ಅಬುಧಾಬಿ ದೇಗುಲ ಉದ್ಘಾಟನೆ; ಸ್ವಾಮಿನಾರಾಯಣ ಪಂಥದ ಗುರುಗಳ ಸಮ್ಮುಖದಲ್ಲಿ ಮೋದಿ ಚಾಲನೆ

ದುಬೈ: ಅಬುಧಾಬಿಯಲ್ಲಿನ ಮೊದಲ ಹಿಂದು ದೇಗುಲವನ್ನು ಪ್ರಧಾನಮಂತ್ರಿ ನರೇಂದ್ರ ಮೋದಿ ಬುಧವಾರ ಉದ್ಘಾಟಿಸಿದರು. ಆಕರ್ಷಕ ಸಾಂಪ್ರದಾಯಿಕ ಉಡುಗೆಯಲ್ಲಿ ಕಂಗೊಳಿಸಿದ ಪ್ರಧಾನಿ ಮೋದಿ, ಬೊಚಸನ್ವಾಸಿ ಶ್ರೀ ಅಕ್ಷರ ಪುರುಷೋತ್ತಮ ಸ್ವಾಮಿನಾರಾಯಣ ಸಂಸ್ಥಾ (ಬಿಎಪಿಎಸ್) ಮಂದಿರವನ್ನು ಸ್ವಾಮಿನಾರಾಯಣ ಪಂಥದ ಆಧ್ಯಾತ್ಮಿಕ ಗುರುಗಳ ಸಮ್ಮುಖದಲ್ಲಿ ಧಾರ್ವಿುಕ ಘೋಷಗಳೊಂದಿಗೆ ಉದ್ಘಾಟಿಸಿದರು.

ಜಗತ್ತಿನಾದ್ಯಂತ ಇರುವ ಸ್ವಾಮಿನಾರಾಯಣ ಪಂಥದ 1,200ಕ್ಕೂ ಅಧಿಕ ದೇವಸ್ಥಾನಗಳಲ್ಲಿ ಏಕಕಾಲಕ್ಕೆ ಜರುಗಿದ ಗ್ಲೋಬರ್ ಆರತಿಯಲ್ಲೂ ಪ್ರಧಾನಿ ಪಾಲ್ಗೊಂಡರು. ಅಲ್ಲದೆ ಗಂಗಾ ಮತ್ತು ಯಮುನಾ ನದಿ ತೀರ್ಥವನ್ನೂ ವರ್ಚುವಲ್ ಆಗಿ ಪ್ರಧಾನಿ ಈ ಮಂದಿರಕ್ಕೆ ಅರ್ಪಿಸಿದರು. ಇದು ಗಲ್ಪ್ ಪ್ರದೇಶದಲ್ಲಿನ ಅತಿದೊಡ್ಡ ದೇವಾಲಯವಾಗಿದೆ.

ಯಾರಿವರು ಮಹಾಂತ ಸ್ವಾಮಿ ಮಹಾರಾಜ್?: ಬಿಎಪಿಎಸ್​ನ ಆಧ್ಯಾತ್ಮಿಕ ಗುರು ಮಹಾಂತ ಸ್ವಾಮಿ ಮಹಾರಾಜ್ ಅವರನ್ನು ಸ್ವಾಮಿ ಕೇಶವಜೀವನ್​ದಾಸ್ ಜೀ ಎಂದೂ ಕರೆಯಲಾಗುತ್ತದೆ. ಇವರು ಈ ಸಂಸ್ಥೆಯ ಆರನೇ ಆಧ್ಯಾತ್ಮಿಕ ಗುರುವಾಗಿದ್ದಾರೆ. ಮಧ್ಯಪ್ರದೇಶದ ಜಬಲ್ಪುರದಲ್ಲಿ 1933ರ ಸೆ.13ರಂದು ಇವರು ಜನಿಸಿದರು. ಇವರ ಪಾಲಕರು ಮೂಲತಃ ಗುಜರಾತ್​ನವರಾಗಿದ್ದು, ಉದ್ಯಮದ ಕಾರಣಕ್ಕೆ ಜಬಲ್ಪುರದಲ್ಲಿ ನೆಲೆಸಿದ್ದರು. ಮಹಾಂತ ಸ್ವಾಮಿ 1951-52ರಲ್ಲಿ ಬಿಎಪಿಎಸ್​ನ ಯೋಗಿ ಮಹಾರಾಜ್ ಅವರ ಸಂಪರ್ಕಕ್ಕೆ ಬಂದಿದ್ದು, ಅವರೊಂದಿಗೆ ಸಂಚರಿಸಲಾರಂಭಿಸಿದರು. ಕುಟುಂಬ ದವರು ಇವರನ್ನು ವಿನು ಎಂದು ಕರೆಯುತ್ತಿದ್ದು, ಬಿಎಪಿಎಸ್​ನವರು ಕೇಶವ್ ಎಂದು ಮರುನಾಮಕರಣ ಮಾಡಿದ್ದರು. 1957ರಲ್ಲಿ ಇವರಿಗೆ ಯೋಗಿ ಮಹಾರಾಜ್ ದೀಕ್ಷೆ ನೀಡಿದರು.

ಯುಎಇನಲ್ಲಿ ಭಾರತ್ ಮಾರ್ಟ್: ಭಾರತವು ಯುಎಇನಲ್ಲಿ ತನ್ನದೇ ಆದ ಉಗ್ರಾಣ ಸೌಲಭ್ಯವಾದ ಭಾರತ್ ಮಾರ್ಟ್ ಸ್ಥಾಪಿಸಲಿದ್ದು, ಇಲ್ಲಿನ ಜೆಬೆಲ್ ಅಲಿ ಮುಕ್ತ ವ್ಯಾಪಾರ ವಲಯದಲ್ಲಿ ಇದಕ್ಕೆ ಪ್ರಧಾನಿ ಮೋದಿ ಮತ್ತು ಅವರ ಯುಎಇ ಸಹವರ್ತಿ ಶೇಖ್ ಮೊಹಮ್ಮದ್ ಬಿನ್ ರಶೀದ್ ಅಲ್ ಮಕ್ತೌಮ್ ಜತೆಯಾಗಿ ವರ್ಚುವಲ್ ಆಗಿ ಶಿಲಾನ್ಯಾಸ ನೆರವೇರಿಸಿದರು. ಇದು ಗಲ್ಪ್, ಪಶ್ಚಿಮ ಏಷ್ಯಾ, ಆಫ್ರಿಕ ಮತ್ತು ಯುರೇಷ್ಯಾದ ಅಂತಾರಾಷ್ಟ್ರೀಯ ಖರೀದಿದಾರರನ್ನು ತಲುಪಲು ಪರಿಣಾಮಕಾರಿ ವೇದಿಕೆ ಒದಗಿಸುವ ಮೂಲಕ ಭಾರತದ ಸೂಕ್ಷ್ಮ, ಸಣ್ಣ ಮತ್ತು ಮಧ್ಯಮ(ಎಂಎಸ್​ಎಂಇ) ವಲಯಗಳ ರಫ್ತುಗಳನ್ನು ಉತ್ತೇಜಿಸುವಲ್ಲಿ ಪ್ರಮುಖ ಪಾತ್ರ ವಹಿಸುವ ಸಾಮರ್ಥ್ಯ ಹೊಂದಿದೆ ಎಂದು ಪ್ರಧಾನಿ ಮೋದಿ ಹೇಳಿದರು. ಇದು ರಫ್ತುದಾರರಿಗೆ ಚೀನಾದ ಡ್ರಾ್ಯಗನ್ ಮಾರ್ಟ್​ನಂತೆ ಒಂದೇ ಸೂರಿನಡಿ ವೈವಿಧ್ಯಮಯ ಉತ್ಪನ್ನಗಳನ್ನು ಪ್ರದರ್ಶಿಸುವ ಏಕೀಕೃತ ವೇದಿಕೆ ಆಗಿರಲಿದ್ದು, 2025ರ ವೇಳೆಗೆ ಕಾರ್ಯನಿರ್ವಹಿಸುವ ನಿರೀಕ್ಷೆ ಇದೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಭವ್ಯಸ್ವಾಗತ: ವಿಶ್ವ ಸರ್ಕಾರಿ ಶೃಂಗಸಭೆಯಲ್ಲಿ ಪ್ರಧಾನಿ ಮೋದಿ ಭಾಷಣ ಮಾಡುವುದಕ್ಕೂ ಮುನ್ನ ದುಬೈನ ಬುರ್ಜ್ ಖಲೀಫಾ ಮೂಲಕ ಮೋದಿಗೆ ಭವ್ಯಸ್ವಾಗತ ಕೋರಲಾಯಿತು. ತ್ರಿವರ್ಣದಿಂದ ಕಂಗೊಳಿಸಿದ ಬುರ್ಜ್ ಖಲೀಫಾ ಮೇಲೆ ‘ಗೌರವದ ಅತಿಥಿ, ಭಾರತ ಗಣರಾಜ್ಯ’ (ಗೆಸ್ಟ್ ಆಫ್ ಆನರ್, ರಿಪಬ್ಲಿಕ್ ಆಫ್ ಇಂಡಿಯಾ) ಎಂಬ ಬರಹ ಮೂಡಿಸಿ ಮೋದಿಯನ್ನು ಸ್ವಾಗತಿಸಲಾಯಿತು. ದುಬೈನ ಕ್ರೌನ್ ಪ್ರಿನ್ಸ್ ಶೇಖ್ ಹಮ್ದಾನ್ ಬಿನ್ ಮೊಹಮ್ಮದ್ ಬಿನ್ ರಶೀದ್ ಅಲ್ ಮಕ್ತೌಮ್ ಅವರು ಉಭಯ ರಾಷ್ಟ್ರಗಳ ನಡುವಿನ ನಿರಂತರ ಬಾಂಧವ್ಯ ಕುರಿತು ಪ್ರಸ್ತಾಪಿಸಿ, ಇಂದು ಅಂತಾರಾಷ್ಟ್ರೀಯ ಸಹಕಾರದ ದಾರಿದೀಪ ಎಂದೂ ಶ್ಲಾಘಿಸಿದರು.

ದೇವಸ್ಥಾನದ ವಿಶೇಷತೆಗಳು

• ಈ ದೇವಳವು ಅಬು ಮುರೀಖಾ ಜಿಲ್ಲೆಯ ಅಬುಧಾಬಿ-ದುಬೈ ಹೆದ್ದಾರಿ ಸಮೀಪದ 27 ಎಕರೆ ಪ್ರದೇಶದಲ್ಲಿ ನಿರ್ವಣಗೊಂಡಿದೆ.

• ಈ ದೇವಸ್ಥಾನಕ್ಕಾಗಿ ಶೇಖ್ ಮೊಹಮದ್ ಬಿನ್ ಜಾಯೆದ್ ಅಲ್ ನಹ್ಯಾನ್ 2015ರಲ್ಲಿ 13.5 ಎಕರೆ ಜಾಗ ನೀಡಿದ್ದು, 2019ರಲ್ಲಿ ನಿರ್ಮಾಣ ಆರಂಭಗೊಂಡಿತ್ತು. ಬಳಿಕ 2019ರಲ್ಲಿ ಯುಎಇ ಸರ್ಕಾರ ಕೂಡ 13.5 ಎಕರೆ ಜಾಗ ನೀಡಿತ್ತು.

• ಬಿಎಪಿಎಸ್ ದೇವಸ್ಥಾನವು ಸಾಂಪ್ರದಾಯಿಕ ನಾಗರಶೈಲಿಯಲ್ಲಿ ನಿರ್ವಣಗೊಂಡಿದ್ದು, ಏಳು ಗೋಪುರಗಳನ್ನು ಹೊಂದಿದೆ. ಇದು ಯುಎನ ಏಳು ಎಮಿರೇಟ್ಸ್​ಗಳನ್ನು ಪ್ರತಿನಿಧಿಸುತ್ತದೆ.

• ಶಿಲೆಯಿಂದ ನಿರ್ವಣಗೊಂಡಿರುವ ಈ ದೇವಸ್ಥಾನಕ್ಕೆ ಉಕ್ಕು ಬಳಸಲಾಗಿಲ್ಲ. ಅಡಿಪಾಯಕ್ಕೆ ಹಾರುಬೂದಿ ಬಳಸಲಾಗಿದ್ದು, ಕಾಂಕ್ರೀಟ್​ನಲ್ಲಿ ಶೇ. 55 ಸಿಮೆಂಟ್ ಬಳಕೆ ತಪ್ಪಿಸಲಾಗಿದ್ದು, ದೇವಾಲಯದ ಇಂಗಾಲದ ಹೆಜ್ಜೆಗುರುತು ತಗ್ಗುವಂತೆ ಮಾಡಲಾಗಿದೆ.

• ದೇವಸ್ಥಾನ ನಿರ್ವಣಕ್ಕಾಗಿ ಇಟಲಿಯಿಂದ ಅಮೃತಶಿಲೆಯನ್ನು ಮೊದಲು ಭಾರತಕ್ಕೆ ರವಾನಿಸಿ, ಕೆತ್ತನೆ ಬಳಿಕ ಯುಎಇಗೆ ಸ್ಥಳಾಂತರಿಸಿ ಒಳಾಂಗಣದಲ್ಲಿ ಬಳಸಲಾಗಿದೆ.

• ಈ ದೇವಸ್ಥಾನದ ನಿರ್ವಣದಲ್ಲಿ ಪ್ರಮುಖ ಪಾತ್ರವಹಿಸಿದವರಲ್ಲಿ ಬಹುತೇಕರು ಗುಜರಾತ್ ಮತ್ತು ರಾಜಸ್ಥಾನಕ್ಕೆ ಸೇರಿದವರು ಎಂಬುದು ಇನ್ನೊಂದು ವಿಶೇಷ. ರಾಜಸ್ಥಾನದಲ್ಲಿ 20 ಸಾವಿರ ಟನ್ ಮರಳುಗಲ್ಲಿನ ತುಂಡುಗಳನ್ನು ಕೆತ್ತಲಾಗಿದ್ದು, ಬಳಿಕ ಅದನ್ನು 700 ಕಂಟೇನರ್​ಗಳಲ್ಲಿ ಅಬುಧಾಬಿಗೆ ರವಾನಿಸಲಾಗಿದೆ. ದೇವಸ್ಥಾನ ನಿರ್ವಣಕ್ಕೆ 18 ಲಕ್ಷ ಇಟ್ಟಿಗೆಗಳ ಬಳಕೆ, 7 ಲಕ್ಷ ಮಾನವಗಂಟೆಗಳ ವಿನಿಯೋಗವಾಗಿದೆ.

• ದೇವಾಲಯದ ಮುಂಭಾಗದ ಫಲಕವು ಸಾರ್ವತ್ರಿಕ ಮೌಲ್ಯಗಳು, ವಿಭಿನ್ನ ಸಂಸ್ಕೃತಿಗಳ ಸಾಮರಸ್ಯದ ಕಥೆಗಳು, ಹಿಂದೂ ಆಧ್ಯಾತ್ಮಿಕ ನಾಯಕರು, ಅವತಾರಗಳ ಚಿತ್ರಣ ಹೊಂದಿದೆ.

• ದೇವಾಲಯದ ಆವರಣವು ಸಂದರ್ಶಕರ ಕೇಂದ್ರ, ಗ್ರಂಥಾಲಯ, ತರಗತಿ, ಪ್ರಾರ್ಥನಾ ಕೊಠಡಿ, ಸುಮುದಾಯ ಕೇಂದ್ರ, ಆಂಫಿಥಿಯೇಟರ್, ಆಟದ ಮೈದಾನ, ಉದ್ಯಾನ ಮಾತ್ರವಲ್ಲದೆ ಪುಸ್ತಕ ಹಾಗೂ ಆಹಾರ ಮಳಿಗೆಗಳನ್ನೂ ಹೊಂದಿದೆ.

https://www.vijayavani.net/6-heart-healthy-snacks-for-better-heart-health

https://www.vijayavani.net/famous-bollywood-actress-reveals-that-she-lost-her-virginity-at-the-age-of-22