ಅದರ ವಿಚಾರಣೆ ಸಮಯದಲ್ಲೇ ನ್ಯಾಯಮೂರ್ತಿಗಳು 10ಕ್ಕೂ ಹೆಚ್ಚು ರಾಜ್ಯಗಳ ಜೈಲುಗಳಲ್ಲಿ ತಾರತಮ್ಯದ ನಿಯಮಗಳು ಇರುವುದನ್ನು ಗುರುತಿಸಿದ್ದರು. ಉತ್ತರಪ್ರದೇಶ, ಒಡಿಶಾ, ಜಾರ್ಖಂಡ್, ಕೇರಳ, ಪಶ್ಚಿಮ ಬಂಗಾಳ, ಮಧ್ಯಪ್ರದೇಶ, ಆಂಧ್ರಪ್ರದೇಶ, ಮಹಾರಾಷ್ಟ್ರ, ತೆಲಂಗಾಣ, ಪಂಜಾಬ್, ತಮಿಳುನಾಡು ರಾಜ್ಯಗಳ ಜೈಲು ನಿಯಮಾವಳಿಗಳನ್ನು ಉಲ್ಲೇಖಿಸಿದ್ದರು. ಬಳಿಕ, ಕೇಂದ್ರ ಸರ್ಕಾರಕ್ಕೆ ಮತ್ತು ಈ ರಾಜ್ಯಗಳಿಗೆ ನೋಟಿಸ್ ಜಾರಿ ಮಾಡಿದ್ದರು. ವಿಚಾರಣೆ ಬಳಿಕ ಕಳೆದ ಜುಲೈನಲ್ಲಿ ತೀರ್ಪನ್ನು ಕಾಯ್ದಿರಿಸಲಾಗಿತ್ತು. ಇದೀಗ ಇಂತಹ ತಾರತಮ್ಯವನ್ನು ಕೊನೆಗೊಳಿಸುವಂತೆ ಮುಖ್ಯ ನ್ಯಾಯಮೂರ್ತಿಗಳು ಕಟ್ಟುನಿಟ್ಟಿನ ಆದೇಶ ನೀಡಿದ್ದಾರೆ. ಇಂತಹ ತಾರತಮ್ಯಕ್ಕೆ ತಿಲಾಂಜಲಿ ಇತ್ತಿರುವ ಸವೋಚ್ಚ ನ್ಯಾಯಾಲಯ, ಎಲ್ಲ ರಾಜ್ಯಗಳು ಇನ್ನು ಮೂರು ವಾರಗಳಲ್ಲಿ ಜೈಲು ನಿಯಮಗಳ ಕೈಪಿಡಿಯನ್ನು ಪರಿಷ್ಕರಿಸಬೇಕೆಂದು ಆದೇಶ ನೀಡಿದೆ. ಪ್ರತಿ ರಾಜ್ಯವೂ ತನ್ನದೇ ಆದ ಜೈಲು ಕೈಪಿಡಿ ಹೊಂದಿರುತ್ತದೆ. ಈಗ ಸುಪ್ರೀಂ ಕೋರ್ಟ್ ನಿರ್ದೇಶನದ ಆಧಾರದ ಮೇಲೆ ಈ ಕೈಪಿಡಿಗಳನ್ನು ಪರಿಷ್ಕರಿಸಲು ರಾಜ್ಯ ಸರ್ಕಾರಗಳು ಸಮರೋಪಾದಿಯಲ್ಲಿ ಮುಂದಡಿ ಇಡಬೇಕು. ಕೈದಿಗಳ ಮಧ್ಯೆ ಜಾತಿ ಆಧಾರದ ಮೇಲೆ ತಾರತಮ್ಯ ಮಾಡುವ ಪಿಡುಗನ್ನು ತೊಡೆದುಹಾಕಬೇಕು.
