ಸಾಮಾನ್ಯವಾಗಿ ಪ್ರತಿವರ್ಷ ನೌಕರರ ವರ್ಗಾವಣೆ ನಡೆಯುತ್ತದೆ. ಎಷ್ಟು ನೌಕರರನ್ನು ವರ್ಗಾಯಿಸಬೇಕು ಎಂಬುದಕ್ಕೆ ಸಂಖ್ಯಾಮಿತಿ ಇರುತ್ತದೆ. ಈ ಪ್ರಮಾಣ ಶೇ.4ರಿಂದ ಶೇ.7ರವರೆಗೂ ಇರುತ್ತದೆ. ಹಾಗೇ ವರ್ಗಾವಣೆಗೆ ಸಮಯದ ಗಡುವನ್ನೂ ವಿಧಿಸಲಾಗುತ್ತದೆ. ಆದರೆ ಅನೇಕ ಸಲ ಈ ಎರಡೂ ನಿಯಮಗಳು ಪಾಲನೆಯಾಗುವುದಿಲ್ಲ. ಹಾಗೇ, ವರ್ಗಾವಣೆಯ ಸಂದರ್ಭದಲ್ಲಿ ಮಾರ್ಗಸೂಚಿಗಳನ್ನು ಕೂಡ ಸರ್ಕಾರ ಪ್ರಕಟಿಸುತ್ತದೆ. ಖಾಲಿ ಇರುವ ಹಾಗೂ ಆಡಳಿತಾತ್ಮಕವಾಗಿ ತ್ವರಿತವಾಗಿ ತುಂಬಬೇಕಾದ ಹುದ್ದೆಗಳಿಗೆ ಆದ್ಯತೆ, ಪತಿ-ಪತ್ನಿ ಪ್ರಕರಣ, ಸಾರ್ವಜನಿಕವಾಗಿ ದೂರು ಬಂದಿರುವವರು ಈ ಮುಂತಾದವಕ್ಕೆ ಆದ್ಯತೆ ನೀಡಬೇಕೆಂದು ಮಾರ್ಗಸೂಚಿ ಇರುತ್ತದೆ. ಆದರೆ ಈ ಮಾರ್ಗಸೂಚಿಗಳನ್ನು ಕಟ್ಟುನಿಟ್ಟಾಗಿ ಪಾಲಿಸುವುದೂ ವಿರಳ. ಅದೇ ರೀತಿ, ವರ್ಗಾವಣೆಯಲ್ಲಿ ವಶೀಲಿ ಮತ್ತು ಹಣದ ವ್ಯವಹಾರವಿರುತ್ತದೆಂಬ ಆಪಾದನೆಯೂ ಹಳೆಯದೇ. ಇಂಥ ಆಕ್ಷೇಪಗಳಿಗೆ ಎಡೆಯಾಗದಿರಲಿ. ವರ್ಗಾವಣೆ ನಿರ್ಣಯ ಪ್ರಕಟವಾದ ನಂತರ ಎಲ್ಲ ಇಲಾಖೆಗಳಲ್ಲೂ 15-20 ದಿನ ಬರೀ ಇದರದೇ ಮಾತು-ಚರ್ಚೆ ಇರುತ್ತದೆ ಹೊರತು ಬೇರೆ ಕೆಲಸಗಳು ನಡೆಯುವುದು ಕಡಿಮೆ. ಈಗ ಸರ್ಕಾರದ ಅನೇಕ ಇಲಾಖೆಗಳು ಕರೊನಾ ನಿರ್ವಹಣೆ ಮತ್ತು ನಿಯಂತ್ರಣ ಕಾರ್ಯದಲ್ಲಿ ತೊಡಗಿಕೊಂಡಿವೆ. ಕರೊನಾ ಸೋಂಕಿನ ಪ್ರಮಾಣ ರಾಜ್ಯದಲ್ಲಿ ಏರಿಕೆಯಾಗುತ್ತಲೇ ಇರುವುದರಿಂದಾಗಿ ಈ ಇಲಾಖೆಗಳ ಹೊಣೆಗಾರಿಕೆ ಹೆಚ್ಚುತ್ತಲೇ ಇದೆ. ಕರೊನಾ ನಿಯಂತ್ರಣ ಒಂದು ಹಂತಕ್ಕೆ ಬರುವವರೆಗೂ ಇವರ ಕೆಲಸ ನಡೆಯುತ್ತಿರಲೇಬೇಕು. ಈ ಕೆಲಸದಲ್ಲಿ ವ್ಯತ್ಯಾಸವಾದರೆ ಒಟ್ಟಾರೆ ಸಾರ್ವಜನಿಕ ಆರೋಗ್ಯ ಪರಿಸ್ಥಿತಿ ಮೇಲೆ ಪರಿಣಾಮವಾಗುತ್ತದೆ ಮತ್ತು ನಂತರದ ಸನ್ನಿವೇಶ ಮತ್ತಷ್ಟು ಗಡಚಾಗುತ್ತದೆ. ಹೀಗಾಗಿ ಆಯಾ ಇಲಾಖೆಗಳು ಮತ್ತು ಅಧಿಕಾರಿ-ನೌಕರರು ತಂತಮ್ಮ ಜವಾಬ್ದಾರಿ- ಕರ್ತವ್ಯಗಳನ್ನು ಅರಿತುಕೊಂಡು, ವರ್ಗಾವಣೆ ಭರಾಟೆಯಲ್ಲಿ ಕರೊನಾ ಕಾರ್ಯದ ಮೇಲೆ ದುಷ್ಪರಿಣಾಮ ಆಗದಂತೆ ನೋಡಿಕೊಳ್ಳುವ ಎಚ್ಚರಿಕೆಯನ್ನು ವಹಿಸಬೇಕಾಗುತ್ತದೆ. ಇಲ್ಲವಾದಲ್ಲಿ ಇಷ್ಟು ದಿನಗಳ ಶ್ರಮಕ್ಕೆ ಪ್ರತಿಫಲ ಇಲ್ಲದಂತಾಗುತ್ತದೆ.
