ಸರ್ಕಾರಕ್ಕೆ ಒತ್ತಡ: ಕಳೆದ ಮೂರು ವರ್ಷಗಳಿಂದ ವಸತಿ ಯೋಜನೆ ಬಹುತೇಕ ಸ್ಥಗಿತವಾಗಿದ್ದು, ಕ್ಷೇತ್ರದ ಜನರ ಆಕ್ರೋಶಕ್ಕೆ ಗುರಿಯಾಗಬೇಕಾಗುತ್ತದೆ ಎಂದು ಆಡಳಿತ ಪಕ್ಷದ ಸದಸ್ಯರು ಆತಂಕ ವ್ಯಕ್ತಪಡಿಸಿದ್ದರು. ಶಾಸಕಾಂಗ ಪಕ್ಷದ ಸಭೆಯಲ್ಲಿ ಈ ವಿಷಯ ಪ್ರಸ್ತಾಪಿಸಿ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿಗೆ ಒತ್ತಡ ಹೇರಿದ್ದರೆ, ವಿಧಾನ ಮಂಡಲದ ಮುಂಗಾರು ಅಧಿವೇಶನದಲ್ಲಿ ಪ್ರತಿಪಕ್ಷಗಳಿಂದ ಒಕ್ಕೊರಲ ಒತ್ತಾಯ ಕೇಳಿಬಂದಿತ್ತು. ಸಿದ್ದರಾಮಯ್ಯ ನೇತೃತ್ವದ ಕಾಂಗ್ರೆಸ್ ಆಡಳಿತಾವಧಿಯಲ್ಲಿ ವಸತಿ ಯೋಜನೆಗೆ 3,000 ಕೋಟಿ ರೂ. ಮೀಸಲಿಟ್ಟರೆ, 29,000 ಕೋಟಿ ರೂ. ವೆಚ್ಚದ ಮನೆಗಳು ಮಂಜೂರು ಮಾಡಿದ್ದು ಈ ಸಮಸ್ಯೆಯ ಮೂಲವೆಂದು ಅಧಿವೇಶನದಲ್ಲಿ ಸರ್ಕಾರ ಪರೋಕ್ಷವಾಗಿ ಪ್ರಸ್ತಾಪಿಸಿದರೆ, ಜೆಡಿಎಸ್ ನೇರವಾಗಿ ತಿವಿದಿತ್ತು. ಅಪೂರ್ಣ ಮನೆಗಳು ಲಾಕ್, ತಾಂತ್ರಿಕ ಮತ್ತು ಫಲಾನುಭವಿಗಳ ನಿರಾಸಕ್ತಿಯಿಂದ ರದ್ದಾಗಿದ್ದರೆ, ಅನುದಾನದ ಅಲಭ್ಯತೆಯಿಂದ ಸರ್ಕಾರ ಸುಸ್ತಾಗಿತ್ತು. ಆರ್ಥಿಕ ಪರಿಸ್ಥಿತಿ ಚೇತರಿಸಿಕೊಂಡ ಬಳಿಕ ಲಭ್ಯ ಅನುದಾನದಂತೆ ವಸತಿ ಯೋಜನೆಗೆ ಮತ್ತೆ ಚಾಲನೆ ನೀಡಿದ್ದು, ಬೇಡಿಕೆ ಅಪಾರವಾಗಿದ್ದರೂ ನಾಲ್ಕು ಲಕ್ಷ ಮನೆಗಳ ನಿರ್ಮಾಣಕ್ಕೆ ಮುಂದಾಗಿದೆ.
