ವಾಷಿಂಗ್ಟನ್: ಅಮೆರಿಕದ ಹಣಕಾಸು ಇಲಾಖೆ ಭಾರತಸಹಿತ ಐದು ಪ್ರಮುಖ ವಾಣಿಜ್ಯ ಪಾಲುದಾರ ರಾಷ್ಟ್ರಗಳನ್ನು ಕರೆನ್ಸಿ ಕಣ್ಗಾವಲು ಪಟ್ಟಿಯಿಂದ (ಸಿಎಂಎಲ್) ತೆಗೆದು ಹಾಕಿದೆ. ಇಟಲಿ, ಮೆಕ್ಸಿಕೋ, ಥಾಯ್ಲೆಂಡ್ ಮತ್ತು ವಿಯೆಟ್ನಾಂ ಈ ಪಟ್ಟಿಯಿಂದ ಹೊರಬಂದ ಇತರ ನಾಲ್ಕು ದೇಶಗಳು. ಆಯಾ ದೇಶಗಳ ಕರೆನ್ಸಿಗಳ ಚಟುವಟಿಕೆಗಳು ಮತ್ತು ಅತಿಸೂಕ್ಷ್ಮ ಆರ್ಥಿಕ ನೀತಿಗಳ ಮೇಲೆ ಸಿಎಂಎಲ್ ನಿಗಾ ಇರಿಸುತ್ತದೆ. ಹಣಕಾಸು ಇಲಾಖೆ ಅಮೆರಿಕದ ಸಂಸತ್ತಿಗೆ ಸಲ್ಲಿಸಿರುವ ದ್ವೈವಾರ್ಷಿಕ ವರದಿ ಪ್ರಕಾರ ಚೀನಾ, ಜಪಾನ್, ಕೊರಿಯಾ, ಜರ್ಮನಿ, ಮಲೇಷ್ಯಾ, ಸಿಂಗಾಪುರ ಮತ್ತು ತೈವಾನ್ ಪ್ರಸ್ತುತ ಈ ಪಟ್ಟಿಯಲ್ಲಿ ಉಳಿದುಕೊಂಡಿವೆ. ಪಟ್ಟಿಯಿಂದ ಹೊರ ಬಿದ್ದಿರುವ ದೇಶಗಳು ಮೂರು ಆರ್ಥಿಕ ಮಾನದಂಡಗಳ ಪೈಕಿ ಒಂದನ್ನು ಸತತ ಎರಡು ವರದಿಗಳಲ್ಲಿ ಪಾಲಿಸಿವೆ ಎಂದು ಹಣಕಾಸು ಇಲಾಖೆ ಹೇಳಿದೆ.
