ಮಾಹಿತಿ-ತಂತ್ರಜ್ಞಾನದ ದೆಸೆ, ಡಿಜಿಟಲೀಕರಣದ ಲಭ್ಯತೆಯಿಂದ ಹಲವು ರಂಗಗಳು ಆಧುನಿಕತೆಯ ಸ್ಪರ್ಶ ಪಡೆದುಕೊಂಡು, ಸುಧಾರಣೆಗೆ ತೆರೆದುಕೊಂಡಿವೆ. ಅದು ಕಾಲದ ಅಗತ್ಯವೂ ಹೌದು. ಪ್ರಕ್ರಿಯೆಗಳು ಪಾರದರ್ಶಕ ಹಾಗೂ ಕ್ಷಿಪ್ರವಾಗಿ ಸಾಗಲು ಇದರಿಂದ ಅನುಕೂಲ. ಆದರೆ, ರಾಜ್ಯ ಸರ್ಕಾರಿ ನೌಕರರೇ ಹಲವು ಸವಲತ್ತುಗಳಿಗಾಗಿ, ಸಾಮಾನ್ಯ ಪ್ರಕ್ರಿಯೆಗಳಿಗಾಗಿ ಪದೇಪದೆ ಕಚೇರಿಗಳಿಗೆ ಅಲೆದಾಡಬೇಕಿತ್ತು. ಆದರೂ ಕಾಲಮಿತಿಯಲ್ಲಿ ಕೆಲಸಗಳು ಆಗುತ್ತಿರಲಿಲ್ಲ. ‘ದಾಖಲೆ (ಫೈಲ್) ಕಳೆದುಹೋಗಿದೆ, ಉನ್ನತ ಅಧಿಕಾರಿ ರಜೆಯಲ್ಲಿದ್ದಾರೆ’ ಎಂಬ ಸಬೂಬುಗಳೆಲ್ಲ ರೋಸಿಹೋಗುವಂತೆ ಮಾಡುತ್ತಿತ್ತು. ಇದಕ್ಕೆ ಕಡಿವಾಣ ಹಾಕಲು ಮುಂದಾಗಿರುವ ರಾಜ್ಯ ಸರ್ಕಾರ ನೌಕರಸ್ನೇಹಿ ಕ್ರಮವನ್ನು ಘೋಷಿಸಿರುವುದು ಸ್ವಾಗತಾರ್ಹ ಬೆಳವಣಿಗೆ. ಸರ್ಕಾರಿ ನೌಕರರಿಗೆ ಸಿಗುವ ಎಲ್ಲ ಸೇವೆಗಳನ್ನು ಆನ್ಲೈನ್ ಮೂಲಕ ಕಲ್ಪಿಸಲು ಸರ್ಕಾರ ಮುಂದಾಗಿದ್ದು, ಇದಕ್ಕಾಗಿ ತಿಂಗಳೊಳಗೆ ಹೊಸ ಆಪ್ ಸಿದ್ಧವಾಗಲಿದೆ. ಇದರಿಂದ ಸರ್ಕಾರಿ ನೌಕರರ ಸಮಯ, ಶ್ರಮ ಎರಡೂ ಉಳಿತಾಯವಾಗಲಿದೆ. ಕಾಪೋರೇಟ್ ಕಂಪನಿಗಳ ಮಾದರಿಯಲ್ಲಿ ಸೌಲಭ್ಯ ಕಲ್ಪಿಸಲು ಮುಂದಾಗಿದ್ದು, ಪ್ರಮುಖವಾಗಿ 32 ಸೇವೆಗಳು ಲಭ್ಯ ಆಗಲಿವೆ. ಆನ್ಲೈನ್ನಲ್ಲಿ ಅರ್ಜಿ ಅಪ್ಲೋಡ್ ಮಾಡುತ್ತಿದ್ದಂತೆ ಅದು ನೇರವಾಗಿ ಸಂಬಂಧಿಸಿದವರ ಗಮನಕ್ಕೆ ಬರುತ್ತದೆ. ಅವರು ಒಪ್ಪಿಗೆ ನೀಡುತ್ತಿದ್ದಂತೆ ನೌಕರರಿಗೆ ಮಾಹಿತಿ ರವಾನೆ ಆಗುತ್ತದೆ.
