ಆದಾಯ ತೆರಿಗೆ ಉಳಿಕೆ ಹೇಗೆ?; ಬಜೆಟ್ 2022

ಸಂಸತ್ತಿನಲ್ಲಿ ಮಂಗಳವಾರ ಮುಂದಿನ ಹಣಕಾಸು ವರ್ಷದ ಕೇಂದ್ರ ಮುಂಗಡಪತ್ರ ಮಂಡನೆ ಆಗಿದೆ. ತೆರಿಗೆ ಸ್ಲ್ಯಾಬ್​ನಲ್ಲಿ ಯಾವುದೆ ಬದಲಾವಣೆ ಆಗಿಲ್ಲ. ಆತ್ಮನಿರ್ಭರ ಭಾರತಕ್ಕಾಗಿ ಡಿಜಿಟಲ್ ವ್ಯವಸ್ಥೆಗೆ ಒತ್ತು ನೀಡಿರುವ ಮುಂಗಡಪತ್ರ, ತೆರಿಗೆ ಸಂಗ್ರಹಕ್ಕೆ ಆದ್ಯತೆ ಕೊಟ್ಟಿದೆ. ಇವುಗಳ ನಡುವೆ, ಆದಾಯ ಮೇಲಿನ ತೆರಿಗೆ ಉಳಿಸುವುದು ಹೇಗೆ ಎಂಬುದು ಸಾಮಾನ್ಯರ ಚಿಂತೆ. ಹೋಮ್ ಲೋನ್ ಇನ್ಸೆಂಟಿವ್ಸ್, ಇಪಿಎಫ್, ಇಎಲ್​ಎಸ್​ಎಸ್, ಯುಲಿಪ್, ಎನ್​ಪಿಎಸ್ ಸೇರಿ ವಿವಿಧ ಸೆಕ್ಷನ್​ಗಳ ಪ್ರಕಾರ ಹೂಡಿಕೆಗೂ ಸರ್ಕಾರ ಉತ್ತೇಜನ ನೀಡುತ್ತಿದೆ. ಇವುಗಳ ಮೂಲಕ ಒಂದಷ್ಟು ತೆರಿಗೆ ಉಳಿಸಿಕೊಳ್ಳಲು ಅವಕಾಶವೂ ಇದೆ.

ಹೋಮ್​ಲೋನ್​ ಇನ್​ಸೆಂಟಿವ್ಸ್

ಕೇಂದ್ರ ಮುಂಗಡ ಪತ್ರದಲ್ಲಿ ಪ್ರಧಾನಮಂತ್ರಿ ಆವಾಸ್ ಯೋಜನೆ (ಪಿಎಂಎವೈ)ಗೆ -ಠಿ;48,000 ಕೋಟಿ ಹಂಚಿಕೆ ಆಗಿದೆ. ಇದು, ನಗರ ಪ್ರದೇಶಗಳಲ್ಲಿ ಕೈಗೆಟಕುವ ದರದ ವಸತಿ ಸೌಕರ್ಯ ಪಡೆಯುವ ಅವಕಾಶವನ್ನು ಹೆಚ್ಚಿಸಿದೆ. ಇದರ ಜತೆಗೆ ಹೋಮ್ ಲೋನ್ ಮೂಲಕ ತೆರಿಗೆ ಉಳಿಸು ವುದು ಸಾಧ್ಯವಿದೆ. ಇದಕ್ಕೆ ಸಂಬಂಧಿಸಿದ 5 ಅಂಶಗಳು ಇಲ್ಲಿವೆ.

1. ಹೋಮ್ ಲೋನ್ (ಉದ್ಯೋಗದಾತ, ಸ್ನೇಹಿತ, ಖಾಸಗಿ ಸಾಲದಾತ)ನಲ್ಲಿ ಬಡ್ಡಿಗೆ ತೆರಿಗೆ ವಿನಾಯಿತಿ ಇದೆ. ಆದರೆ, ಮೂಲ ಮೊತ್ತಕ್ಕೆ ಅಲ್ಲ. ಇದಕ್ಕಾಗಿ ಬೇಕಾಗಿರುವುದು ಸಾಲ ನೀಡಿದವರಿಂದ ಒಂದು ಪ್ರಮಾಣಪತ್ರ.
2. ನಿರ್ಮಾಣ ಹಂತದ ಅಪಾರ್ಟ್​ವೆುಂಟ್ ಖರೀದಿ ಮಾಡಿದಾಗಲೂ ಹಸ್ತಾಂತರಕ್ಕೆ ಮುಂಚಿನ ಅವಧಿಯಲ್ಲಿ ಪಾವತಿಸಿದ ಒಟ್ಟು ಬಡ್ಡಿಯನ್ನು ತೆರಿಗೆ ವಿನಾಯಿತಿಗೆ ಸೇರಿಸಬಹುದು. ಆದರೆ, ಇದು ಹಣಕಾಸುವರ್ಷದಲ್ಲಿ 5 ಸಮಾನ ಕಂತಿನಲ್ಲಿ ಪಾವತಿ ಆಗಿದ್ದು, ನಿರ್ಮಾಣ ಮುಗಿದಿರಬೇಕು ಅಥವಾ ಅಪಾರ್ಟ್​ವೆುಂಟ್ ಹಸ್ತಾಂತರಗೊಂಡಿರಬೇಕು. ಇದರಂತೆ ಸ್ವತಃ ವಾಸವಿರುವ ಅಪಾರ್ಟ್​ವೆುಂಟ್​ಗೆ ಗರಿಷ್ಠ 2 ಲಕ್ಷ ರೂಪಾಯಿ ವಿನಾಯಿತಿ ಸಿಗಲಿದೆ. (ಒಂದೊಮ್ಮೆ ಮೊದಲ ಮನೆಗೆ 1.5 ಲಕ್ಷ ರೂಪಾಯಿ ಬಡ್ಡಿ ವಿನಾಯಿತಿ ಸಿಕ್ಕಿದ್ದರೂ)
3. ಪತಿ-ಪತ್ನಿ ಜಂಟಿ ಮಾಲೀಕತ್ವ- ಹೊಸ ಅಪಾರ್ಟ್ ಮೆಂಟ್ ಅನ್ನು ಪತಿ ಮತ್ತು ಪತ್ನಿ ಜಂಟಿಯಾಗಿ ಮಾಲೀಕತ್ವ ಹೊಂದಿ ಖರೀದಿ ಮಾಡಿದಾಗ ಇಬ್ಬರಿಗೂ ಬಡ್ಡಿ ಮೇಲೆ ತಲಾ 2 ಲಕ್ಷ ರೂಪಾಯಿ ತನಕ ತೆರಿಗೆ ವಿನಾಯಿತಿ ಸಿಗಲಿದೆ. ಆದಾಯ ಗಳಿಸುವ ಪುತ್ರ ಅಥವಾ ಪುತ್ರಿ ಇದ್ದರೆ ಆಗ ಸಾಲವನ್ನು ಮೂವರಿಗೆ ಹಂಚಲಾಗುತ್ತದೆ. ಮೂವರು ಕೂಡ ತಲಾ 2 ಲಕ್ಷ ರೂಪಾಯಿ ತನಕ ತೆರಿಗೆ ವಿನಾಯಿತಿ ಪಡೆಯಬಹುದು.
4. ಬಾಡಿಗೆ ಮೇಲೆ ತೆರಿಗೆ - ಸ್ವಂತ ವಾಸವಾಗಿರುವ ಎರಡನೆ ಮನೆಯ ಆದಾಯ ತೆರಿಗೆಯ ವ್ಯಾಪ್ತಿಗೆ ಬರುವುದಿಲ್ಲ. ಆದರೆ ಮೂರನೇ ಮನೆ ಇದ್ದು, ಅದನ್ನು ಬಾಡಿಗೆಗೆ ಕೊಡದೇ ಇದ್ದರೂ, ಅದರ ನಿರೀಕ್ಷಿತ ಬಾಡಿಗೆ ಆದಾಯವನ್ನು ತೆರಿಗೆ ಆದಾಯಕ್ಕೆ ಪರಿಗಣಿಸಲಾಗುತ್ತದೆ.
5. ಮನೆ ಆಸ್ತಿಯಿಂದ ಒಟ್ಟು ನಷ್ಟ ಉಂಟಾಗಿದ್ದರೆ, ಇದನ್ನು ಇತರೆ ಆದಾಯ (ವೇತನ ಮತ್ತು ಇತರೆ ಮೂಲ)ದ ಮೂಲಕ ಗರಿಷ್ಠ 2 ಲಕ್ಷ ರೂಪಾಯಿ ಮಿತಿಯಲ್ಲಿ ಸರಿದೂಗಿಸಬಹುದು. ಈ ರೀತಿ ಲೆಕ್ಕವನ್ನು ಗರಿಷ್ಠ 8 ಹಣಕಾಸು ವರ್ಷ ತನಕ ಮುಂದುವರಿಸಬಹುದು.

ಐಟಿಆರ್ ತಿದ್ದುಪಡಿ ವಿಸ್ತರಣೆ ಅಮ್ನೆಸ್ಟಿ ಸ್ಕೀಮ್ ಅಲ್ಲ

ಬಿಟ್ಟು ಹೋದ ಆದಾಯ ನಮೂದಿಸಿ ಹೆಚ್ಚುವರಿ ತೆರಿಗೆ ಪಾವತಿ ಮಾಡುವುದಕ್ಕಾಗಿ ಎರಡು ವರ್ಷಗಳ ತನಕ ಐಟಿಆರ್ ಅಪ್ಡೇಟ್ ಮಾಡುವ ಯೋಜನೆ ಯಾವುದೇ ಅಮ್ನೆಸ್ಟಿ ಸ್ಕೀಮ್ ಅಲ್ಲ. ಈ ರೀತಿ ಆದಾಯ ನಮೂದಿಸಲು ಬಿಟ್ಟು ಹೋಗಿರುವುದಕ್ಕೆ ಸಕಾರಣವನ್ನು ಉಲ್ಲೇಖಿಸಬೇಕು. ಬಿಟ್ಟು ಹೋದ ಆದಾಯ ನಮೂದಿಸಿದಾಗ ಶೇಕಡ 25 ತೆರಿಗೆ ಪಾವತಿಸಬೇಕಾಗುತ್ತದೆ. ಐಟಿಆರ್ ಸಲ್ಲಿಸಿದ 12 ತಿಂಗಳ ಒಳಗೆ ಈ ತಿದ್ದುಪಡಿ ಮಾಡಿದಾಗ ಮಾತ್ರ ಶೇಕಡ 25ರ ತೆರಿಗೆ ಅನ್ವಯ. ಈ ಅವಧಿ ಮೀರಿ 24 ತಿಂಗಳ ಒಳಗೆ ಮಾಡಿದಾಗ ಶೇಕಡ 50 ತೆರಿಗೆ ಪಾವತಿಸಬೇಕಾಗುತ್ತದೆ ಎಂದು ಕಂದಾಯ ಕಾರ್ಯದರ್ಶಿ ತರುಣ್ ಬಜಾಜ್ ಬುಧವಾರ ಹೇಳಿದರು.

ಸೆಕ್ಷನ್ 80ಸಿ ಲೆಕ್ಕಾಚಾರ: ಹಳೆಯ ಐಟಿ ನಿಯಮ ಪ್ರಕಾರ, ತೆರಿಗೆ ಸ್ಲ್ಯಾಬ್​ನಲ್ಲಿ ಶೇಕಡ 30 ತೆರಿಗೆ ಪಾವತಿಸುವವರು, ಸೆಕ್ಷನ್ 80ಸಿ ಪ್ರಕಾರ 1.5 ಲಕ್ಷ ರೂಪಾಯಿ ಡಿಡಕ್ಷನ್ ಕ್ಲೇಮ್ ಮಾಡಿ 45,000 ರೂಪಾಯಿ ಉಳಿಸಬಹುದು.

• ಪ್ರತಿವರ್ಷ ಪ್ರಾವಿಡೆಂಟ್ ಫಂಡ್ ದೇಣಿಗೆ
• ನಿರ್ದಿಷ್ಟ ಹಣಕಾಸು ಸಂಸ್ಥೆಯಿಂದ ಪಡೆದ ಹೋಮ್ೋನ್ ಪ್ರಿನ್ಸಿಪಲ್ ಮೊತ್ತ
• ಪ್ರತಿವರ್ಷ ಪಬ್ಲಿಕ್ ಪ್ರಾವಿಡೆಂಟ್ ಫಂಡ್ (ಪಿಪಿಎಫ್)ಗೆ 500 ರೂ.ನಿಂದ 1.5 ಲಕ್ಷ ರೂ. ತನಕ ದೇಣಿಗೆ
• ಎರಡು ಮಕ್ಕಳ ಶಾಲೆಯ ಟ್ಯೂಷನ್ ಶುಲ್ಕ
• ಜೀವ ವಿಮೆಯ ಪ್ರೀಮಿಯಂ ಸ್ವಂತದ್ದು, ಪತ್ನಿ (ಪತಿ) ಮತ್ತು ಮಕ್ಕಳದ್ದು
• ಯುಲಿಪ್ ಮೇಲಿನ ಹೂಡಿಕೆಯ ಪ್ರೀಮಿಯಂ
• ನ್ಯಾಷನಲ್​ ಸೇವಿಂಗ್ಸ್ ಸರ್ಟಿಫಿಕೇಟ್ (ಎನ್​ಎಸ್​ಸಿ)
• ಐದು ವರ್ಷದ ಅವಧಿಯ ಬ್ಯಾಂಕ್/ಅಂಚೆ ಕಚೇರಿ ಠೇವಣಿ
• ಸುಕನ್ಯ ಸಮೃದ್ಧಿ ಯೋಜನೆಗೆ ಪ್ರತಿವರ್ಷ 1.5 ಲಕ್ಷ ರೂಪಾಯಿ ಹೂಡಿಕೆ (ಗರಿಷ್ಠ ಇಬ್ಬರು ಮಕ್ಕಳಿಗೆ ಸೀಮಿತ)

ಸೆಕ್ಷನ್ 80ಡಿ ಪ್ರಕಾರ ಉಳಿತಾಯ: ಆರೋಗ್ಯ ವಿಮೆಯ ಪ್ರೀಮಿಯಂ ಗರಿಷ್ಠ 25,000 ರೂ. (ಹಿರಿಯ ನಾಗರಿಕರಿಗೆ 50,000 ರೂ.)ಗೆ ಸೆ.80 ಡಿ ಪ್ರಕಾರ ತೆರಿಗೆ ವಿನಾಯಿತಿ ಇದೆ. ಇದಲ್ಲದೆ, 60 ವರ್ಷ ಮೇಲ್ಪಟ್ಟ ಪಾಲಕರು ಜತೆಗಿದ್ದರೆ ಅವರ ವೈದ್ಯಕೀಯ ವೆಚ್ಚ ಗರಿಷ್ಠ 50,000 ರೂಪಾಯಿಗೆ ತೆರಿಗೆ ವಿನಾಯಿತಿ ಪಡೆಯಬಹುದು.

ತೆರಿಗೆ ಸ್ಲ್ಯಾಬ್ ಬದಲಿಲ್ಲ: ಪ್ರಸಕ್ತ ಬಜೆಟ್​ನಲ್ಲಿ ಆದಾಯ ತೆರಿಗೆ ಸ್ಲ್ಯಾಬ್​ಗಳಲ್ಲಿ ಯಾವುದೇ ಬದಲಾವಣೆ ಆಗಿಲ್ಲ. ಈ ಹಿಂದಿನ ತೆರಿಗೆ ದರಗಳೇ ಮುಂದುವರಿಯಲಿದೆ. ಜತೆಗೆ ಹೊಸ ವಿನಾಯಿತಿಗಳನ್ನೂ ನೀಡಿಲ್ಲ. ಈಗಿರುವ ವೈಯಕ್ತಿಕ ತೆರಿಗೆ ವಿವರ ಇಲ್ಲಿದೆ.

(ವಿವಿಧ ಬಗೆಯ ವಿನಾಯಿತಿ, ಡಿಡಕ್ಷನ್​ಗಳ ಪ್ರಯೋಜನ ಪಡೆದು ತೆರಿಗೆಯ ಪ್ರಮಾಣವನ್ನು ಕಡಿಮೆ ಮಾಡಿಕೊಳ್ಳಲು ಅವಕಾಶ ಇದೆ.)

ಜಿಡಿಪಿ ಶೇ.7.8 ಕ್ರಿಸೆಲ್ ಅಂದಾಜು

ಭಾರತದ ಜಿಡಿಪಿ ಶೇ. 7.8ರ ದರದಲ್ಲಿ ಪ್ರಗತಿಹೊಂದಲಿದೆ ಎಂದು ಸ್ವದೇಶಿ ರೇಟಿಂಗ್ ಸಂಸ್ಥೆ ಕ್ರಿಸೆಲ್ ತಿಳಿಸಿದೆ. ಮಂಗಳವಾರ ಮಂಡನೆಯಾದ ಬಜೆಟ್​ನಲ್ಲಿ ಪ್ರಗತಿಯ ದರವನ್ನು ಶೇ. 8.5 ಎಂದು ಅಂದಾಜು ಮಾಡಲಾಗಿತ್ತು. ಈಗ ಕ್ರಿಸೆಲ್ ಇದಕ್ಕಿಂತ ಕಡಿಮೆ ಅಂದಾಜು ವ್ಯಕ್ತಪಡಿಸಿದೆ. ಭಾರತದ ಆರ್ಥಿಕತೆಗೆ ಅಪಾಯಗಳು ಇನ್ನೂ ಸಂಪೂರ್ಣ ದೂರವಾಗಿಲ್ಲ. ಜತೆಗೆ ಜಾಗತಿಕ ಅರ್ಥ ವ್ಯವಸ್ಥೆಯಲ್ಲೂ ಈ ವರ್ಷ ಮಂದಗತಿ ಕಂಡುಬರುವ ಸಾಧ್ಯತೆ ಇದೆ. ಅಮೆರಿಕ ಫೆಡ್ ಸಹಿತ ಪ್ರಮುಖ ದೇಶಗಳಲ್ಲಿ ಬಡ್ಡಿದರ ಏರಿಕೆ ನಿರೀಕ್ಷೆ ಮಾಡಲಾಗಿದೆ. ಇದು ಭಾರತದ ಮೇಲೂ ಪರಿಣಾಮ ಬೀರುವುದು ನಿಶ್ಚಿತವಾಗಿದೆ. ಈಗಾಗಲೇ 85 ಡಾಲರ್ ತಲುಪಿರುವ ಕಚ್ಚಾತೈಲ ದರ ಇನ್ನೂ ಏರಿಕೆ ಕಾಣುವ ಲಕ್ಷಣ ಇದೆ. ಇದರಿಂದ ಭಾರತದ ಆರ್ಥಿಕತೆ ಮೇಲೆ ಒತ್ತಡ ಬೀರಲಿದೆ ಎಂದು ವರದಿಯಲ್ಲಿ ಹೇಳಲಾಗಿದೆ.

ಕ್ರಿಪ್ಟೋ ಆದಾಯಕ್ಕೆ ಪ್ರತ್ಯೇಕ ಕಾಲಂ

ನವದೆಹಲಿ: ಕ್ರಿಪ್ಟೋಕರೆನ್ಸಿಯ ಆದಾಯ ಜೂಜಿನಿಂದ ಬಂದ ಆದಾಯ ಅಥವಾ ಕುದುರೆ ರೇಸ್ ಗೆದ್ದಾಗ ಸಿಗುವ ಆದಾಯಕ್ಕೆ ಸಮ ಎಂದು ಕೇಂದ್ರ ಸರ್ಕಾರ ಪರಿಗಣಿಸಿದೆ. ಹೀಗಾಗಿ ಈ ವರ್ಷದ ಏ.1ರಿಂದ ಅನ್ವಯವಾಗುವಂತೆ ಈ ಆದಾಯದ ಮೇಲೆ ಶೇಕಡ 30 ತೆರಿಗೆ ಮತ್ತು ಶೇಕಡ 15 ಸೆಸ್, ಸಚಾರ್ಜ್​ಗಳು ಸೇರಿ ಒಟ್ಟು ಶೇಕಡ 45 ಸರ್ಕಾರದ ಬೊಕ್ಕಸಕ್ಕೆ ಸೇರಲಿದೆ ಎಂದು ಕಂದಾಯ ಕಾರ್ಯದರ್ಶಿ ತರುಣ್ ಬಜಾಜ್ ಬುಧವಾರ ಸ್ಪಷ್ಟಪಡಿಸಿದರು.

ಮುಂದಿನ ಹಣಕಾಸು ವರ್ಷದ ಆದಾಯ ತೆರಿಗೆ ರಿಟರ್ನ್ಸ್ ಸಲ್ಲಿಸುವಾಗ ಆ ಅರ್ಜಿಯಲ್ಲಿ ಕ್ರಿಪ್ಟೋ ಆದಾಯಕ್ಕೆ ಒಂದು ಕಾಲಂ ಇರಲಿದೆ. ಅದರಲ್ಲಿ ಕ್ರಿಪ್ಟೋಕರೆನ್ಸಿಯಿಂದ ಬಂದ ಆದಾಯವನ್ನು ನಮೂದಿಸಬೇಕಾಗುತ್ತದೆ. ಕ್ರಿಪ್ಟೋಕರೆನ್ಸಿ, ನಾನ್-ಫಂಗಿಬಲ್ ಟೋಕನ್ಸ್ (ಎನ್​ಜಿಟಿ) ಮೇಲಿನ ಹೂಡಿಕೆಯಿಂದ ಬರುವ ಆದಾಯ 50 ಲಕ್ಷ ರೂಪಾಯಿ ಮೇಲ್ಪಟ್ಟು ಇದ್ದರೆ ಆಗ ಶೇಕಡ 30 ತೆರಿಗೆ ಮತ್ತು ಶೇಕಡ 15 ಸೆಸ್ ಮತ್ತು ಸಚಾರ್ಜ್​ಗಳು ಅನ್ವಯವಾಗಲಿವೆ. 10,000 ರೂಪಾಯಿ ಮೇಲ್ಪಟ್ಟ ಹೂಡಿಕೆಗೆ ಶೇಕಡ 1 ಟಿಡಿಎಸ್ ಜುಲೈ 1ರಿಂದ ಅನ್ವಯವಾಗಲಿದೆ. ಇದರ ಮೂಲಕ ಹೂಡಿಕೆಯನ್ನು ಟ್ರ್ಯಾಕ್​ ಮಾಡುವುದು ಸಾಧ್ಯವಿದೆ. ಅಷ್ಟೇ ಅಲ್ಲ, ವರ್ಷಕ್ಕೆ ವ್ಯಕ್ತಿ/ಹಿಂದು ಅವಿಭಜಿತ ಕುಟುಂಬ 50,000 ರೂಪಾಯಿಗಿಂತ ಹೆಚ್ಚು ಹೂಡಿಕೆ ಮಾಡುವಂತೆ ಇಲ್ಲ ಎಂದು ತರುಣ್ ಬಜಾಜ್ ವಿವರಿಸಿದರು.

ಕಾನೂನು ಮಾನ್ಯತೆ ಸ್ಪಷ್ಟತೆ ಇಲ್ಲ

ಕ್ರಿಪ್ಟೋಕರೆನ್ಸಿ ಮೇಲಿನ ಹೂಡಿಕೆ ಮತ್ತು ಆದಾಯಕ್ಕೆ ಸಂಬಂಧಿಸಿದ ನಿಯಮ ಪರಿಷ್ಕರಣೆ ಹೊಂದಿದ ಹಣಕಾಸು ಮಸೂದೆ ಸಂಸತ್ತಿನಲ್ಲಿ ಮಂಡನೆ ಆಗಿದೆ. ಆದರೆ, ಕ್ರಿಪ್ಟೋಕರೆನ್ಸಿಯ ಕಾನೂನುಮಾನ್ಯತೆಯ ಬಗ್ಗೆ ಮಸೂದೆಯಲ್ಲಿ ಏನೂ ಹೇಳಿಲ್ಲ. ಬಿಟ್​ಕಾಯಿನ್, ಎಥೀರಿಯಂ, ಎನ್​ಎಫ್​ಟಿ ಮುಂತಾದ ಕ್ರಿಪ್ಟೋಕರೆನ್ಸಿ, ಟೋಕನ್​ಗಳು ಎಂದಿಗೂ ಕಾನೂನು ಮಾನ್ಯತೆ ಹೊಂದಿದವು ಆಗಿಲ್ಲ. ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್​ಬಿಐ) ಬೆಂಬಲಿತ ಡಿಜಿಟಲ್ ಕರೆನ್ಸಿ ಎಂದಿಗೂ ಮಾನ್ಯತೆ ಕಳೆದುಕೊಳ್ಳುವುದಿಲ್ಲ. ಕ್ರಿಪ್ಟೋ ಅಸೆಟ್​ಗಳ ಮೌಲ್ಯ ಇಬ್ಬರು ವ್ಯಕ್ತಿಗಳ ನಡುವೆ ಅಂದಾಜಿಸಲ್ಪಡುತ್ತದೆ. ಇದನ್ನು ಸರ್ಕಾರ ದೃಢೀಕರಿಸುವ ಕೆಲಸ ಮಾಡುವುದಿಲ್ಲ ಎಂದು ಕೇಂದ್ರ ಹಣಕಾಸು ಕಾರ್ಯದರ್ಶಿ ಟಿವಿ ಸೋಮನಾಥನ್ ಸ್ಪಷ್ಟಪಡಿಸಿದರು.

ಬಜೆಟ್ ಮರುದಿನವೂ ಷೇರುಪೇಟೆ ಏರಿಕೆ

ಮುಂಬೈ: ಬಜೆಟ್ ಮಾರನೇ ದಿನ ಬುಧವಾರವೂ ಭಾರತೀಯ ಷೇರುಪೇಟೆ ಭರ್ಜರಿ ಏರಿಕೆ ಕಂಡಿದ್ದು, ಕೇಂದ್ರ ಸರ್ಕಾರ ಮಂಡಿಸಿರುವ ಮುಂಗಡ ಪತ್ರ ಹೂಡಿಕೆದಾರರಲ್ಲಿ ಉತ್ಸಾಹ ಮೂಡಿಸಿದಂತಿದೆ. ಸೆನ್ಸೆಕ್ಸ್ 695.76 ಅಂಕ ಏರಿಕೆ ಕಂಡು 59,558.33ಕ್ಕೆ ಏರಿಕೆ ಕಂಡಿದ್ದರೆ. ನಿಫ್ಟಿ 203 ಅಂಕ ಏರಿಕೆ ಕಂಡು, 17,780ಕ್ಕೆ ಹೆಚ್ಚಳವಾಗಿದೆ. ಇಂಡಸ್​ಇಂಡ್​ಬ್ಯಾಂಕ್ ಶೇ. 5 ಏರಿಕೆ ಕಂಡಿದೆ. ಬಜಾಜ್ ಫೈನಾನ್ಸ್ ಎಚ್​ಸಿಎಲ್ ಟೆಕ್, ಕೊಟಕ್ ಬ್ಯಾಂಕ್, ಆಕ್ಸಿಸ್ ಬ್ಯಾಂಕ್ ಏರಿಕೆ ದಾಖಲಿಸಿವೆ. ಟೆಕ್ ಮಹಿಂದ್ರಾ, ನೆಸ್ಲೆ, ಮಾರುತಿ, ಎಲ್​ಎನ್​ಟಿ ಇಳಿಕೆ ಕಂಡಿವೆ. ಸೆನ್ಸೆಕ್ಸ್ ಪಟ್ಟಿಯಲ್ಲಿ 21 ಷೇರುಗಳು ಏರಿಕೆ ಕಂಡಿದ್ದರೆ, 9 ಷೇರುಗಳು ಇಳಿಕೆ ಕಂಡಿವೆ. ಏಷ್ಯಾ ರಾಷ್ಟ್ರಗಳ ಮಾರುಕಟ್ಟೆಯಲ್ಲೂ ತುಸು ಏರಿಕೆ ಕಂಡುಬಂದಿದೆ.

https://www.vijayavani.net/bjp-leader-threatened-another-person-with-pistol-point/

https://www.vijayavani.net/new-rules-in-fifteen-days-regarding-towing-of-vehicles/