ಬಿಜೆಪಿಯಿಂದ ಗ್ಯಾರಂಟಿ ವಸ್ತುಸ್ಥಿತಿ ಅಧ್ಯಯನ: ಕಾಂಗ್ರೆಸ್ ಮೋಸದಾಟ ಜನರಿಗೆ ತಿಳಿಸಲು ಸಿದ್ಧತೆ; ತಳಮಟ್ಟದ ಕಾರ್ಯಕರ್ತರಲ್ಲಿ ಹುರುಪು

ಬೆಂಗಳೂರು: ಸಾರ್ವತ್ರಿಕ ಮೂಲ ಆದಾಯವೆಂಬ ದೊಡ್ಡ ಅರ್ಥ ಬಿಂಬಿಸಿ, ಗ್ಯಾರಂಟಿಗಳ ಹೆಸರಿನಲ್ಲಿ ರಾಜ್ಯ ಸರ್ಕಾರ ಜನರೊಂದಿಗೆ ಮೋಸದಾಟಕ್ಕೆ ಇಳಿದಿದೆ ಎಂದು ಬಿಜೆಪಿ ಬಲವಾಗಿ ಶಂಕಿಸಿದ್ದು, ಸಂಶಯ ವ್ಯಕ್ತಪಡಿಸಿದರೆ ರಾಜಕೀಯ ಸೋಂಕಿತವಾಗಬಹುದು. ಬಡವರ ಪರ ಯೋಜನೆಗಳನ್ನು ಪ್ರತಿಪಕ್ಷ ಸಹಿಸುತ್ತಿಲ್ಲವೆಂದು ಕಾಂಗ್ರೆಸ್ ಬಿಂಬಿಸಲಿದೆ ಎಂದು ಕಮಲಪಡೆ ಗ್ರಹಿಸಿದೆ. ಈ ಹಿನ್ನೆಲೆಯಲ್ಲಿ ಪಕ್ಷದ ರಾಜ್ಯಾಧ್ಯಕ್ಷ ಬಿ.ವೈ.ವಿಜಯೇಂದ್ರ ತಳಮಟ್ಟದಲ್ಲಿ ವಸ್ತುಸ್ಥಿತಿ ಅಧ್ಯಯನಕ್ಕೆ ಗಂಭೀರ ಚಿಂತನೆ ನಡೆಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ಬೂತ್​ಮಟ್ಟದ ಸಮಿತಿಗಳು, ಪೇಜ್​ಪ್ರಮುಖರ ಕೈಗೆ ಕೆಲಸ ಕೊಟ್ಟಂತಾಗುತ್ತದೆ. ಕಾರ್ಯಕರ್ತರಲ್ಲಿ ಹುರುಪು ತುಂಬಿ, ಸಂಘಟನೆ ಬಲಪಡಿಸಲು ನೆರವಾಗುತ್ತದೆ ಎನ್ನುವುದು ಚಿಂತನೆಯ ತಿರುಳು.

ಬೆಳಗಾವಿ ಅಧಿವೇಶನದಲ್ಲಿ ಎರಡು ರೀತಿಯ ಹೋರಾಟ ಮಾಡಲು ಮುಂದಾಗಿದ್ದು, ಪೂರಕವಾಗಿ ಗ್ಯಾರಂಟಿಗಳ ಹುಳುಕು, ಅಭಿವೃದ್ಧಿ ಸ್ಥಗಿತದ ಅಡ್ಡ ಪರಿಣಾಮಗಳ ಮೇಲೆ ಬೆಳಕು ಚೆಲ್ಲುವ ಯೋಚನೆ ಪಕ್ಷದ ಹಿರಿಯ ನಾಯಕರದಾಗಿದೆ.

ಜನರ ಮುಂದೆ ಅಂಕಿ-ಅಂಶಗಳ ಮಂಡನೆ: ಬಿಜೆಪಿಯ ಹೊಸ ಸಾರಥಿಗಳಿಬ್ಬರು ಸದನದೊಳಗೆ ಸರ್ಕಾರವನ್ನು ತಿವಿಯಲು ಆಡಳಿತ, ಅಭಿವೃದ್ಧಿ ಹಾಗೂ ರಾಜಕೀಯ ಅಸ್ತ್ರಗಳನ್ನು ಜೋಡಿಸಿಕೊಳ್ಳುತ್ತಿದ್ದು, ತಮ್ಮದೇ ನೆಲೆಯಲ್ಲಿ ಪ್ರಯತ್ನಕ್ಕೆ ಕೈಹಾಕಿದ್ದಾರೆ. ವಿಧಾನಸಭೆ ಪ್ರತಿಪಕ್ಷ ನಾಯಕ ಆರ್.ಅಶೋಕ್, ಮಾಜಿ ಪ್ರಧಾನಿ ಎಚ್.ಡಿ.ದೇವೇಗೌಡ ಮತ್ತು ಮಾಜಿ ಸಿಎಂ ಬಸವರಾಜ ಬೊಮ್ಮಾಯಿ ಜತೆಗೆ ಔಪಚಾರಿಕ ಮಾತುಕತೆ ನಡೆಸಿದ್ದಾರೆ. ಸಂಘಟನಾಬಲವನ್ನು ಬಳಸಿಕೊಂಡು ಸರ್ಕಾರದ ವಿರುದ್ಧ ಮುಗಿಬೀಳಬೇಕು ಎನ್ನುವುದು ಬಿ.ವೈ.ವಿಜಯೇಂದ್ರ ಆಲೋಚನೆಯಾಗಿದ್ದು, ಕಾರ್ಯತಂತ್ರ ಹೆಣೆಯುತ್ತಿದ್ದಾರೆ.

ತಳಮಟ್ಟದ ಸಮೀಕ್ಷೆ, ಅಧ್ಯಯನ, ಫಲಾನುಭವಿಗಳಿಗೆ ಖುದ್ದು ಭೇಟಿಯಾಗಿ ರ್ಚಚಿಸುವ ಮೂಲಕ ಸಂಗ್ರಹಿಸಿದ ಮಾಹಿತಿ ಹಾಗೂ ಸರ್ಕಾರದ ವಿವರಗಳಿಗೆ ತಾಳೆಹಾಕಿ ನಿಖರ ಅಂಕಿ-ಅಂಶಗಳನ್ನು ಜನರ ಮುಂದಿಡಲು ಯೋಚಿಸಿದೆ. ಸರ್ಕಾರದ ವೈಫಲ್ಯವನ್ನು ಜನರು ಸುಲಭವಾಗಿ ಅರ್ಥ ಮಾಡಿಕೊಳ್ಳುತ್ತಾರೆ. ನಂತರ ವಿವಿಧ ಹಂತದ ಹೋರಾಟಗಳ ಮೂಲಕ ಜನಾಭಿಪ್ರಾಯ ರೂಪಿಸುವುದು ಸುಲಭ ಸಾಧ್ಯ ಎಂದು ಪಕ್ಷ ಯೋಚಿಸಿದೆ.

ಸಂಶಯಕ್ಕೆ ಕಾರಣಗಳು: ಅನ್ನಭಾಗ್ಯ ಯೋಜನೆಯಡಿ ಕೇಂದ್ರದ ಅಕ್ಕಿಯನ್ನು ಮಾತ್ರ ವಿತರಿಸುತ್ತಿದ್ದು, ಹೆಚ್ಚುವರಿ 5ಕೆಜಿ ಅಕ್ಕಿ ಬದಲು ತಲಾ 170 ರೂ. ಜಮಾ ಮುಂದುವರಿಸಿದೆ. ಅಕ್ಕಿ ಕೊಟ್ಟರೆ ಮಾಸಿಕ ಹೆಚ್ಚುವರಿ 1,000 ಕೋಟಿ ರೂ. ಹೊರೆ ಬೀಳುತ್ತದೆ ಎಂದು ನಗದು ಪಾವತಿಗೆ ಜೋತುಬಿದ್ದಿದೆ. ಗೃಹಲಕ್ಷ್ಮಿ ಯೋಜನೆಯಡಿ ಬಡ ಕುಟುಂಬದ ಮನೆ ಯಜಮಾನಿಗೆ ಮಾಸಿಕ 2,000 ರೂ. ಭತ್ಯೆ ದೊಡ್ಡ ಖರ್ಚಿನ ಬಾಬ್ತು. ತಾಂತ್ರಿಕ ನೆಪವೊಡ್ಡಿ ಲಕ್ಷಾಂತರ ಫಲಾನುಭವಿಗಳಿಗೆ ತಲುಪಿಸದೆ ಸಾಧ್ಯವಾದಷ್ಟು ಹೊರೆ ತಗ್ಗಿಸಿಕೊಳ್ಳುತ್ತಿದೆ.

ಗೃಹಜ್ಯೋತಿ ಯೋಜನೆಯಡಿ ಬಹಳಷ್ಟು ಗ್ರಾಹಕರು ಒಂದಿಲ್ಲೊಂದು ತಿಂಗಳು ಶೂನ್ಯ ಇಲ್ಲವೇ ಕಡಿಮೆ ಮೊತ್ತದ ಬಿಲ್​ನಿಂದ ವಂಚಿತರಾಗುತ್ತಿದ್ದಾರೆ. ವಿದ್ಯುತ್ ಖರೀದಿ ವೆಚ್ಚ ಸರಿದೂಗಿಸಲು ಇಂಧನ ವೆಚ್ಚ ಹೊಂದಾಣಿಕೆ ಹೆಸರಿನಲ್ಲಿ ವಿದ್ಯುತ್ ದರ ಹೆಚ್ಚಿಸಿದೆ. ಹಿಂದಿನ ಸರ್ಕಾರ ಹೊಸ ಬಸ್ ಖರೀದಿಸಲಿಲ್ಲ, ಹುದ್ದೆಗಳನ್ನು ತುಂಬಿಲ್ಲವೆಂಬ ಕಾರಣ ನೀಡಿ 2,800ಕ್ಕೂ ಹೆಚ್ಚು ಶೆಡ್ಯೂಲ್​ಗಳನ್ನು ಕೈಬಿಟ್ಟಿದೆ. ಶಕ್ತಿ ಯೋಜನೆಯ ಹೆಚ್ಚುವರಿ ವೆಚ್ಚದ ಭಾರ ಇಳಿಸಿಕೊಳ್ಳುವ ತಂತ್ರವೆಂದು ಬಿಜೆಪಿ ಅನುಮಾನಿಸಿದೆ.

ಟಿ-20 ಮ್ಯಾಚ್ ಆಡುವ ಜವಾಬ್ದಾರಿ ಪಕ್ಷ ನೀಡಿದೆ

ಮೈಸೂರು: ನನಗೀಗ ಸದ್ಯ ರಾಜಕೀಯದ 20-20 ಮ್ಯಾಚ್ ಆಡುವ ಜವಾಬ್ದಾರಿಯನ್ನು ಪಕ್ಷ ವಹಿಸಿದೆ. ಆ ದೃಷ್ಟಿಯಲ್ಲಿ ಎಲ್ಲ ಕಡೆ ಹೋಗಿ ಪಕ್ಷವನ್ನು ಸಂಘಟಿಸುತ್ತಿದ್ದೇನೆ ಎಂದು ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ವೈ.ವಿಜಯೇಂದ್ರ ಹೇಳಿದರು.ನಗರದಲ್ಲಿ ಭಾನುವಾರ ಸುದ್ದಿಗಾರರೊಂದಿಗೆ ಮಾತನಾಡಿ, ಇಂದು ನಾನು ರಾಜಕೀಯ ಮಾತನಾಡಲ್ಲ, ನಾಳೆ ಸುದ್ದಿಗೋಷ್ಠಿಯಲ್ಲಿ ಮಾತನಾಡುತ್ತೇನೆ ಎಂದರು.ಚಾಮುಂಡಿಬೆಟ್ಟಕ್ಕೆ ತೆರಳಿ ಅಧಿದೇವತೆ ಶ್ರೀ ಚಾಮುಂಡೇಶ್ವರಿ ದೇವಿಯ ದರ್ಶನ ಪಡೆದ ವಿಜಯೇಂದ್ರ, ಸುತ್ತೂರು ಮಠಕ್ಕೆ ಭೇಟಿ ನೀಡಿ ಶ್ರೀ ಶಿವರಾತ್ರಿ ದೇಶಿಕೇಂದ್ರ ಸ್ವಾಮೀಜಿ ಹಾಗೂ ಶ್ರೀ ಅವಧೂತ ದತ್ತ ಪೀಠಕ್ಕೆ ತೆರಳಿ ಶ್ರೀ ಗಣಪತಿ ಸಚ್ಚಿದಾನಂದ ಸ್ವಾಮೀಜಿ ಅವರ ಆಶೀರ್ವಾದ ಪಡೆದರು.

ಕಾರ್ಯತಂತ್ರಗಳೇನು ?

• ಬೂತ್​ಮಟ್ಟದ ಕಾರ್ಯಪಡೆಯಿಂದ ವಸ್ತುಸ್ಥಿತಿ ಪರಾಮರ್ಶೆ, ದತ್ತಾಂಶ ಸಂಗ್ರಹ
• 4 ಗ್ಯಾರಂಟಿಗಳ ಬಗ್ಗೆ ಫಲಾನುಭವಿಗಳೊಂದಿಗೆ ಪ್ರತ್ಯೇಕ ವಿಚಾರ ವಿನಿಮಯ
• ಉಚಿತ ಯೋಜನೆಗಳ ವಿಚಾರದಲ್ಲಿ ಪಕ್ಷದ ನಿಲುವು ಮನವರಿಕೆ, ವಿಶ್ವಾಸ ಗಳಿಕೆ
• ಅಭಿವೃದ್ಧಿ ಕಾರ್ಯ ಸ್ಥಗಿತದಿಂದ ಜನರಲ್ಲಿರುವ ಬೇಸರ ಬಹಿರಂಗೊಳಿಸುವ ಯತ್ನ

ಗ್ಯಾರಂಟಿ ಪ್ರಚಾರಕ್ಕಿಳಿದ ಕಾಂಗ್ರೆಸ್

ಬೆಂಗಳೂರು: ಗ್ಯಾರಂಟಿಗಳ ಅನುಷ್ಠಾನದ ಗೊಂದಲ ಸರಿಪಡಿಸುವ ಜತೆಗೆ ಸರ್ಕಾರದ ಇಮೇಜ್ ಹೆಚ್ಚಿಸಿಕೊಳ್ಳಲು ಕಾಂಗ್ರೆಸ್ ಅಭಿಯಾನ ನಡೆಸಲು ಬಯಸಿದ್ದು, ಯೋಜನೆಗಳು ಜನರಿಗೆ ತಲುಪಿವೆಯೇ ಇಲ್ಲವೇ ಎಂದು ತಿಳಿಯಲು ಪಕ್ಷದ ವತಿಯಿಂದ ಸಮೀಕ್ಷೆ ಮಾಡಲು ಸಮಿತಿ ರಚನೆಗೆ ಮುಂದಾಗಿದೆ.

ಶಕ್ತಿ ಯೋಜನೆ ಹೊರತಾಗಿ ಜಾರಿಯಲ್ಲಿರುವ ಉಳಿದ ಮೂರು ಗ್ಯಾರಂಟಿ ಅನುಷ್ಠಾನಕ್ಕೆ ಸಂಬಂಧಿಸಿದಂತೆ ತಳಮಟ್ಟದಲ್ಲಿ ಒಂದಷ್ಟು ಗೊಂದಲಗಳಿದ್ದು, ಪ್ರತಿಪಕ್ಷಗಳೂ ನಿರಂತರ ವಾಗಿ ಟೀಕಿಸುತ್ತಿವೆ. ಇದನ್ನು ಎದುರಿಸುವ ನಿಟ್ಟಿನಲ್ಲಿ ಪಕ್ಷದ ಕಾರ್ಯಕರ್ತರನ್ನು ಬಳಸಿ ವಾಸ್ತವ ಸಂಗತಿ ಅರಿಯುವ ಜತೆಗೆ ಲೋಕಸಭೆ ಚುನಾವಣೆಗೆ ಒಂದು ಸುತ್ತಿನ ಪ್ರಚಾರ ಮಾಡಲು ಪಕ್ಷ ಉದ್ದೇಶಿಸಿದೆ ಹಾಗೂ ಗ್ಯಾರಂಟಿಗಳ ಸಾಧಕ- ಬಾಧಕಗಳನ್ನು ಖುದ್ದಾಗಿ ತಿಳಿಯುಂತೆ ಸಚಿವರಿಗೆ ಸೂಚನೆ ನೀಡಲಾಗಿದೆ.

ಕಾರ್ಯಕರ್ತರಿಗೆ ಕರೆ: ಕೆಪಿಸಿಸಿ ಕಚೇರಿಯಲ್ಲಿ ನಡೆದ ಮಾಜಿ ಪ್ರಧಾನಿ ಇಂದಿರಾಗಾಂಧಿ ಜನ್ಮದಿನಾಚರಣೆ ಮತ್ತು ಬೆಂಗಳೂರು ನೂತನ ಜಿಲ್ಲಾಧ್ಯಕ್ಷರ ಪದಗ್ರಹಣ ಸಮಾರಂಭದಲ್ಲಿ ಡಿಸಿಎಂ ಡಿ.ಕೆ ಶಿವಕುಮಾರ್ ಮಾತನಾಡಿ, ಲೋಕಸಭೆ ಚುನಾವಣೆಯಲ್ಲಿ ಬಿಜೆಪಿ-ಜೆಡಿಎಸ್​ಗೆ ಮತ ಹಾಕಿದರೆ ಗ್ಯಾರಂಟಿ ಯೋಜನೆಗಳನ್ನು ವಾಪಸ್ ತೆಗದುಕೊಳ್ಳುವಂತಹ ಕಾನೂನು ತರುತ್ತಾರೆ. ಈ ವಿಚಾರಗಳನ್ನು ಕಾಂಗ್ರೆಸ್ ಕಾರ್ಯಕರ್ತರು ಮತ್ತು ನಾಯಕರು ಜನರಿಗೆ ಮನವರಿಕೆ ಮಾಡಿಕೊಡಬೇಕು ಎಂದು ಕಾರ್ಯಕರ್ತರಿಗೆ ಕರೆ ಕೊಟ್ಟರು.

ಡಿಸೆಂಬರ್​ನಲ್ಲಿ ಯುವನಿಧಿ ಜಾರಿ: ಪ್ರಧಾನಿ ಮೋದಿ ಕಾಂಗ್ರೆಸ್ ಗ್ಯಾರಂಟಿಗಳನ್ನು ಕದ್ದು ಪಂಚರಾಜ್ಯಗಳ ಚುನಾವಣೆ ಎದುರಿಸುತ್ತಿದ್ದಾರೆ ಎಂದು ಡಿಸಿಎಂ ಆರೋಪಿಸಿದರು. ಬಿಜೆಪಿ ಮತ್ತು ಜಾ.ಜನತಾದಳದವರು ಗ್ಯಾರಂಟಿಗಳನ್ನು ವಿರೋಧಿಸುವುದನ್ನು ಮತದಾರರಿಗೆ ತಿಳಿಸಬೇಕು. ಯಾವುದೇ ಕಾರಣಕ್ಕೂ ಗ್ಯಾರಂಟಿಗಳನ್ನು ನಿಲ್ಲುಸುವುದಾಗಲಿ, ಕಡಿಮೆ ಮಾಡುವುದಾಗಲಿ ಮಾಡುವುದಿಲ್ಲ ಎಂದು ತಿಳಿಸಿದ ಡಿ.ಕೆ. ಶಿವಕುಮಾರ್, ಡಿಸೆಂಬರ್​ನಲ್ಲಿ 5ನೇ ಗ್ಯಾರಂಟಿ ಯುವನಿಧಿ ಜಾರಿಗೆ ತರಲಾಗುವುದು ಎಂದರು.

ಕೈ ಕಾರ್ಯತಂತ್ರ

• ್ಝಬ್ಲಾಕ್, ಜಿಲ್ಲಾ ಹಾಗೂ ತಾಲೂಕು ಘಟಕದ ಅಧ್ಯಕ್ಷರು, ಕಾರ್ಯಕರ್ತರು ಮತ್ತು ನಾಯಕರು ಬೂತ್​ವುಟ್ಟದಿಂದ ಗ್ಯಾರಂಟಿಗಳ ಸಾಧಕ- ಭಾದಕ ಕಡ್ಡಾಯವಾಗಿ ತಿಳಿದುಕೊಳ್ಳುವುದು.
• ್ಝಜನರಿಗೆ ಆಗುತ್ತಿರುವ ಅನನುಕೂಲ ಮತ್ತು ಅನುಕೂಲ ಎರಡನ್ನೂ ಸರ್ಕಾರದ ಗಮನಕ್ಕೆ ತರುವುದು
• ್ಝಪ್ರತಿ ಕುಟುಂಬಕ್ಕೂ ಮಾಸಿಕ 5000 ರೂ.ಗೂ ಹೆಚ್ಚು ಉಳಿತಾಯ ಆಗಲಿದೆ ಎಂದು ಜನರಿಗೆ ಮನವರಿಕೆ ಮಾಡಿಕೊಡುವುದು.

https://www.vijayavani.net/i-wasnt-invited-for-world-cup-final-kapil-dev

https://www.vijayavani.net/woman-dies-by-suicide-while-on-video-call-with-husband