ಸಂಪಾದಕೀಯ: ಭಾರತೀಯ ಸಂಸ್ಕೃತಿಯಲ್ಲಿ ದೀಪಾವಳಿ ವಿಶಿಷ್ಟ ಪರ್ವ. ದೈನಂದಿನ ಜಂಜಾಟಗಳನ್ನು ಮರೆಸಿ, ಜೀವನೋತ್ಸಾಹ ಹೆಚ್ಚಿಸುವ ಮತ್ತು ಬಾಂಧವ್ಯಗಳನ್ನು ಬಲಪಡಿಸುವ ಹಬ್ಬ. ಅಧರ್ಮದ ವಿರುದ್ಧ ಧರ್ಮದ ವಿಜಯ, ಕೆಡುಕಿನ ವಿರುದ್ಧ ಒಳಿತಿನ ಗೆಲುವು, ಅಂಧಕಾರದ ವಿರುದ್ಧ ಬೆಳಕಿನ ಆಹ್ಲಾದ... ಹೀಗೆ ವ್ಯಷ್ಟಿ ಹಾಗೂ ಸಮಷ್ಟಿಯ ನೈತಿಕ ಪ್ರಜ್ಞೆಯನ್ನು ಜಾಗೃತಗೊಳಿಸುತ್ತದೆ ಈ ಹಬ್ಬ. ಭಗವಾನ್ ಶ್ರೀರಾಮಚಂದ್ರ ಹದಿನಾಲ್ಕು ವರ್ಷಗಳ ವನವಾಸದಿಂದ ಅಯೋಧ್ಯೆಗೆ ಮರಳಿದ ಸುದಿನ, ಲೋಕಕ್ಕೆ ಕಂಟಕವಾಗಿದ್ದ ನರಕಾಸುರನನ್ನು ಶ್ರೀಕೃಷ್ಣ ಪರಮಾತ್ಮ ವಧಿಸಿ ಧರ್ಮ ಸಂಸ್ಥಾಪನೆ ಮಾಡಿದ ನೆನಪಿಗಾಗಿ ದೇಶದ ಉದ್ದಗಲಕ್ಕೂ ದೀಪಾವಳಿಯನ್ನು ಸಂಭ್ರಮ ಮತ್ತು ಹಷೋಲ್ಲಾಸಗಳಿಂದ ಆಚರಿಸಲಾಗುತ್ತದೆ. ವಿದೇಶಗಳಲ್ಲೂ ಅನಿವಾಸಿ ಭಾರತೀಯರು ಈ ಹಬ್ಬವನ್ನು ಒಟ್ಟಾಗಿ ಆಚರಿಸುತ್ತಿದ್ದಾರೆ. ಶ್ರೀರಾಮನ ಜನ್ಮಭೂಮಿ ಅಯೋಧ್ಯೆಯಲ್ಲಂತೂ ದೀಪಾವಳಿ ಸಂಭ್ರಮ ಮುಗಿಲುಮುಟ್ಟಿದ್ದು, ಎರಡು ಗಿನ್ನೆಸ್ ದಾಖಲೆಯನ್ನೂ ಸೃಷ್ಟಿಸಿರುವುದು ಗಮನಾರ್ಹ. ಭಾನುವಾರ ಸಂಜೆ ಅಯೋಧ್ಯೆಯಲ್ಲಿ 26 ಲಕ್ಷ 17 ಸಾವಿರದ 215 ದೀಪಗಳನ್ನು ಏಕಕಾಕಲದಲ್ಲಿ ಬೆಳಗಿದ್ದು ಮೊದಲ ದಾಖಲೆಯಾದರೆ, ಸರಯೂ ನದಿತೀರದಲ್ಲಿ 2128 ಅರ್ಚಕರು ಒಟ್ಟಾಗಿ ಸರಯೂಗೆ ಆರತಿ ಬೆಳಗಿದ್ದು ಮತ್ತೊಂದು ದಾಖಲೆ. ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ ರಾಮ ಮಂದಿರದಲ್ಲಿ ದೀಪ ಬೆಳಗುವ ಮೂಲಕ ದೀಪೋತ್ಸವಕ್ಕೆ ಚಾಲನೆ ನೀಡಿದರು. ಅದೇ ರೀತಿ ವಿಶ್ವನಾಥನ ಸನ್ನಿಧಿ ಕಾಶಿ ಕ್ಷೇತ್ರ ಸಾವಿರಾರು ದೀಪಗಳಿಂದ ಕಂಗೊಳಿಸಿದೆ.
