತೆ ಸರಕು ಮತ್ತು ಸೇವಾ ತೆರಿಗೆ (ಜಿಎಸ್ಟಿ) ದರಗಳ ಇಳಿಕೆಯ ಪ್ರಯೋಜನವೂ ಸೇರಿಕೊಂಡಿದೆ ಎಂದು ಕಾನ್ಪೆಡರೇಷನ್ ಆಫ್ ಆಲ್ ಇಂಡಿಯಾ ಟ್ರೇಡರ್ಸ್ (ಸಿಎಐಟಿ) ಹೇಳಿರುವುದು ಗಮನಾರ್ಹವಾಗಿದೆ. ಆಭರಣಗಳು, ಉಪಕರಣಗಳು ಮತ್ತು ಎಲೆಕ್ಟ್ರಾನಿಕ್ಸ್ನಲ್ಲಿ ಒಟ್ಟು 7.58 ಲಕ್ಷ ಕೋಟಿ ರೂ. ವ್ಯಾಪಾರ ನಡೆದಿದೆ ಎಂಬುದಾಗಿ ಭಾರತೀಯ ಉದ್ಯೋಗ ವ್ಯಾಪಾರ ಮಂಡಲದ ಅಂದಾಜಿಸಿದ್ದು, ಇದು ಸ್ವದೇಶಿ ಜಾಗೃತಿಯ ಫಲಿತಾಂಶವಲ್ಲದೆ ಬೇರೇನೂ ಅಲ್ಲ. ಸ್ವದೇಶಿ ವಸ್ತುಗಳ ಬಳಕೆಯಿಂದ ಆರ್ಥಿಕತೆಗೆ ಬಲ ಬರುವುದಷ್ಟೇ ಅಲ್ಲ, ನಮ್ಮ ಸಾಂಸ್ಕೃತಿಕ ಹೆಮ್ಮೆಯನ್ನೂ ಅದು ಜಾಗೃತಗೊಳಿಸುತ್ತದೆ. ಜಾಗತಿಕ ಅನಿಶ್ಚಿತತೆ, ಸುಂಕ ಸಮರ, ಪ್ರತಿಕೂಲ ವಾತಾವರಣದ ನಡುವೆಯೂ ಭಾರತವನ್ನು ಸ್ವಾವಲಂಬಿಯಾಗಿ ನಿಲ್ಲಿಸುತ್ತದೆ.
