ವಾಗ್ಭಟಾಚಾರ್ಯರು ತಮ್ಮ ಅಷ್ಟಾಂಗ ಹೃದಯ ಎಂಬ ಗ್ರಂಥದಲ್ಲಿ ಒಬ್ಬ ಮನುಷ್ಯ ರೋಗ ರಹಿತನಾಗಿ ಬದುಕಲು ಇಟ್ಟುಕೊಳ್ಳಬೇಕಾದ ನಿಯಮಗಳ ಬಗ್ಗೆ ಹೇಳಿದ್ದಾರೆ. ಅವುಗಳಲ್ಲಿ ಒಂದು ಹಿತಾಹಾರ ಸೇವನೆ. ಆದರೆ ಹಿತವಾದ ಆಹಾರ ಎಂದರೆ ಎಂತಹ ಆಹಾರ ಎಂಬುದರ ತಿಳಿವಳಿಕೆ ನಮಗೆ ಇರಬೇಕು. ಹಿತಾಹಾರವೆಂದರೆ ಮೊದಲನೆಯದಾಗಿ ಆ ಆಹಾರದಲ್ಲಿ ಬಳಸಿದ ಘಟಕಗಳು ದೇಹದ ಆರೋಗ್ಯವನ್ನು ಹೆಚ್ಚಿಸುವ ಮತ್ತು ರೋಗವನ್ನು ನಿವಾರಿಸುವ ಗುಣವನ್ನು ಹೊಂದಿರಬೇಕು. ಹಾಗಾಗಿ ಆಹಾರ ತಯಾರಿಸುವಾಗ ನಾವು ಅದರಲ್ಲಿ ಬಳಸುವ ವಸ್ತುಗಳ ಗುಣಗಳ ಬಗ್ಗೆ ಅರಿತಿರಬೇಕು. ಉದಾಹರಣೆಗೆ, ಅರಿಶಿನ, ಶುಂಠಿ, ದಾಲ್ಚಿನ್ನಿಯಂತಹ ಸಾಂಬಾರ ಪದಾರ್ಥಗಳು, ಕರಿಬೇವು, ನುಗ್ಗೆಯಂತಹ ಸೊಪ್ಪುಗಳು, ತರಕಾರಿಗಳು, ಹಣ್ಣುಗಳು, ಒಣಹಣ್ಣುಗಳು, ದೇಶೀ ತಳಿಯ, ಹುಲ್ಲು ಮೆಂದ ಆಕಳ ಹಾಲು ಮತ್ತು ಅದರ ಉತ್ಪನ್ನಗಳು ಹೀಗೆ ಇವೆಲ್ಲಾ ಧನಾತ್ಮಕ ಗುಣಗಳನ್ನು ಹೊಂದಿರುವ ಆಹಾರ ಪದಾರ್ಥಗಳು. ಆದರೆ ಅವುಗಳನ್ನು ಹೇಗೆ ಬಳಸುತ್ತೇವೆ ಎಂಬದರ ಮೇಲೆ ನಮ್ಮ ಆರೋಗ್ಯದ ಮೇಲೆ ಅವುಗಳಿಂದಾಗುವ ಪರಿಣಾಮ ನಿರ್ಧರಿತವಾಗುತ್ತದೆ. ಸಕ್ಕರೆ, ಮೈದಾ, ಹೊರಗಡೆ ಸಿಗುವ ಸಿದ್ಧ ತಿಂಡಿಗಳಲ್ಲಿ ಬಳಸುವ ರಾಸಾಯನಿಕಗಳು ಜನ್ಮತಃ ಅಹಿತವಾದವು. ಅವುಗಳನ್ನು ಹೇಗೆ ಬಳಸಿದರೂ ದೇಹಕ್ಕೆ ಹಾನಿಯಾಗುವುದು ಶತಃಸಿದ್ಧ. ಹಾಗಾಗಿ ಹಿತವಾದ ಆಹಾರವೆಂದರೆ ಇಂತಹ ರಾಸಾಯನಿಕಗಳನ್ನು ಬಳಸಿರಬಾರದು.
