ಖಾಕಿಗೆ ಮನರಂಜನೆ ಗ್ಯಾರಂಟಿ!; ಮನರಂಜನೆ ಕಾರ್ಯಕ್ರಮಗಳ ಆಯೋಜನೆಗೆ ಸರ್ಕಾರ ಸೂಚನೆ

| ಕೀರ್ತಿನಾರಾಯಣ ಸಿ. ಬೆಂಗಳೂರು

ಸಾರ್ವಜನಿಕರಿಗೆ ಗೃಹಲಕ್ಷ್ಮಿ, ಗೃಹಜ್ಯೋತಿ, ಶಕ್ತಿ ಯೋಜನೆಯಂತಹ ಗ್ಯಾರಂಟಿಗಳನ್ನು ಕೊಟ್ಟಿರುವ ಕಾಂಗ್ರೆಸ್ ಸರ್ಕಾರ ಇದೀಗ ಪೊಲೀಸರಿಗೆ ‘ಮನರಂಜನೆ’ ಗ್ಯಾರಂಟಿ ಕೊಡಲು ಮುಂದಾಗಿದೆ! ಪೊಲೀಸ್ ಅಧಿಕಾರಿ ಮತ್ತು ಸಿಬ್ಬಂದಿಗಾಗಿ ಸಾಂಸ್ಕೃತಿಕ ಹಾಗೂ ಮನರಂಜನಾ ಕಾರ್ಯಕ್ರಮಗಳನ್ನು ಆಯೋಜನೆ ಮಾಡುವಂತೆ ಇಲಾಖೆಗೆ ಸೂಚನೆ ನೀಡಿದೆ.

12 ಗಂಟೆ ನಿರಂತರ ಡ್ಯೂಟಿ, ವಾರದ ರಜೆ ಇಲ್ಲದಿರುವುದು, ಸಿಬ್ಬಂದಿ ಕೊರತೆಯಿಂದ ಕೆಲಸದ ಒತ್ತಡ ಸೇರಿ ಇನ್ನಿತರ ಕಾರಣಗಳಿಂದ ಖಿನ್ನತೆಗೆ ಒಳಗಾಗುತ್ತಿರುವ ಪೊಲೀಸರು ಆತ್ಮಹತ್ಯೆ ಮಾಡಿಕೊಳ್ಳುತ್ತಿರುವ ಪ್ರಕರಣಗಳು ಹೆಚ್ಚಿವೆ. ಮನೋವೈದ್ಯರಿಂದ ಕೌನ್ಸೆಲಿಂಗ್ ಸೇರಿ ಹಲವು ರೀತಿ ಕ್ರಮಗಳನ್ನು ಕೈಗೊಂಡರೂ ಆತ್ಮಹತ್ಯೆ ಪ್ರಕರಣಗಳು ಇಳಿಕೆಯಾಗುತ್ತಿಲ್ಲ. ಇದನ್ನು ಗಂಭೀರವಾಗಿ ಪರಿಗಣಿಸಿರುವ ಸರ್ಕಾರ ಮನರಂಜನಾ ಕಾರ್ಯಕ್ರಮಗಳ ‘ಮದ್ದು’ ಹುಡುಕಿದೆ.

ಪೊಲೀಸ್ ಸಂಶೋಧನೆ ಮತ್ತು ಅಭಿವೃದ್ಧಿ ಬ್ಯೂರೋ (ಬಿಪಿಆರ್​ಡಿ) ಬಿಡುಗಡೆ ಮಾಡಿರುವ ಅಂಕಿ-ಅಂಶಗಳ ಪ್ರಕಾರ 69,840 ಸಿವಿಲ್ ಪೊಲೀಸ್ ಹುದ್ದೆಗಳು ಮಝುೂರಾಗಿವೆ. ಈ ಪೈಕಿ 61,744 ಭರ್ತಿಯಾಗಿದ್ದು, 8104 ಖಾಲಿ ಉಳಿದಿವೆ. 22,917 ಜಿಲ್ಲಾ ಸಶಸ್ತ್ರ ಮೀಸಲು (ಡಿಎಆರ್) ಪಡೆಯ ಹುದ್ದೆಗಳಲ್ಲಿ 17,074 ಭರ್ತಿಯಾಗಿವೆ. ಉಳಿದಂತೆ ರಾಜ್ಯ ಸಶಸ್ತ್ರ ಪಡೆಯ (ಕೆಎಸ್ಸಾರ್ಪಿ) 13,196 ಹುದ್ದೆಗಳಲ್ಲಿ 8,458 ಹುದ್ದೆಗಳಷ್ಟೇ ಭರ್ತಿಯಾಗಿವೆ. ಇಲಾಖೆಯಲ್ಲಿ ಒಟ್ಟಾರೆ 1,05,440 ಹುದ್ದೆಗಳಲ್ಲಿ ಶೇ.25ಕ್ಕಿಂತ ಹೆಚ್ಚು ಹುದ್ದೆಗಳು ಖಾಲಿ ಉಳಿದಿವೆ.

ಸಿಬ್ಬಂದಿ ಕೊರತೆಯಿಂದಾಗಿ ಒತ್ತಡದಲ್ಲಿ ಕೆಲಸ ಮಾಡುವಂತಾಗಿದೆ. ಒತ್ತಡ ನಿವಾರಣೆ ಜತೆಗೆ ಅವರಲ್ಲಿರುವ ಪ್ರತಿಭೆಯನ್ನು ಗುರುತಿಸಲು ಕಾರ್ಯಕ್ರಮ ಏರ್ಪಡಿಸುವಂತೆ ಡಿಜಿಪಿ ಡಾ.ಅಲೋಕ್ ಮೋಹನ್​ಗೆ ಗೃಹಸಚಿವ ಡಾ.ಜಿ.ಪರಮೇಶ್ವರ್ ಲಿಖಿತ ಸೂಚನೆ ನೀಡಿದ್ದಾರೆ. ಈ ಹಿನ್ನೆಲೆಯಲ್ಲಿ ಆಯಾ ಘಟಕಗಳ ವ್ಯಾಪ್ತಿಯಲ್ಲಿ ಕಾಲಕಾಲಕ್ಕೆ ಸಾಂಸ್ಕೃತಿಕ/ಮನರಂಜನೆ ಕಾರ್ಯಕ್ರಮಗಳನ್ನು ಆಯೋಜಿಸುವಂತೆ ಅಲೋಕ್ ಮೋಹನ್ ಇಲಾಖೆಯ ಎಲ್ಲ ಘಟಕಾಧಿಕಾರಿಗಳಿಗೆ ಆದೇಶ ಹೊರಡಿಸಿದ್ದಾರೆ. ಕೈಗೊಂಡಿರುವ ಕ್ರಮಗಳ ಕುರಿತು ವರದಿ ಸಲ್ಲಿಸುವಂತೆಯೂ ನಿರ್ದೇಶಿಸಿದ್ದಾರೆ.

ಅನುಕೂಲವೇನು?

• ಸಾಂಸ್ಕೃತಿಕ ಕಾರ್ಯಕ್ರಮಗಳಿಂದ ಸಿಬ್ಬಂದಿ ಮನಃಸ್ಥಿತಿಯನ್ನು ಸಹಜ ಸ್ಥಿತಿಯಲ್ಲಿಡಬಹುದು.
• ಇಂತಹ ಕಾರ್ಯಕ್ರಮಗಳಿಂದ ಸಕಾರಾತ್ಮಕ ಬದಲಾವಣೆಯಿಂದ ಒತ್ತಡ ಪ್ರಮಾಣ ತಗ್ಗುತ್ತದೆ.
• ಅಧಿಕಾರಿಗಳು ಹಾಗೂ ಕೆಳಹಂತದ ಸಿಬ್ಬಂದಿ ನಡುವೆ ಆತ್ಮೀಯತೆ, ಸಮನ್ವಯತೆ ತರಲು ಸಾಧ್ಯ.
• ಕಾರ್ಯಕ್ರಮಗಳಲ್ಲಿ ಕುಟುಂಬ ಸದಸ್ಯರೂ ಭಾಗಿಯಾಗುವುದರಿಂದ ಮನಸ್ಸು ಹಗುರಾಗುತ್ತದೆ.

ಪೊಲೀಸರು ಹೇಳೋದೇನು?

• ಮನರಂಜನೆ ಕಾರ್ಯಕ್ರಮಗಳ ಆಯೋಜನೆ ಒಳ್ಳೆಯದೆ ಆದರೆ, ಪೊಲೀಸರ ಜ್ವಲಂತ ಸಮಸ್ಯೆಗಳಿಗೆ ಮೊದಲು ಪರಿಹಾರ ಕೊಡಲಿ.
• ಹಿರಿಯ ಅಧಿಕಾರಿಗಳ ಬಳಿ ಕೆಳಹಂತದ ಸಿಬ್ಬಂದಿ ಮುಕ್ತವಾಗಿ ಸಮಸ್ಯೆ ಹೇಳಿಕೊಳ್ಳುವ ವಾತಾವರಣ ಸೃಷ್ಟಿಯಾಗಬೇಕು.
• ಕೆಲಸದ ಒತ್ತಡದಿಂದ ಕುಟುಂಬದವರ ಜತೆ ಇರಲಾಗುತ್ತಿಲ್ಲ. ಆದ್ದರಿಂದ 8 ಗಂಟೆ ಕರ್ತವ್ಯ ನಿರ್ವಹಣೆ ವ್ಯವಸ್ಥೆ ಜಾರಿಯಾಗಬೇಕು.
• ಈಗಾಗಲೇ ವಾರ್ಷಿಕ ಕ್ರೀಡಾಕೂಟ ಆಯೋಜನೆ ಮಾಡಲಾಗುತ್ತಿದೆ. ಆದರೆ, ಅದು ಅಧಿಕಾರಿಗಳಿಗಷ್ಟೇ ಸೀಮಿತವಾಗಿದೆ. ಇದೂ ಹಾಗಾಗದಿರಲಿ.
• ಕೆಳಹಂತದ ಸಿಬ್ಬಂದಿಗಾಗಿ ನಡೆಸುವ ಕ್ರೀಡಾ ಚಟುವಟಿಕೆಗಳು ಸಂಪ್ರದಾಯಕ್ಕಷ್ಟೇ ಸೀಮಿತವಾಗಿರುತ್ತವೆ.

https://www.vijayavani.net/man-transforms-into-human-dog-by-spending-20000-dollars