ಮೈಸೂರು ಕಾಸ್ಮೋಪಾಲಿಟಿನ್ ಸಂಸ್ಕೃತಿ ಮೈಗೂಡಿಸಿಕೊಂಡು ಬೆಳೆಯುತ್ತಿದೆ. ನಗರದ ಜನಸಂಖ್ಯೆ 10 ಲಕ್ಷ ಮೀರುತ್ತಿದೆ. ಯೋಜನಾ ಪ್ರದೇಶದ ವ್ಯಾಪ್ತಿಯ ಜನಸಂಖ್ಯೆ 16.90 ಲಕ್ಷಕ್ಕಿಂತ ಹೆಚ್ಚಿದೆ. ಆಯವ್ಯಯ ಹಾಗೂ ಇತರ ಕಾರ್ಯಚಟುವಟಿಕೆ ವಿಸ್ತಾರವಾಗುತ್ತಿದೆ. ಅತಿವೇಗ ಹಾಗೂ ಬೃಹತ್ ಪ್ರಮಾಣದ ಬೆಳವಣಿಗೆಗಳನ್ನು ಗಮನದಲ್ಲಿಟ್ಟುಕೊಂಡು ಬಿಡಿಎ ಮಾದರಿಯ ಪ್ರತ್ಯೇಕ ಕಾಯ್ದೆ ತರಲಾಗುತ್ತಿದೆ ಎಂದು ಸರ್ಕಾರ ಸ್ಪಷ್ಟಪಡಿಸಿದೆ. ಪ್ರಾಧಿಕಾರದ ಮೂಲಕ ಕೈಗೊಳ್ಳುವ ಅಭಿವೃದ್ಧಿಗಳು ಸಮಗ್ರವಾಗಿರಬೇಕು. ನಿವೇಶನಗಳ ಬೇಕಾಬಿಟ್ಟಿ ಮಾರಾಟಕ್ಕೂ ಇದರಿಂದ ಬ್ರೇಕ್ ಬೀಳಲಿದೆ. ಸಮಗ್ರ ಮೂಲಸೌಕರ್ಯ ಕಲ್ಪಿಸುವುದು, ಮಾರುಕಟ್ಟೆ, ಅಂಚೆಕಚೇರಿ, ಬ್ಯಾಂಕ್, ಶಿಕ್ಷಣ ಸಂಸ್ಥೆ, ಹಾಲು, ಶಾಲೆ, ಆಸ್ಪತ್ರೆಗಳಂತಹ ಸೌಲಭ್ಯಗಳನ್ನು ಒದಗಿಸುವುದನ್ನು ಪ್ರಾಧಿಕಾರ ನಿರ್ವಹಿಸಲಿದೆ. ರಾಜ್ಯದ ಎಲ್ಲ ನಗರಾಭಿವೃದ್ಧಿ ಪ್ರಾಧಿಕಾರಗಳನ್ನು ಬಿಡಿಎ ಮಾದರಿಯಲ್ಲಿಯೇ ಪ್ರತ್ಯೇಕ ಕಾಯ್ದೆ ರೂಪಿಸಲು ನಿರ್ಧರಿಸಲಾಯಿತು.
