ನಾರಿಯರ ಚೆಲ್ಲಾಟ, ಕಂಡಕ್ಟರ್​ಗೆ ಸಂಕಷ್ಟ: ಇಷ್ಟ ಬಂದಲ್ಲಿ ಇಳಿಯುತ್ತಿರುವ ಮಹಿಳೆಯರು; ಕೆಎಸ್​ಆರ್​ಟಿಸಿ ನೌಕರರಿಗೆ ಕುತ್ತು

| ನಿತ್ಯಾನಂದ ಶಿವಗಂಗೆ ಚಿಕ್ಕಮಗಳೂರು

ಶಕ್ತಿ ಯೋಜನೆಯಡಿ ಕೆಎಸ್​ಆರ್​ಟಿಸಿ ಬಸ್​ಗಳಲ್ಲಿ ಉಚಿತ ವಾಗಿ ಪ್ರಯಾಣಿಸುತ್ತಿರುವ ಮಹಿಳೆಯರು ಟಿಕೆಟ್ ಪಡೆದ ಊರಿನಲ್ಲಿ ಬಸ್​ನಿಂದ ಇಳಿಯದೆ ಮಾರ್ಗ ಮಧ್ಯದಲ್ಲೇ ಇಳಿದು ಹೋಗುತ್ತಿದ್ದಾರೆ. ಮಹಿಳೆಯರ ಈ ನಡೆ ಕಂಡಕ್ಟರ್​ಗಳ ಉದ್ಯೋಗಕ್ಕೆ ಕಂಟಕವಾಗಿ ಪರಿಣಮಿಸಿದ್ದು, ಮಾಡದ ತಪ್ಪಿಗೆ ಅಮಾನತು, ಮುಂಬಡ್ತಿ ತಡೆ, ವರ್ಗಾವಣೆ ಹೀಗೆ ನಾನಾ ಶಿಕ್ಷೆಗಳಿಗೆ ಗುರಿಯಾಗುತ್ತಿದ್ದಾರೆ.

ಯಾವ ಊರಿಗೆ ಹೋಗಬೇಕೆಂದು ಮಹಿಳೆಯರು ಟಿಕೆಟ್ ಪಡೆಯುತ್ತಾರೆಯೋ ಆ ಊರಿಗೆ ಹೋಗುವ ಮೊದಲೇ ಮಹಿಳೆಯರು ಬಸ್​ನಿಂದ ಇಳಿದು ಹೋಗುತ್ತಿದ್ದಾರೆ. ಈ ವೇಳೆ ಚೆಕ್ಕಿಂಗ್​ಗೆ ಬರುವ ಇನ್ಸ್​ಪೆಕ್ಟರ್​ಗಳು ಟಿಕೆಟ್ ವಿತರಣೆಯಾದಷ್ಟು ಜನ ಬಸ್​ನಲ್ಲಿ ಇಲ್ಲ ಎಂದು ಕಂಡಕ್ಟರ್​ಗಳಿಗೆ ಆಪಾದನಾ ಪತ್ರ ನೀಡುತ್ತಾರೆ. ಜತೆಗೆ ಕೆಎಸ್​ಆರ್​ಟಿಸಿ ಡಿಸಿಗಳಿಗೆ ವರದಿ ನೀಡುತ್ತಿದ್ದಾರೆ. ಈ ವರದಿಯನ್ನು ಆಧರಿಸಿ ಕೆಎಸ್​ಆರ್​ಟಿಸಿ ಡಿಸಿ ಕಂಡಕ್ಟರ್​ಗಳ ವಿರುದ್ಧ ಕ್ರಮ ಕೈಗೊಳ್ಳುತ್ತಿದ್ದಾರೆ. ಬಸ್ ಚೆಕ್ಕಿಂಗ್ ವೇಳೆ ಟಿಕೆಟ್ ನೀಡಿದಷ್ಟು ಪ್ರಯಾಣಿಕರು ಬಸ್​ನಲ್ಲಿ ಇಲ್ಲದಿದ್ದರೆ ಕಂಡಕ್ಟರ್ ವಿರುದ್ಧ ಔಟ್​ಸ್ಟ್ಯಾಂಡಿಂಗ್ ಕೇಸ್ ಹಾಗೂ ರೆಡ್​ವಾರ್ಕ್ ಕೇಸ್ ದಾಖಲಾಗುತ್ತದೆ. 80 ರೂ. ಟಿಕೆಟ್ ಪಡೆದ ಮಹಿಳೆಯರು ಬಸ್​ನಿಂದ ಇಳಿದು ಹೋಗಿದ್ದರೆ ಕಂಡಕ್ಟರ್​ಗಳ ಮೇಲೆ ರೆಡ್​ವಾರ್ಕ್ ಕೇಸ್ ದಾಖಲು ಮಾಡಲಾಗುತ್ತದೆ. 126 ರೂ. ಹಾಗೂ ಮೇಲ್ಪಟ್ಟ ಟಿಕೆಟ್ ಪಡೆದವರು ಬಸ್​ನಿಂದ ಇಳಿದುಹೋಗಿದ್ದರೆ ಔಟ್​ಸ್ಟ್ಯಾಂಡಿಂಗ್ ಕೇಸ್ ದಾಖಲಿಸಲಾಗುತ್ತದೆ.

ಔಟ್​ಸ್ಟ್ಯಾಂಡಿಂಗ್ ಕೇಸ್ ದಾಖಲಾದ ಕಂಡಕ್ಟರ್ ಅನ್ನು ಆತ ಕಾರ್ಯನಿರ್ವಹಿಸುತ್ತಿದ್ದ ಡಿಪೋದಿಂದ ಬೇರೆ ಡಿಪೋಗೆ ವರ್ಗಾವಣೆ ಮಾಡಲಾಗುತ್ತದೆ. ಜತೆಗೆ ಇನ್ಕ್ರಿಮೆಂಟ್ ಕಟ್ ಹಾಗೂ ಅಮಾನತು ಶಿಕ್ಷೆಯೂ ಇದೆ. ರೆಡ್​ವಾರ್ಕ್ ಕೇಸ್ ದಾಖಲಾದ ಕಂಡಕ್ಟರ್​ಗಳಿಗೆ ಅವರೇ ಒಂದು ಮಾರ್ಗ ಆಯ್ಕೆಮಾಡಿಕೊಳ್ಳಲು ಅವಕಾಶ ಇರುವುದಿಲ್ಲ. ಬದಲಿಗೆ ಅಧಿಕಾರಿಗಳು ಹೇಳಿದ ಮಾರ್ಗಗಳಲ್ಲೇ ಕೆಲಸ ಮಾಡಬೇಕು. ಯಾವ ವೇಳೆಗೆ ಕೆಲಸಕ್ಕೆ ಕರೆದರೂ ಹೋಗಬೇಕು. ಇದರೊಂದಿಗೆ ಮುಂಬಡ್ತಿ ತಡೆ ಹಾಗೂ ವರ್ಗಾವಣೆ ಶಿಕ್ಷೆಯನ್ನೂ ಅನುಭವಿಸಬೇಕಿದೆ.

ಮಧ್ಯದಲ್ಲೇ ಇಳಿಯಲು ಕಾರಣ ಹಲವು: ಮಹಿಳೆಯರು ಮಧ್ಯದಲ್ಲೇ ಬಸ್ ಇಳಿಯುತ್ತಿರುವುದು ಏಕೆ ಎಂಬ ಪ್ರಶ್ನೆಗೆ ಕೆಎಸ್​ಆರ್​ಟಿಸಿ ಸಿಬ್ಬಂದಿಗೆ ಕುತೂಹಲದ ಉತ್ತರಗಳು ಸಿಗುತ್ತಿವೆ. ಓರ್ವ ಮಹಿಳೆ ಒಂದು ಊರಿಗೆ ಹೊರಟಾಗ ಹಿಂದಿನ ಬಸ್​ನಲ್ಲಿ ಆಕೆಯ ಸ್ನೇಹಿತೆಯೋ ಅಥವಾ ಸಂಬಂಧಿಯೋ ಬರುತ್ತಿರುವುದಾಗಿ ಫೋನ್ ಮಾಡಿದರೆ ತಕ್ಷಣ ಆ ಮಹಿಳೆ ಮುಂದಿನ ಬಸ್ ನಿಲ್ದಾಣದಲ್ಲಿಯೇ ಇಳಿಯುತ್ತಾರೆ. ಶಕ್ತಿ ಯೋಜನೆ ಜಾರಿಯಾದ ಬಳಿಕ ತೀರ್ಥ ಕ್ಷೇತ್ರಗಳಿಗೆ ಟಿಕೆಟ್ ಪಡೆಯುವ ಮಹಿಳೆಯರು ಬಸ್​ನಲ್ಲಿ ಯಾರಾದರೂ ಮಾರ್ಗಮಧ್ಯೆ ಇನ್ನೊಂದು ಪುಣ್ಯ ಕ್ಷೇತ್ರವಿದೆ ಎಂದು ಹೇಳಿದರೆ ಟಿಕೆಟ್ ಖರೀದಿಸಿದ ಕ್ಷೇತ್ರಕ್ಕೆ ತೆರಳದೆ ಮಾರ್ಗಮಧ್ಯವಿರುವ ಕ್ಷೇತ್ರದಲ್ಲಿ ಇಳಿದು ಅಲ್ಲಿಗೆ ಹೋಗಿ ಬಳಿಕ ಬೇರೆ ಬಸ್​ನಲ್ಲಿ ಮುಂದಿನ ತೀರ್ಥ ಕ್ಷೇತ್ರಕ್ಕೆ ಸಾಗುತ್ತಿದ್ದಾರೆ.

ಇನ್ನು ತಾವೂ ಹತ್ತಿದ ಬಸ್ ವೇಗವಾಗಿ ಹೋಗುತ್ತಿಲ್ಲ ಎಂಬುದು ತಿಳಿದುಬಂದರೆ, ದೂರದ ಊರಿಗೆ ಸಂಚರಿಸುವ ಬಸ್​ಗಳು ಊಟ, ತಿಂಡಿ, ಟೀ ಕುಡಿಯಲು ಮಾರ್ಗ ಮಧ್ಯೆ ಬಸ್ ನಿಲ್ಲಿಸಿದಾಗ ಕಾಲು ಗಂಟೆ, ಅರ್ಧ ಗಂಟೆ ಸಮಯ ವ್ಯರ್ಥ ಮಾಡುವುದು ಏಕೆಂದು ಭಾವಿಸುವ ಮಹಿಳೆಯರು ಬೇರೆ ಬಸ್ ಹತ್ತಿ ಹೋಗುತ್ತಿದ್ದಾರೆ.

ಕಂಟ್ರೋಲರ್​ಗೆ ರಿಪೋರ್ಟ್ ಮಾಡಿ: ಬಸ್ ಹತ್ತುವ ಮಹಿಳೆಯರು ಮಾರ್ಗಮಧ್ಯೆ ಇಳಿದು ಹೋದರೆ ಎಷ್ಟು ಜನ ಇಳಿದು ಹೋಗಿದ್ದಾರೆ ಎಂಬುದು ಇಟಿಎಂ ಯಂತ್ರದಲ್ಲಿ ಗೊತ್ತಾಗುತ್ತದೆ. ಆಗ ಎಷ್ಟು ಮಂದಿ ಇಳಿದುಹೋದರು ಎಂಬುದನ್ನು ಎಂಟ್ರಿ ಶೀಟ್​ನಲ್ಲಿ ದಾಖಲು ಮಾಡಿ ಮುಂದಿನ ಬಸ್ ನಿಲ್ದಾಣದ ಕಂಟ್ರೋಲರ್ ಬಳಿ ಅಪ್ರೂವಲ್ ಪಡೆಯಿರಿ ಎಂದು ಕಂಡೆಕ್ಟರ್​ಗಳಿಗೆ ಸೂಚನೆ ನೀಡಲಾಗಿದೆ. ಆದರೆ ಮುಂದಿನ ನಿಲ್ದಾಣ ಬರುವ ಮೊದಲೇ ಚೆಕ್ಕಿಂಗ್ ಇನ್ಸ್​ಪೆಕ್ಟರ್​ಗಳು ಬಂದಾಗ ಕಂಡಕ್ಟರ್​ಗಳು ಬಲಿಪಶುವಾಗುತ್ತಿದ್ದಾರೆ.

ಭರ್ತಿಯಾಗುತ್ತಿವೆ ಬಸ್: ಶಕ್ತಿ ಯೋಜನೆ ಜಾರಿಗೆ ಬಂದ ಬಳಿಕ ಕೆಎಸ್​ಆರ್​ಟಿಸಿ ಬಸ್​ಗಳು ಪ್ರಯಾಣಿಕರಿಂದ ಭರ್ತಿಯಾಗುತ್ತಿವೆ. 54 ಪ್ರಯಾಣಿಕರ ಸಾಮರ್ಥ್ಯದ ಬಸ್​ಗಳಲ್ಲಿ ಬರೋಬ್ಬರಿ 100 ಮಂದಿ ಪ್ರಯಾಣ ಮಾಡುತ್ತಿದ್ದಾರೆ. ಇದರಿಂದಾಗಿ ಒಂದು ಸ್ಟೇಜ್​ನಿಂದ ಇನ್ನೊಂದು ಸ್ಟೇಜ್ ತಲುಪುವ ಮುನ್ನವೇ ಟಿಕೆಟ್ ವಿತರಣೆ ಮಾಡುವುದು ಕಂಡಕ್ಟರ್​ಗಳಿಗೆ ಕಷ್ಟ ಸಾಧ್ಯವಾಗಿದೆ. ಇದರ ಮಧ್ಯೆ ಮಹಿಳೆಯರು ಮಾರ್ಗ ಮಧ್ಯದಲ್ಲಿ ಇಳಿಯದಂತೆ ತಡೆಯುವುದೂ ಸವಾಲಿನ ಕೆಲಸವಾಗಿದೆ. ತುಂಬಿರುವ ಬಸ್​ಗಳಲ್ಲಿ ಯಾರು ಎಲ್ಲಿ ಇಳಿದರು ಎಂಬುದೇ ಗೊತ್ತಾಗಲ್ಲ ಎನ್ನುತ್ತಾರೆ ಕೆಎಸ್​ಆರ್​ಟಿಸಿ ಕಂಡಕ್ಟರ್​ಗಳು.

https://www.vijayavani.net/world-cup-cricket-google-said-indias-victory-as-copy-paste

https://www.vijayavani.net/electricity-bill-is-2247-rupees-despite-house-being-closed-for-16-days