ಮೊದಲ ಹಂತದಲ್ಲಿ ಮೂರು ಏಜೆನ್ಸಿಗಳ ವಿಲೀನ ನಡೆಯಲಿದೆ (ರೈಲ್ವೆ ರಿಕ್ರೂಟ್ವೆುಂಟ್ ಬೋರ್ಡ್ (ಆರ್ಆರ್ಬಿ), ಐಬಿಪಿಎಸ್, ಎಸ್ಎಸ್ಬಿ). ಎಲ್ಲ ಗ್ರೂಪ್ ಬಿ ಹಾಗೂ ಸಿ ವೃಂದದ ನಾನ್ ಗೆಜೆಟಡ್ ಹುದ್ದೆಗಳಿಗೆ ಒಂದೇ ಪ್ರವೇಶ ಪರೀಕ್ಷೆ ಇರಲಿದೆ. ಪರೀಕ್ಷೆಯ ಫಲಿತಾಂಶ ಮೂರು ವರ್ಷಗಳ ಅವಧಿವರೆಗೆ ಮಾನ್ಯತಾ ಅವಧಿ ಹೊಂದಿರುತ್ತದೆ. ಎಲ್ಲ ಆಕಾಂಕ್ಷಿಗಳಿಗೆ ಒಂದೇ ನೋಂದಣಿ ಪೋರ್ಟಲ್ ಇರಲಿದ್ದು, ಎಷ್ಟು ಬಾರಿಯಾದರೂ ಪರೀಕ್ಷೆ ಎದುರಿಸಬಹುದಾಗಿದೆ. ಗ್ರಾಮೀಣ ಪ್ರದೇಶದ ಉದ್ಯೋಗಾಕಾಂಕ್ಷಿಗಳು ಮಾಹಿತಿ, ಸೌಲಭ್ಯದ ಕೊರತೆಯಿಂದ ಅವಕಾಶ ವಂಚಿತರಾಗುತ್ತಿದ್ದರು. ಅಲ್ಲದೆ, ಪದೇಪದೆ ಶುಲ್ಕ ಭರಿಸಲಾಗದೆ, ದೂರಪ್ರಯಾಣ ಮಾಡಲಾಗದೆ ಪರೀಕ್ಷೆಯಿಂದ ತಪ್ಪಿಸಿಕೊಳ್ಳುತ್ತಿದ್ದರು. ಹೊಸ ವ್ಯವಸ್ಥೆಯಿಂದ ಅಂಥ ಸಮಸ್ಯೆಗಳು ನಿವಾರಣೆ ಆಗಲಿವೆ. ಅಲ್ಲದೆ, ನೇಮಕಾತಿ ಪ್ರಾಧಿಕಾರ ರಚನೆಯಿಂದ ಭ್ರಷ್ಟಾಚಾರ, ವಿಳಂಬ ಧೋರಣೆ, ಸ್ವಜನಪಕ್ಷಪಾತಕ್ಕೂ ಕಡಿವಾಣ ಬೀಳಲಿದೆ. ದೇಶದ ಕೋಟ್ಯಂತರ ಉದ್ಯೋಗಾಕಾಂಕ್ಷಿಗಳು ಭರವಸೆಯಿಂದ, ಹೊಸ ಹುಮ್ಮಸ್ಸಿನಿಂದ ಪರೀಕ್ಷೆ ಎದುರಿಸಲು ಸಾಧ್ಯವಾಗಲಿದೆ. ಇತರ ನೇಮಕಾತಿ ಏಜೆನ್ಸಿಗಳ ವಿಲೀನದ ಬಗ್ಗೆಯೂ ಸರ್ಕಾರ ಚಿಂತನೆ ನಡೆಸಬೇಕು
