ದುಪ್ಪಟ್ಟುಗೊಂಡ ಚಿನ್ನದ ಆಮದು ಪ್ರಮಾಣ; ಆಗಸ್ಟ್​ನಲ್ಲಿ 121 ಟನ್ ಚಿನ್ನ ಆಮದು ಬೆಲೆಯೂ ಇಳಿಕೆ, ಹಬ್ಬದ ಸೀಸನ್​ಗೆ ಹೆಚ್ಚಿದ ಬೇಡಿಕೆ

ಮುಂಬೈ: ಭಾರತದಲ್ಲಿ ಚಿನ್ನದ ವಹಿವಾಟು ಚುರುಕುಗೊಂಡಿದ್ದು, ಕಳೆದ ವರ್ಷದ ಆಗಸ್ಟ್​ಗೆ ಹೋಲಿಕೆ ಮಾಡಿದರೆ ಈ ವರ್ಷದ ಆಗಸ್ಟ್ ತಿಂಗಳಲ್ಲಿ ಚಿನ್ನದ ಆಮದು ದುಪ್ಪಟ್ಟುಗೊಂಡಿದೆ. ಚಿನ್ನದ ಬೆಲೆಯೂ ಇಳಿಕೆಯಾಗಿದ್ದು, ಮುಂಬರುವ ಹಬ್ಬಗಳ ಸೀಸನ್ ಹಿನ್ನೆಲೆಯಲ್ಲಿ ಆಭರಣಗಳಿಗೆ ಬೇಡಿಕೆ ಹೆಚ್ಚಾಗುತ್ತಿದೆ. ಈ ಹಿನ್ನೆಲೆಯಲ್ಲಿ ಆಭರಣ ತಯಾರಕರು ದೊಡ್ಡ ಪ್ರಮಾಣದಲ್ಲಿ ಚಿನ್ನವನ್ನು ಖರೀದಿ ಮಾಡುತ್ತಿದ್ದಾರೆ.

ಭಾರತದ ವಿಶ್ವದಲ್ಲೇ ಚಿನ್ನವನ್ನು ಅತಿಹೆಚ್ಚಿನ ಪ್ರಮಾಣದಲ್ಲಿ ಆಮದು ಮಾಡಿಕೊಳ್ಳುವ ಎರಡನೇ ರಾಷ್ಟ್ರವಾಗಿದೆ. ಜಾಗತಿಕ ಮಾರುಕಟ್ಟೆಯಲ್ಲಿ ಚಿನ್ನ ಸಾರ್ವಕಾಲಿಕ ಗರಿಷ್ಠಮಟ್ಟದಿಂದ ಶೇ. 12 ಇಳಿಕೆ ದಾಖಲಿಸಿದೆ. ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ 2072 ಡಾಲರ್​ಗೆ ಮಾರಾಟವಾಗುತ್ತಿದೆ. ಭಾರತ ಕಳೆದ ವರ್ಷ ಆಗಸ್ಟ್ ತಿಂಗಳಲ್ಲಿ 63 ಟನ್ ಚಿನ್ನವನ್ನು ಆಮದು ಮಾಡಿಕೊಂಡಿತ್ತು. ಆದರೆ ಈ ವರ್ಷದ ಆಗಸ್ಟ್​ನಲ್ಲಿ 121 ಟನ್ ಆಮದು ಮಾಡಿಕೊಂಡಿದೆ. ಹೆಚ್ಚಿನ ಪ್ರಮಾಣದಲ್ಲಿ ಚಿನ್ನ ಆಮದು ಮಾಡಿಕೊಳ್ಳುವ ಕಾರಣ ರುಪಾಯಿ ಮೌಲ್ಯದ ಮೇಲೂ ಪರಿಣಾಮ ಆಗಬಹುದು ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಚಿನ್ನ ಇಳಿಕೆ, ಬೆಳ್ಳಿ ಏರಿಕೆ: ಚಿನಿವಾರ ಪೇಟೆಯಲ್ಲಿ ಚಿನ್ನದ ದರ ಪ್ರತಿ 10 ಗ್ರಾಂಗೆ 71 ರೂ. ಇಳಿಕೆ ಕಂಡಿದ್ದು, 46,503 ರೂ. ಆಗಿದೆ. ಚಿನ್ನ ಪ್ರತಿ ಕೆಜಿಗೆ 263 ರೂ. ಏರಿಕೆ ಕಂಡಿದ್ದು, 64,168 ರೂ. ತಲುಪಿದೆ.

ಸಾರ್ವಕಾಲಿಕ ಎತ್ತರಕ್ಕೆ ಷೇರುಪೇಟೆ: ಸೆನ್ಸೆಕ್ಸ್ 166 ಅಂಕ ಏರಿಕೆ ಕಂಡಿದ್ದು, ಭಾರತೀಯ ಷೇರು ಸೂಚ್ಯಂಕ ಸಾರ್ವಕಾಲಿಕ ಎತ್ತರಕ್ಕೆ ತಲುಪಿದೆ. ಸೆನ್ಸೆಕ್ಸ್ 58,296ಕ್ಕೆ ಏರಿಕೆಯಾಗಿದ್ದರೆ, ನಿಫ್ಟಿ 54 ಅಂಕ ಏರಿಕೆ ಕಂಡು 17,377.80ಕ್ಕೆ ಹೆಚ್ಚಳವಾಗಿದೆ. ರಿಲಯನ್ಸ್ ಇಂಡಸ್ಟ್ರೀಸ್, ಇಸ್ಪೋಸಿಸ್, ಎಚ್​ಸಿಎಲ್ ಟೆಕ್, ಟೆಕ್ ಮಹಿಂದ್ರಾ, ಬಜಾಜ್ ಆಟೋ ಷೇರುಗಳಲ್ಲಿ ಏರಿಕೆ ಕಂಡುಬಂತು. ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು ದೊಡ್ಡ ಪ್ರಮಾಣದಲ್ಲಿ ಷೇರುಗಳನ್ನು ಖರೀದಿ ಮಾಡುತ್ತಿರುವುದು ಗಮನಾರ್ಹ.

https://www.vijayavani.net/mbbs-student-lost-her-life-while-taking-bath/

https://www.vijayavani.net/man-is-beaten-by-the-person-who-got-upset-from-wifes-defeat/