ಸ್ವಸಹಾಯ ಗುಂಪುಗಳ ಮಹಿಳೆಯರನ್ನು ಸಾಮಾಜಿಕ ಬದಲಾವಣೆಗೂ ಬಳಸಿಕೊಳ್ಳಲು ನಿರ್ಧರಿಸಲಾಗಿದೆ. ಪ್ರತಿ ಗ್ರಾಪಂಗಳಿಗೆ ಇಬ್ಬರು ಸಖಿಯರನ್ನು ನೇಮಕ ಮಾಡಲಾಗುತ್ತದೆ. ಒಬ್ಬರು ಬ್ಯಾಂಕಿಂಗ್ ಕರೆಸ್ಪಾಂಡೆನ್ಸ್ ಸಖಿಯಾದರೆ, ಇನ್ನೊಬ್ಬರು ಡಿಜಿಟಲ್ ಸಖಿಯಾಗಿರುತ್ತಾರೆ. ಆ ಮೂಲಕ ಅವರಿಗೆ ಸ್ವ ಉದ್ಯೋಗ ಒದಗಿಸಿದಂತಾಗುತ್ತದೆ. ವರದಕ್ಷಿಣೆ, ಲೈಂಗಿಕ ಕಿರುಕುಳ, ಬಾಲ್ಯ ವಿವಾಹಗಳ ಬಗ್ಗೆ ಜಾಗೃತಿ ಮೂಡಿಸುವುದು, ಎಲ್ಲರನ್ನು ಆರ್ಥಿಕವಾಗಿ ಒಳಗೊಳ್ಳುವಂತೆ ಮಾಡಲು ಉಳಿತಾಯ, ಬ್ಯಾಂಕ್ ಜಾಗೃತಿ, ಸಾಲ ಪಡೆಯುವಿಕೆ ಬಗ್ಗೆ ಅರಿವು ಮೂಡಿಸುವ ಕೆಲಸವನ್ನು ಡಿಜಿಟಲ್ ಸಖಿ ಮಾಡಲಿದ್ದಾರೆ. ಬ್ಯಾಂಕಿಂಗ್ ಕರೆಸ್ಪಾಂಡೆನ್ಸ್ ಸಖಿ ಇಂಡಿಯನ್ ಇನ್ಸ್ಸ್ಟಿಟ್ಯೂಟ್ ಆಫ್ ಬ್ಯಾಂಕಿಂಗ್ ಮೂಲಕ ಅರ್ಜಿ ಹಾಕಿಸಿ ಸಾಲ ಕೊಡಿಸುವುದು, ವಿಮೆ ಮಾಡಿಸುವುದು, ಬ್ಯಾಂಕಿನ ಸೌಲಭ್ಯಗಳನ್ನು ಪಡೆಯುವಂತೆ ಮಾಡುವ ಕಾರ್ಯ ಮಾಡಲಿದ್ದಾರೆ. ಡೈರಿಗೆ ಹಾಲು ಹಾಕಿಸಿ ಹಣ ಕೊಡಿಸುವುದು, ಆಧಾರ್ ಆಧಾರಿತ ಸೌಲಭ್ಯ ದೊರಕಿಸಿಕೊಡುವುದು, ನರೇಗಾ ಕೂಲಿ ಸಿಗುವಂತೆ ಮಾಡುವುದು ಹೀಗೆ ವಿವಿಧ ಕೆಲಸ ನಿಗದಿ ಮಾಡಲಾಗುತ್ತದೆ. ಮಾರ್ಚ್ ಅಂತ್ಯದೊಳಗೆ 3000 ಜನರನ್ನು ನೇಮಕ ಮಾಡಲಾಗುತ್ತದೆ. ಇವರು ತಮ್ಮ ಸೇವೆಗೆ ಶುಲ್ಕ ಪಡೆಯಬೇಕು. ಸರ್ಕಾರದಿಂದ ಗೌರವಧನ ಇರುವುದಿಲ್ಲ. ಆದರೆ ಸುಮಾರು 12 ಸಾವಿರಕ್ಕೂ ಹೆಚ್ಚು ಜನರಿಗೆ ಸ್ವ ಉದ್ಯೋಗ ಸಿಕ್ಕಂತೆ ಆಗುತ್ತದೆ.
