ಸಂವಿಧಾನ ಸಂಘ ಕಾ ವಿಧಾನ ಅಲ್ಲ: ‘ಭಾರತ್ ಕಾ ಸಂವಿಧಾನ್’ ಎಂದರೆ ಅದು ‘ಸಂಘ ಕಾ ವಿಧಾನ ಅಲ್ಲ’ ಎಂಬುದನ್ನು ಪ್ರಧಾನಿ ನರೇಂದ್ರ ಮೋದಿ ಅರ್ಥ ಮಾಡಿಕೊಂಡಿಲ್ಲ ಎಂದು ಕಾಂಗ್ರೆಸ್ ನಾಯಕಿ, ವಯನಾಡ್ ಸಂಸದೆ ಪ್ರಿಯಾಂಕಾ ಗಾಂಧಿ ವಾದ್ರಾ ಲೋಕಸಭೆಯ ತಮ್ಮ ಚೊಚ್ಚಲ ಭಾಷಣದಲ್ಲಿ ವಾಗ್ದಾಳಿ ನಡೆಸಿದ್ದಾರೆ. ಲೋಕಸಭೆ ಚುನಾವಣೆ ಫಲಿತಾಂಶ ಹೊರಬೀಳದೇ ಇದ್ದಿದ್ದರೆ ಆಡಳಿತ ಪಕ್ಷ ಸಂವಿಧಾನ ಬದಲಿಸಲು ಆರಂಭಿಸುತ್ತಿತ್ತು. ಸಂವಿಧಾನವನ್ನು ನ್ಯಾಯ, ಏಕತೆ ಮತ್ತು ಅಭಿವ್ಯಕ್ತಿ ಸ್ವಾತಂತ್ರ್ಯದ ‘ಸುರಕ್ಷಾ ಕವಚ’ ಎಂದ ಪ್ರಿಯಾಂಕಾ, ಬಿಜೆಪಿ ನೇತೃತ್ವದ ಸರ್ಕಾರ ಕಳೆದ 10 ವರ್ಷಗಳಲ್ಲಿ ಇವೆಲ್ಲವನ್ನೂ ಮುರಿಯಲು ಯತ್ನಿಸಿದೆ ಎಂದು ಕಿಡಿಕಾರಿದರು. ತಮ್ಮ 32 ನಿಮಿಷಗಳ ಭಾಷಣದಲ್ಲಿ, ಸಂವಿಧಾನ ಬದಲಾಯಿಸುವ ಯತ್ನ, ಅದಾನಿ ಗ್ರೂಪ್ನ ಬೆಳೆಯುತ್ತಿರುವ ಏಕಸ್ವಾಮ್ಯ, ಮಹಿಳೆಯರ ಮೇಲಿನ ದೌರ್ಜನ್ಯ, ಸಂಭಾಲ್ ಮತ್ತು ಮಣಿಪುರ ಹಿಂಸಾಚಾರ ಘಟನೆಗಳಿಗೆ ಬಿಜೆಪಿಯನ್ನು ಗುರಿಯಾಗಿಸಿದ ಪ್ರಿಯಾಂಕಾ, ರಾಷ್ಟ್ರವ್ಯಾಪಿ ಜಾತಿ ಜನಗಣತಿಯ ಬೇಡಿಕೆಯನ್ನು ಪುನರುಚ್ಚರಿಸಿದರು.
