ರಾಜ್ಯದಲ್ಲಿ ಕಾಣಿಸಿಕೊಂಡ ಬರ, ನೆರೆ ಹಾವಳಿ, ಕರೊನಾ ಲಾಕ್ಡೌನ್ ರಾಷ್ಟ್ರೀಕೃತ ಬ್ಯಾಂಕುಗಳ ಮೇಲೆ ಕೆಟ್ಟ ಪರಿಣಾಮ ಬೀರಿದ್ದು, ಅನುತ್ಪಾದಕ ಆಸ್ತಿ (ಎನ್ಪಿಎ) ಭಾರಿ ಪ್ರಮಾಣದಲ್ಲಿ ಏರಿಕೆ ಕಂಡಿದೆ. ಇದೀಗ ಬ್ಯಾಂಕುಗಳು ಸಾಲ ವಸೂಲಿಗೆ ರಾಜ್ಯ ಸರ್ಕಾರದ ಬಳಿ ನೆರವು ಕೋರಿವೆ. ಬ್ಯಾಂಕುಗಳು ಸೂಕ್ತ ಮಾಹಿತಿ ಹಂಚಿಕೊಂಡರೆ ಮಾತ್ರ ನೆರವು ನೀಡಲು ಸಾಧ್ಯ ಎಂದು ಅಭಿವೃದ್ಧಿ ಆಯುಕ್ತರು ರಾಜ್ಯ ಬ್ಯಾಂಕರುಗಳ ಸಮಿತಿಗೆ ಸಂದೇಶ ರವಾನಿಸಿದ್ದಾರೆ. ಕೃಷಿ, ಕೈಗಾರಿಕೆ, ವಸತಿ, ಶಿಕ್ಷಣ ಮತ್ತು ಇತರೆ ಆದ್ಯತಾ ವಲಯ, ಆದ್ಯತಾ ರಹಿತ ವಲಯ ಸೇರಿ 29.48 ಲಕ್ಷ ಸಂಖ್ಯೆಯ ಸಾಲಗಳಿಂದ 54,756 ಕೋಟಿ ರೂ. ಸಾಲ ಮರುಪಾವತಿಯಾಗದೆ ಅನುತ್ಪಾದಕ ಆಸ್ತಿಯಾಗಿದೆ ಎಂದು ಬ್ಯಾಂಕುಗಳು ಸರ್ಕಾರಕ್ಕೆ ದಾಖಲೆ ನೀಡಿವೆ.
