ಸಂಪಾದಕೀಯ: ಪ್ರಾದೇಶಿಕ ಸಾರಿಗೆ ಕಚೇರಿ(ಆರ್ಟಿಒ)ಗಳು ಲಂಚ ಮತ್ತು ಮಧ್ಯವರ್ತಿಗಳ ಹಾವಳಿಯಿಂದ ಕುಖ್ಯಾತಿ ಪಡೆದಿರುವುದು ಗೊತ್ತಿರುವಂಥದ್ದೇ. ಯಾವುದೇ ಕೆಲಸ ಆಗಬೇಕಾದರೂ ಮಧ್ಯವರ್ತಿಗಳ ಮೂಲಕವೇ ತೆರಳಬೇಕು. ಒಂದೊಮ್ಮೆ, ನೇರವಾಗಿ ಅಲ್ಲಿನ ಸಂಬಂಧಪಟ್ಟ ಸಿಬ್ಬಂದಿಯನ್ನು ಸಂಪಕಿಸಿದರೂ, ‘ದಲ್ಲಾಳಿ ಮೂಲಕ ಬನ್ನಿ, ಕೆಲಸ ಬೇಗ ಆಗುತ್ತದೆ’ ಎಂಬ ಅಲಿಖಿತ ಸೂಚನೆಯನ್ನು ಯಾವುದೇ ಮುಲಾಜಿಲ್ಲದೆ ನೀಡುವ ನಿದರ್ಶನಗಳಿಗೆ ಕೊರತೆ ಇಲ್ಲ. ಅಲ್ಲದೆ, ಕಚೇರಿಗೆ ಬರುವ ಸಾರ್ವಜನಿಕರಿಂದ ಕೆಲವಡೆ ಫೈಲ್ ಸ್ವೀಕಾರ, ಶುಲ್ಕ ಪಾವತಿ ಎಲ್ಲವನ್ನೂ ಮಧ್ಯವರ್ತಿಗಳೇ ಮಾಡುತ್ತಾರೆ. ಸರ್ಕಾರಿ ಅಧಿಕಾರಿ ಮತ್ತು ಸಿಬ್ಬಂದಿಯಂತೆಯೇ ವರ್ತಿಸಿ ಹೆಚ್ಚುವರಿ ಹಣಕ್ಕಾಗಿ ಕಿರುಕುಳ ಕೊಡುವ ಪ್ರಕರಣಗಳಿಗೆ ಸಂಬಂಧಿಸಿ ಸಾರ್ವಜನಿಕರು ಸಾಕಷ್ಟು ಬಾರಿ ದೂರು ನೀಡಿದ್ದಾರೆ.
