ಕರೊನಾ ದೇಶದ ಆರ್ಥಿಕ ವ್ಯವಸ್ಥೆಯನ್ನೇ ಅಲುಗಾಡಿಸಿದೆ. ಲಾಕ್ಡೌನ್ ಅವಧಿಯಲ್ಲಿ ಜನಸಾಮಾನ್ಯರನ್ನು, ದೇಶದ ವಿವಿಧ ವಲಯ-ರಂಗಗಳನ್ನು ಸಂಕಷ್ಟದಿಂದ ಪಾರು ಮಾಡಲು ಕೇಂದ್ರ, ರಾಜ್ಯ ಸರ್ಕಾರ ಹಲವು ಹಂತದ ಪ್ಯಾಕೇಜ್ ಘೋಷಿಸಿದ್ದವು. ಲಾಕ್ಡೌನ್ ತೆರವಿನ ಬಳಿಕ ಆರ್ಥಿಕತೆ ಹಳಿಗೆ ಮರಳಬಹುದು ಎಂಬ ನಿರೀಕ್ಷೆ ಇತ್ತಾದರೂ, ಸೋಂಕು ಪ್ರಕರಣಗಳ ಹೆಚ್ಚಳ, ಮತ್ತಿತರ ಕಾರಣದಿಂದ ಅದು ಸಾಧ್ಯವಾಗಲಿಲ್ಲ. ಈ ನಡುವೆ, ಕೆಲವೇ ದಿನಗಳಲ್ಲಿ ನವರಾತ್ರಿ ಆರಂಭವಾಗಲಿದ್ದು, ದಸರಾ, ದೀಪಾವಳಿ ಸಮೀಪಿಸಲಿವೆ. ಈ ಹಬ್ಬಗಳು ಭಾರತೀಯರಿಗೆ ಸಂಭ್ರಮ ತರುವುದರ ಜತೆಗೆ, ಆರ್ಥಿಕತೆಗೂ ಚೈತನ್ಯ ತುಂಬಬಲ್ಲವು. ಆದರೆ, ಆರ್ಥಿಕ ಹಿಂಜರಿತದ ಕಾರಣ ಜನರು ಈ ಬಾರಿ ಖರೀದಿಗೆ ಹಿಂದೇಟು ಹಾಕುತ್ತಿದ್ದಾರೆ. ಈ ನಿಟ್ಟಿನಲ್ಲಿ ಹಣದ ಹರಿವು ಹೆಚ್ಚಿಸಲು ಮುಂದಾಗಿರುವ ಕೇಂದ್ರ ಸರ್ಕಾರ ಸಕಾಲಿಕ ನೆರವನ್ನು ಘೋಷಿಸಿದ್ದು, 73 ಸಾವಿರ ಕೋಟಿ ರೂಪಾಯಿ ಮೊತ್ತದ ಸೌಲಭ್ಯಗಳನ್ನು ಪ್ರಕಟಿಸಿದೆ. ಇದರಿಂದ ಅರ್ಥವ್ಯವಸ್ಥೆಯಲ್ಲಿ ಬೇಡಿಕೆ ಹೆಚ್ಚಲು ಅನುಕೂಲವಾಗಲಿದೆ.
