ಬೆಂಗಳೂರು: ಬಿಜೆಪಿ ಸರ್ಕಾರ ಬಂದಾಗಿನಿಂದ ವಿಧಾನಸಭೆಯಲ್ಲಿ ಮೊದಲ ಎರಡು ಸಾಲಿನಲ್ಲಿ ಕುಳಿತುಕೊಳ್ಳುತ್ತಿದ್ದ ಹಲವರ ಸ್ಥಾನ ಇದೀಗ ಬದಲಾಗಿದೆ. ಫ್ರಂಟ್ ಬೆಂಚರ್ ಎನಿಸಿಕೊಂಡವರು ಕೊನೇ ಸಾಲಿಗೆ ವರ್ಗವಾಗಿದ್ದಾರೆ. ಮಾಜಿ ಮುಖ್ಯಮಂತ್ರಿ ಯಡಿಯೂರಪ್ಪ ಕೊನೇ ಸಾಲಿನ ಎರಡನೇ ಆಸನದಲ್ಲಿ ಕುಳಿತರೆ, ಮಂತ್ರಿ ಸ್ಥಾನ ಕಳೆದುಕೊಂಡ ಸುರೇಶ್ಕುಮಾರ್, ಜಗದೀಶ್ ಶೆಟ್ಟರ್, ಅರವಿಂದ ಲಿಂಬಾವಳಿ ಕೂಡ ಕೊನೆಯ ಎರಡು ಸಾಲುಗಳಲ್ಲಿ ಕೂರುವಂತಾಗಿದೆ. ಅದೇ ರೀತಿ ಶಾಸಕಾಂಗ ಪಕ್ಷದ ನಾಯಕ ಬಸವರಾಜ ಬೊಮ್ಮಾಯಿ ಮೊದಲ ಸಾಲಿನ ಮೊದಲಿಗರಾಗಿ ಅವಕಾಶ ಪಡೆದುಕೊಂಡರು. ವಿಶೇಷವೆಂದರೆ, 33 ವರ್ಷದ ಹಿಂದೆ ತಮ್ಮ ತಂದೆ ಆಸೀನರಾಗಿದ್ದ ಆಸನದಲ್ಲಿ ಬಸವರಾಜ ಬೊಮ್ಮಾಯಿ ಕುಳಿತು ಆಡಳಿತ ಪಕ್ಷವನ್ನು ಮುನ್ನೆಡೆಸಿದರು. ಇನ್ನೊಂದು ಪ್ರಮುಖ ಬದಲಾವಣೆ ಎಂದರೆ, ಕಾನೂನು ಮತ್ತು ಸಂಸದೀಯ ಖಾತೆ ಕಳೆದುಕೊಂಡು ಎರಡನೇ ಸಾಲಿಗೆ ವರ್ಗವಾಗಿದ್ದ ಮಾಧುಸ್ವಾಮಿ ಇದೀಗ ಬೊಮ್ಮಾಯಿ ಸಂಪುಟದಲ್ಲಿ ಮತ್ತೆ ಅದೇ ಖಾತೆ ಪಡೆದುಕೊಳ್ಳುವ ಮೂಲಕ ಮೊದಲ ಸಾಲಿಗೆ ಬಂದಿದ್ದಾರೆ. ಜತೆಗೆ ಸಿಎಂ ಅನುಪಸ್ಥಿತಿಯಲ್ಲಿ ಮುನ್ನಡೆಸುತ್ತಾರೆ.
