ಕುಂಭ ಮೇಳದ ವೇಳೆ ನಕಲಿ ಕರೊನಾ ಪರೀಕ್ಷಾ ವರದಿ : ತನಿಖೆ ಆರಂಭ

ಹರಿದ್ವಾರ : ಉತ್ತರಾಖಂಡದ ಹರಿದ್ವಾರದಲ್ಲಿ ಕಳೆದ ಏಪ್ರಿಲ್​ನಲ್ಲಿ ನಡೆದ ಕುಂಭ ಮೇಳದ ಸಂದರ್ಭದಲ್ಲಿ ಖಾಸಗಿ ಲ್ಯಾಬ್​ಗಳು ಸುಮಾರು 1 ಲಕ್ಷಕ್ಕೂ ಹೆಚ್ಚು ನಕಲಿ ವರದಿಗಳನ್ನು ನೀಡಿರಬಹುದು ಎಂದು ರಾಜ್ಯ ಆರೋಗ್ಯ ಇಲಾಖೆ ಅನುಮಾನ ವ್ಯಕ್ತಪಡಿಸಿದೆ. ಈ ಹಿನ್ನೆಲೆಯಲ್ಲಿ ಮೇಳದ ಸಮಯದಲ್ಲಿ ಕರೊನಾ ಪರೀಕ್ಷೆಗಳನ್ನು ಮಾಡುವ ಜವಾಬ್ದಾರಿ ವಹಿಸಿಕೊಂಡಿದ್ದ ಖಾಸಗಿ ಲ್ಯಾಬ್​ಗಳ ವಿರುದ್ಧ ಹರಿದ್ವಾರ ಜಿಲ್ಲಾಡಳಿತಕ್ಕೆ ಪ್ರಕರಣ ದಾಖಲಿಸುವಂತೆ ರಾಜ್ಯ ಸರ್ಕಾರ ಸೂಚನೆ ನೀಡಿದೆ ಎನ್ನಲಾಗಿದೆ.

ಕುಂಭ ಮೇಳದ ಸಮಯದಲ್ಲಿ ಪ್ರತಿದಿನ 50,000 ಕರೊನಾ ಟೆಸ್ಟ್​ಗಳನ್ನು ನಡೆಸಬೇಕೆಂದು ಹೈಕೋರ್ಟ್​ ಆದೇಶಿಸಿದ್ದ ಹಿನ್ನೆಲೆಯಲ್ಲಿ, ನಿತ್ಯದ ಖೋಟಾ ಈಡೇರಿಸಲು ಪರೀಕ್ಷೆಯಿಲ್ಲದೆ ನಕಲಿ ಫಲಿತಾಂಶಗಳನ್ನು ನೀಡಿರಬಹುದು ಎಂದು ಭಾವಿಸಲಾಗಿದೆ. ಜಿಲ್ಲಾ ಆರೋಗ್ಯ ಇಲಾಖೆಯು 22 ಖಾಸಗಿ ಲ್ಯಾಬ್​ಗಳಿಗೆ ಈ ಕೆಲಸ ನೀಡಿದ್ದು, ಹಲವು ಲ್ಯಾಬ್​ಗಳು ವಿವಿಧ ಜನರ ಐಡಿ ಕಾರ್ಡ್​ ಮತ್ತು ಫೋನ್​ ನಂಬರ್​ಗಳನ್ನು ನಮೂದಿಸಿ ನಕಲಿ ವರದಿಗಳನ್ನು ನೀಡಿವೆ ಎಂದು ಪ್ರಾಥಮಿಕ ವರದಿ ಬಂದಿದೆ. ಈ ನಿಟ್ಟಿನಲ್ಲಿ ವಿವರವಾದ ತನಿಖೆಯನ್ನು ಕಳೆದ ವಾರ ಜಿಲ್ಲಾಡಳಿತ ಆದೇಶಿಸಿದೆ ಎನ್ನಲಾಗಿದೆ.

ಇದನ್ನೂ ಓದಿ: ಚೆನ್ನೈ ಬಿಟ್ಟು ಹೈದರಾಬಾದ್​ಗೆ ಹೊರಟು ನಿಂತ್ರು ಕಮಲ್ ಹಾಸನ್, ಸೂರ್ಯ, ಕಾರ್ತಿ

ಕುಂಭ ಮೇಳ ನಿರ್ವಹಣಾ ಮಂಡಳಿಯೂ ಮತ್ತೊಂದು ಆಂತರಿಕ ತನಿಖೆ ಆದೇಶಿಸಿದ್ದು, ಖಾಸಗಿ ಲ್ಯಾಬ್​ಗಳ ಕಾರ್ಯವೈಖರಿ ಪರಿಶೀಲಿಸಲು ಸಮಿತಿಯೊಂದನ್ನು ರಚಿಸಿದೆ. “ಮೇಳ ಆಡಳಿತವು ಸೂಚಿಸಿದ ಒಟ್ಟು 2,51,457 ಜನರನ್ನು 11 ಲ್ಯಾಬ್​ಗಳು ಪರೀಕ್ಷೆ ಮಾಡಿವೆ. ಅದರಲ್ಲಿ 2,07,159 ಆ್ಯಂಟಿಜನ್ ಟೆಸ್ಟ್​ಗಳಾಗಿದ್ದವು ಮತ್ತು 44,278 ಆರ್​ಟಿಪಿಸಿಆರ್​ ಟೆಸ್ಟ್​ಗಳಾಗಿದ್ದವು. 2 ಲಕ್ಷಕ್ಕಿಂತ ಹೆಚ್ಚು ಆ್ಯಂಟಿಜನ್ ಟೆಸ್ಟ್​ ಮಾಡಿದ್ದರೂ ಕೇವಲ 1,023 ಜನರಿಗೆ ಪಾಸಿಟೀವ್ ಬಂದಿತ್ತು. ಕೇವಲ 1,250 ಆರ್​ಟಿಪಿಸಿಆರ್​ ಪಾಸಿಟೀವ್ ವರದಿಗಳು ಬಂದಿದ್ದವು. ಉಳಿದವೆಲ್ಲ ನೆಗೆಟೀವ್ ಬಂದಿತ್ತು" ಎಂದು ಮಹಾಕುಂಭ ಮೇಳದ ಆರೋಗ್ಯ ಅಧಿಕಾರಿ ಡಾ. ಅರ್ಜುನ್ ಸಿಂಗ್ ಸೇನ್ಗರ್​ ವಿವರಿಸಿದ್ದಾರೆ. (ಏಜೆನ್ಸೀಸ್)

https://www.vijayavani.net/cheating-over-credit-cards-fake-call-centre-busted/

https://www.vijayavani.net/twitter-loses-legal-indemnity-over-non-compliance-to-it-rules/