ಜೆರುಸಲೇಂ: ಹಮಾಸ್ ಮತ್ತು ಇಸ್ರೇಲ್ ನಡುವಿನ ಘೋಷಿತ ಕದನವಿರಾಮ ಕೊನೆಗೊಳ್ಳಲು ಇನ್ನೇನು ಕೆಲವೇ ಗಂಟೆಗಳು ಇರುವಾಗ ತಾತ್ಕಾಲಿಕ ಯುದ್ಧ ನಿಲುಗಡೆ ಇನ್ನಷ್ಟು ವಿಸ್ತರಿಸಲು ಅಂತಾರಾಷ್ಟ್ರೀಯ ಪ್ರಯತ್ನಗಳು ಬಿರುಸಿನಿಂದ ಸಾಗಿವೆ. ಹಮಾಸ್ ವಶದಲ್ಲಿರುವ ಎಲ್ಲ ಒತ್ತೆಯಾಳುಗಳು ಮತ್ತು ಇಸ್ರೇಲ್ ಜೈಲುಗಳಲ್ಲಿರುವ ಪ್ಯಾಲೆಸ್ತೀನಿ ಕೈದಿಗಳ ಬಿಡುಗಡೆಗೆ ಜಾಗತಿಕ ಮಧ್ಯಸ್ಥಿಕೆಗಾರರು ಎಡೆಬಿಡದೆ ಪ್ರಯತ್ನಿಸುತ್ತಿದ್ದಾರೆ. ಕತಾರ್ ಮತ್ತು ಈಜಿಪ್ಟ್ ಸಂಧಾನದ ಪರಿಣಾಮವಾಗಿ ಕದನವಿರಾಮ ಘೊಷಣೆಯಾಗಿತ್ತು. ಕದನವಿರಾಮ ವಿಸ್ತರಣೆಗೆ ಹಮಾಸ್ ಹೆಚ್ಚಿನ ಒಲವು ತೋರಿದೆ. ಸೋಮವಾರ ಮುಗಿಯಬೇಕಿದ್ದ ಕದನವಿರಾಮವನ್ನು ಪ್ರತಿ 10 ಒತ್ತೆಯಾಳುಗಳ ಬಿಡುಗಡೆಗೆ 1 ದಿನ ವಿಸ್ತರಿಸಲು ಇಸ್ರೇಲ್ ಒಪ್ಪಿದೆ. ಹಮಾಸ್ ಬುಧವಾರ ಒತ್ತೆಯಾಳುಗಳ ಇನ್ನೊಂದು ತಂಡವನ್ನು ಮುಕ್ತಗೊಳಿಸುವ ನಿರೀಕ್ಷೆ ಇದೆ. ಈ ನಡುವೆ, 10 ಇಸ್ರೇಲಿ ಹಾಗೂ ಇಬ್ಬರು ವಿದೇಶಿ ಒತ್ತೆಯಾಳುಗಳನ್ನು ಗಾಜಾದಿಂದ ಹಮಾಸ್ ಮಂಗಳ ವಾರ ಬಿಡುಗಡೆಗೊಳಿಸಿದ ನಂತರ, ಇಸ್ರೇಲಿ ಸೆರೆಮನೆಗಳಿಂದ 30 ಪ್ಯಾಲೆಸ್ತೀನಿ ಮಹಿಳೆಯರು ಮತ್ತು ಮಕ್ಕಳನ್ನು ಬಿಡುಗಡೆ ಮಾಡಲಾಗಿದೆ. ಕದನವಿರಾಮದಲ್ಲಿ ಬಿಡುಗಡೆ ಯಾದವರ ಸಂಖ್ಯೆ 81ಕ್ಕೇರಿದೆ.
