ಸಂತಾನ, ಭೂವ್ಯಾಜ್ಯ, ಆರೋಗ್ಯ: ಕೊಡಗು, ಮೈಸೂರು, ಬೆಂಗಳೂರಿನಿಂದಲೂ ದೇವಿಯ ದರ್ಶನಕ್ಕೆ ಮತ್ತು ಆಕೆಯ ಕೃಪಾಕಟಾಕ್ಷಕ್ಕಾಗಿ ಭಕ್ತರು ಆಗಮಿಸುತ್ತಾರೆ. ಸಂತಾನಕ್ಕಾಗಿ ಹಂಬಲಿಸುವವರು ಸಂತಾನಪ್ರಾಪ್ತಿಯಾದಲ್ಲಿ ಬೆಳ್ಳಿಯ ತೊಟ್ಟಿಲು ಮತ್ತು ಬೆಳ್ಳಿಯ ಶಿಶುವನ್ನು ನೀಡಿ ಹರಕೆ ಈಡೇರಿಸುತ್ತಾರೆ. ಬಾಯಿಗೆ ಬೀಗದ ಹರಕೆ ತೀರಿಸುವ, ದಾಸೋಹ, ದೇಗುಲ ಅಭಿವೃದ್ಧಿಗೆ ಆರ್ಥಿಕ ಸಹಕಾರ ಹೀಗೆ ತಮ್ಮ ಕೈಲಾದ ಸೇವೆಯನ್ನು ದೇವಿಯ ಪಾದಕ್ಕೆ ಅರ್ಪಿಸಿ ಕೃತಾರ್ಥರಾಗುತ್ತಾರೆ. ಅಲ್ಲದೇ ಭೂಮಿ ವ್ಯಾಜ್ಯ, ಆಸ್ತಿ ವಿವಾದ, ಆರೋಗ್ಯ ಸಮಸ್ಯೆ ಹೀಗೆ ತರಹೇವಾರಿ ಸಮಸ್ಯೆಗಳಿಗೆ ದೇವಿ ಕೃಪೆ ತೋರಿ ಸಮಸ್ಯೆಗಳನ್ನು ಪರಿಹರಿಸುತ್ತಾಳೆ. ಊರಿನಿಂದ ಮದುವೆಯಾಗಿ ಹೋದ ಊರಿನ ಹೆಣ್ಣುಮಗಳ ಕುರಿತು ದೇವಿಗೆ ಅಪಾರ ಪ್ರೀತಿ. ಹೆಣ್ಣುಮಕ್ಕಳು ತಮ್ಮ ಗಂಡಂದಿರ ಮನೆಯಿಂದಲೇ ದೇವಿಯ ಕರುಣೆಗಾಗಿ ಕೋರಿದರೆ ಅದನ್ನೂ ನೆರವೇರಿಸುತ್ತಾಳೆ ಎನ್ನುವುದು ಗ್ರಾಮಸ್ಥರ ಅನುಭವದ ಮಾತಾಗಿದೆ.
