ಪೂಜೆ ಹೇಗೆ?: ಈ ದಿನ ಪ್ರಾತಃಕಾಲದಲ್ಲಿ ಮಂಗಲಸ್ನಾನ ಮಾಡಿ ದೇವರ ಪೂಜೆಯ ನಂತರ (ದಂಪತಿ)/ ಬ್ರಾಹ್ಮಣಭೋಜನ ಮಾಡಿಸಲು ವಿಧಿವಿಧಾನಗಳು ಪ್ರಾಶಸ್ಱ ನೀಡಿವೆ. ಪ್ರದೋಷಕಾಲ ಅಂದರೆ ಗೋಧೂಳಿ ಮೂಹೂರ್ತದಲ್ಲಿ, ಶೃಂಗರಿಸಿದ ಮಂಟಪದಲ್ಲಿ, ಶ್ರೀನಾರಾಯಣ ಸಹಿತಲಕ್ಷ್ಮೀಯನ್ನು ಆವಾಹನೆ ಮಾಡಬೇಕು. ಒಂದು ಪೀಠದ ಮೇಲೆ ಅಕ್ಷತೆಗಳಿಂದ ಅಷ್ಟದಳ ಕಮಲ ಅಥವಾ ಸ್ವಸ್ತಿಕವನ್ನು ಬಿಡಿಸಿ ಅದರ ಮೇಲೆ ಲಕ್ಷ್ಮೀಯ ಮೂರ್ತಿಯನ್ನು ಸ್ಥಾಪಿಸುತ್ತಾರೆ. ಕೆಲವು ಕಡೆಗಳಲ್ಲಿ ಕಲಶಕ್ಕೆ ಮುಖವಿರಿಸಿ ಅಥವಾ ಅದರ ಮೇಲೆ ತಾಮ್ರದ ತಟ್ಟೆಯನ್ನಿಟ್ಟು ಮೂರ್ತಿಯನ್ನು ಇಡುತ್ತಾರೆ. ಆರಂಭದಲ್ಲಿ ವಿನಾಯಕನ ಪೂಜೆಯಿಂದ ಪ್ರಾರಂಭಿಸಿ, ಹರಿದ್ರಾ ಕುಂಕುಮಾಕ್ಷತೆಗಳಿಂದ, ಸಕಲ ವೇದೋಕ್ತ ಮಂತ್ರಗಳಿಂದ, ಯಥಾಶಕ್ತಿ ಪೂಜಾ ಕೈಂಕರ್ಯ ನೆರವೇರಿಸಬೇಕು. ವಿಹಿತವಾದ ಅನೇಕ ಭಕ್ಷ್ಯಾದಿ ನೈವೇದ್ಯಕ್ಕೆ ಇರಿಸಬೇಕು. ಲಕ್ಷ್ಮೀದೇವಿಯ ಅನೇಕ ಸ್ತೋತ್ರಗಳು ಅಥವಾ ಹಾಡು ಭಕ್ತಿಯಿಂದ ಪಠಿಸಬೇಕು. ಆಶ್ವ ಯುಜ ಅಮಾವಾಸ್ಯೆಯ ರಾತ್ರಿ ಲಕ್ಷ್ಮಿಯು ಎಲ್ಲೆಡೆಗೆ ಸಂಚರಿಸಿ ತನ್ನ ನಿವಾಸಕ್ಕಾಗಿ ಯೋಗ್ಯ ಸ್ಥಾನವನ್ನು ಹುಡುಕುತ್ತಾಳೆ ಎಂದು ಪುರಾಣದಲ್ಲಿ ಹೇಳಲಾಗಿದೆ. ಎಲ್ಲಿ ಸ್ವಚ್ಛತೆ, ಸತ್ಯ, ಧಾರ್ವಿುಕ ವಾತಾವರಣ ಇರುವುದೋ ಅಲ್ಲಿ ಅವಳು ಆಗಮಿಸುವಳು. ಅಲ್ಲದೆ ಯಾವ ಮನೆಯಲ್ಲಿ ಚಾರಿತ್ರ್ಯವುಳ್ಳ, ಧರ್ಮನಿಷ್ಠ ದೈವಭಕ್ತರು ಮತ್ತು ಕ್ಷಮಾಶೀಲ ಪುರುಷರು, ಪತಿವ್ರತಾ ಸ್ತ್ರೀಯರು ಇರುವರೋ ಅಲ್ಲಿ ವಾಸಿಸಲು ಲಕ್ಷ್ಮೀಯು ಇಷ್ಟಪಡುತ್ತಾಳೆ. ಐಹಿಕ ಸುಖ ಮಾತ್ರ ವಲ್ಲದೇ ಪಾರಮಾರ್ಥಿಕ ಭೋಗವನ್ನಿತ್ತು ಸಲಹುವ ಸಕಲ ಚರಾಚರ ಜೀವರ ಮಾತೆಯೆನಿಸಿದ ಆ ಮಹಾಲಕ್ಷ್ಮಿಯನ್ನು ಆರಾಧಿಸಿ ಕರುಣೆಗೆ ಪಾತ್ರರಾಗೋಣ.
