ಕಳೆದ ಕೆಲ ವರ್ಷಗಳಲ್ಲಿ ಭಾರತ ಆರ್ಥಿಕ ಬೆಳವಣಿಗೆಯಲ್ಲಿ ವೇಗ ಕಂಡುಕೊಂಡಿದೆ. ಮುಂಚೆ ಈ ಸ್ಥಿತಿ ಇರಲಿಲ್ಲ. 2004-14ರ ಅವಧಿಯಲ್ಲಿ ಹಲವು ಕ್ಷೇತ್ರಗಳಲ್ಲಿ ಹಿನ್ನಡೆ ಅನುಭವಿಸಿದ್ದ ದೇಶ, ‘ಜಗತ್ತಿನ ಐದು ಬಲಹೀನ ಅರ್ಥವ್ಯವಸ್ಥೆಗಳಲ್ಲಿ ಒಂದು’ ಎಂಬ ಹಣೆಪಟ್ಟಿ ಕಟ್ಟಿಕೊಂಡಿತ್ತು. ಅಲ್ಲದೆ, 2014ರಲ್ಲಿ 1.7 ಟ್ರಿಲಿಯನ್ ಡಾಲರ್ ಮೊತ್ತದ ವಾರ್ಷಿಕ ಜಿಡಿಪಿಯೊಂದಿಗೆ ಜಾಗತಿಕವಾಗಿ ಹನ್ನೊಂದನೆಯ ಸ್ಥಾನದಲ್ಲಿತ್ತು. ಆದರೆ, ಸುಧಾರಣಾ ಕ್ರಮಗಳ ಫಲವಾಗಿ ಭಾರತ ಪ್ರಸಕ್ತ 3.8 ಟ್ರಿಲಿಯನ್ ಡಾಲರ್ ವಾರ್ಷಿಕ ಜಿಡಿಪಿಯೊಂದಿಗೆ ಜಗತ್ತಿನ ಐದನೆಯ ದೊಡ್ಡ ಅರ್ಥವ್ಯವಸ್ಥೆಯಾಗಿ ಬೆಳೆದುನಿಂತಿರುವುದು ಸಾಮಾನ್ಯ ಸಾಧನೆಯೇನಲ್ಲ. ಅಲ್ಲದೆ, ಅಮೆರಿಕ, ಜಪಾನ್, ಬ್ರಿಟನ್, ಚೀನಾ ಮುಂತಾದ ಆರ್ಥಿಕ ದಿಗ್ಗಜಗಳ ವಾರ್ಷಿಕ ಜಿಡಿಪಿ ವೇಗವಾಗಿ ಕುಸಿಯುತ್ತ ಸಾಗಿದ್ದರೆ ಭಾರತ ಮಾತ್ರ ಕಳೆದ ವರ್ಷ 8.2% ವಾರ್ಷಿಕ ಜಿಡಿಪಿಯೊಂದಿಗೆ ಗಮನಸೆಳೆದಿದೆ. ಭಾರತದ ಈ ಬೆಳವಣಿಗೆ ಮತ್ತು ಅಭಿವೃದ್ಧಿಯ ಓಟ ಕೆಲ ದೇಶ, ಸಂಸ್ಥೆಗಳಿಗೆ ಸಹಿಸ ಲಾಗುತ್ತಿಲ್ಲ. ಹಾಗಾಗಿ, ಅವು ದೇಶದ, ಇಲ್ಲಿಯ ಮಾರುಕಟ್ಟೆಗಳ ವರ್ಚಸ್ಸಿಗೆ ಹಾನಿ ಮಾಡಲು ಒಂದಿಲ್ಲೊಂದು ಪ್ರಯತ್ನ ಮಾಡುತ್ತಲೇ ಇದ್ದು, ಇದನ್ನು ಗಂಭೀರವಾಗಿ ಪರಿಗಣಿಸಬೇಕಿದೆ.
