ಆನೆ ನಮ್ಮದು ಎಂದ BSPಗೆ ಚುನಾವಣಾ ಆಯೋಗ ಶಾಕ್​! ನಟ ವಿಜಯ್ ಪಕ್ಷಕ್ಕೂ ಸಿಕ್ತು 'ಆನೆ' ಬಲ!​ Actor Vijay

ಚೆನ್ನೈ: ತಮಿಳು ನಟ ವಿಜಯ್ ( Actor Vijay )​ ಅವರ ರಾಜಕೀಯ ಪಕ್ಷ ತಮಿಳಗ ವೆಟ್ರಿ ಕಳಗಂ ( TVK ) ಬಾವುಟದಲ್ಲಿರುವ ಆನೆಯ ಚಿಹ್ನೆಯನ್ನು ತೆಗೆಯುವಂತೆ ಸೂಚನೆ ನೀಡಲು ಬಹುಜನ ಸಮಾಜ ಪಕ್ಷ ( BSP ) ಮಾಡಿದ್ದ ಮನವಿಯನ್ನು ಕೇಂದ್ರ ಚುನಾವಣಾ ಆಯೋಗ ತಿರಸ್ಕರಿಸಿದೆ.

ರಾಜಕೀಯ ಪಕ್ಷಗಳು ಬಳಸುವ ಧ್ವಜಗಳನ್ನು ನಾವು ಅನುಮೋದಿಸುವುದಿಲ್ಲ. ಪಕ್ಷದ ಹೆಸರು, ಚಿಹ್ನೆಗಳು ಮತ್ತು ರಾಷ್ಟ್ರೀಯ ಲಾಂಛನಕ್ಕೆ ಸಂಬಂಧಿಸಿದ ನಿಯಮಗಳ ಅನುಸರಣೆಯನ್ನು ಖಚಿತಪಡಿಸಿಕೊಳ್ಳುವುದು ಆಯಾ ಪಕ್ಷಗಳ ಜವಾಬ್ದಾರಿಯಾಗಿದೆ ಎಂದು ಆಯೋಗ ಸ್ಪಷ್ಟಪಡಿಸುವ ಮೂಲಕ ಬಿಎಸ್​ಪಿ ಮನವಿಯನ್ನು ತಳ್ಳಿಹಾಕಿತು.

ತಮಿಳಗ ವೆಟ್ರಿ ಕಳಗಂ ಪಕ್ಷವು ಚಿಹ್ನೆಗಾಗಿ ಇನ್ನೂ ಅರ್ಜಿ ಸಲ್ಲಿಸಿಲ್ಲ. ಅಂತಹ ಅರ್ಜಿಯನ್ನು ಸಲ್ಲಿಸಿದ ನಂತರವೇ ತಾತ್ಕಾಲಿಕ ಚಿಹ್ನೆಯನ್ನು ಅನುಮತಿಸಲಾಗುವುದು ಚುನಾವಣಾ ಆಯೋಗ ತಿಳಿಸಿದೆ.

ನಟ ವಿಜಯ್ ಅವರು ಕಳೆದ ಫೆಬ್ರವರಿ 2ರಂದು ತಮ್ಮ ಹೊಸ ರಾಜಕೀಯ ಪಕ್ಷ ತಮಿಳಗ ವೆಟ್ರಿ ಕಳಗಂ ಅನ್ನು ಘೋಷಣೆ ಮಾಡಿದರು. ಇದಾದ 5 ತಿಂಗಳ ನಂತರ ಆಗಸ್ಟ್​ 22ರಂದು ಚೆನ್ನೈನಲ್ಲಿರುವ ತಮ್ಮ ಪಕ್ಷದ ಪ್ರಧಾನ ಕಚೇರಿಯಲ್ಲಿ ಪಕ್ಷದ ಧ್ವಜ ಮತ್ತು ಗೀತೆಯನ್ನು ಅನಾವರಣಗೊಳಿಸಿದರು. ಧ್ವಜದ ಮೇಲೆ ಮತ್ತು ಕೆಳಭಾಗದಲ್ಲಿ ಕೆಂಪು ಬಣ್ಣವಿದ್ದು, ಮಧ್ಯದಲ್ಲಿ ಹಳದಿ ಬಣ್ಣವಿದೆ. ವಿಜಯದ ಸಂಕೇತವಾಗಿ ಎರಡು ಆನೆಗಳು ಮತ್ತು ಅಲ್ಬಿಜಿಯಾ ಲೆಬ್ಬೆಕ್ ಹೂವಿನ ಚಿತ್ರವಿದೆ.

ಇದನ್ನೂ ಓದಿ: ನಾನು ಶುರು ಮಾಡಿದರೆ… ಎಲ್ಲ ಸ್ಪರ್ಧಿಗಳಿಗೂ ಖಡಕ್​ ವಾರ್ನಿಂಗ್​ ಕೊಟ್ಟ ಲಾಯರ್​ ಜಗದೀಶ್!​ Lawyer Jagadish

ವಿಜಯ್​ ಅವರು ಪಕ್ಷದ ಧ್ವಜ ಬಿಡುಗಡೆ ಮಾಡಿದ ಬೆನ್ನಲ್ಲೇ ಸಾಕಷ್ಟು ಟೀಕೆಗಳು ವ್ಯಕ್ತವಾದವು. ಅದರಲ್ಲೂ ರಾಷ್ಟ್ರೀಯ ಪಕ್ಷ ಬಹುಜನ ಸಮಾಜ ಪಕ್ಷವು ಟಿವಿಕೆ ಧ್ವಜದಲ್ಲಿರುವ ಆನೆಯ ಚಿತ್ರವನ್ನು ತೆಗೆಯಬೇಕು ಇಲ್ಲದಿದ್ದರೆ ಚುನಾವಣಾ ಆಯೋಗವನ್ನು ಸಂಪರ್ಕಿಸಬೇಕಾಗುತ್ತದೆ ಎಂದು ಎಚ್ಚರಿಕೆ ನೀಡಿತ್ತು. ಆದರೆ, ಎಚ್ಚರಿಕೆಗೆ ಸೊಪ್ಪು ಹಾಕದ ಹಿನ್ನೆಲೆಯಲ್ಲಿ ವಿಜಯ್​ ಅವರ ಟಿವಿಕೆ ಪಕ್ಷದ ವಿರುದ್ಧ ದೂರು ದಾಖಲಾಗಿತ್ತು.

ಬಹುಜನ ಸಮಾಜ ಪಕ್ಷದ ತಮಿಳುನಾಡು ರಾಜ್ಯ ಕಚೇರಿ ಕಾರ್ಯದರ್ಶಿ ವಕೀಲ ತಮಿಳ್ಮತಿ ಅವರು ಈ ಕುರಿತು ಚುನಾವಣಾ ಆಯೋಗಕ್ಕೆ ದೂರು ಸಲ್ಲಿಸಿದ್ದರು. ಬಹುಜನ ಸಮಾಜ ಪಕ್ಷವು ಭಾರತದಾದ್ಯಂತ ಆನೆಯನ್ನು ಚುನಾವಣಾ ಚಿಹ್ನೆಯಾಗಿ ಬಳಸುತ್ತಿದೆ. ನಮ್ಮ ಪಕ್ಷವೂ ಈ ಬಗ್ಗೆ ಸಂಬಂಧಪಟ್ಟವರಿಗೆ ತಿಳಿಸಿದರೂ ನಟ ವಿಜಯ್, ಯಾವುದೇ ಪ್ರತಿಕ್ರಿಯೆ ಅಥವಾ ಕ್ರಮ ಕೈಗೊಂಡಿಲ್ಲ. ಹೊಸ ಪಕ್ಷದ ಧ್ವಜದಲ್ಲಿ ರಾಷ್ಟ್ರೀಯ ಪಕ್ಷದ ಚಿಹ್ನೆಯನ್ನು ಯಾವುದೇ ರಾಜಕೀಯ ಶಿಷ್ಟಾಚಾರವನ್ನು ಪಾಲಿಸದೇ ಬಳಸಿದ್ದಕ್ಕಾಗಿ ನಟ ವಿಜಯ್ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳುವಂತೆ ವಕೀಲ ತಮಿಳ್ಮತಿ ದೂರಿನಲ್ಲಿ ಕೋರಿದರು. ಜನರಲ್ಲಿ ಗೊಂದಲ ಸೃಷ್ಟಿಸುವುದನ್ನು ತಪ್ಪಿಸಲು ತಮಿಳಗ ವೆಟ್ರಿ ಕಳಗಂ ಧ್ವಜದಿಂದ ಆನೆಯ ಚಿತ್ರವನ್ನು ತೆಗೆಯಬೇಕು ಎಂದು ದೂರಿನಲ್ಲಿ ಆಗ್ರಹಿಸಿದ್ದರು. ಆದರೀಗ ಬಿಎಸ್​ಪಿಯ ಮನವಿಯನ್ನು ಚುನಾವಣಾ ಅಯೋಗ ತಿರಸ್ಕರಿಸಿದೆ.

2026ರಲ್ಲಿ ನಡೆಯಲಿರುವ ತಮಿಳುನಾಡು ವಿಧಾನಸಭಾ ಚುನಾವಣೆಯಲ್ಲಿ ಸ್ಪರ್ಧಿಸುವುದಾಗಿ ವಿಜಯ್​ ಘೋಷಣೆ ಮಾಡಿದ್ದಾರೆ. (ಏಜೆನ್ಸೀಸ್​)

https://www.vijayavani.net/do-you-know-what-natasa-stankovic-is-doing-after-her-breakup-with-hardik-the-video-went-viral

https://www.vijayavani.net/begging-for-even-a-rupee-does-not-own-a-bank-account-jayam-ravi