ತಂತ್ರಜ್ಞಾನ ಬಳಕೆಯ ನೆಪದಲ್ಲಿ ಸರ್ಕಾರಿ ಶಾಲೆ ಮಕ್ಕಳು ಶಿಕ್ಷಣದಿಂದ ವಂಚಿತವಾಗಬಾರದು, ವಿದ್ಯಾರ್ಥಿಗಳ ವಯೋಮಿತಿ ಆಧಾರದ ಮೇಲೆ ಆನ್ಲೈನ್ ಬೋಧನೆ ಮಾಡಬೇಕು. ತಂತ್ರಜ್ಞಾನದ ಬಳಕೆ ಏಕೈಕ ಆಯ್ಕೆಯಾಗದೆ, ಇತರ ಕಾರ್ಯಸಾಧುವಾದ ಆಯ್ಕೆಗಳನ್ನು ಬಳಸಬೇಕು. ನೇರಪ್ರಸಾರ ಮಾತ್ರವಲ್ಲದೆ ಪಾಠಗಳನ್ನು ಮುಂಚಿತವಾಗಿ ಮುದ್ರಿಸಿ, ಕಲಿಸುವ ಪ್ರಕ್ರಿಯೆಗೂ ಒತ್ತು ನೀಡಬೇಕು ಎಂಬ ಮುಖ್ಯ ಅಂಶಗಳನ್ನು ಈ ವರದಿ ಒಳಗೊಂಡಿದ್ದು, ವರದಿಯ ಅಧ್ಯಯನದ ನಂತರ ಮುಂದಿನ ಕ್ರಮದ ಬಗ್ಗೆ ನಿರ್ಧರಿಸುವುದಾಗಿ ಶಿಕ್ಷಣ ಸಚಿವರು ಹೇಳಿದ್ದಾರೆ. ಅಲ್ಲದೆ, ಎನ್ಸಿಇಆರ್ಟಿ ಪಠ್ಯವನ್ನು ಶೇಕಡ 30ರಷ್ಟು ಕಡಿತಗೊಳಿಸಿರುವಂತೆಯೇ, ರಾಜ್ಯದ ಪಠ್ಯವನ್ನೂ ಶೇಕಡ 30ರಷ್ಟು ಕಡಿಮೆ ಮಾಡುವ ಆಶ್ವಾಸನೆಯನ್ನು ಸಚಿವರು ನೀಡಿದ್ದಾರೆ. ಆನ್ಲೈನ್ ಬೋಧನೆಗೆ ನಮ್ಮ ವ್ಯವಸ್ಥೆ, ಶಾಲೆಗಳು ಸೇರಿ ಎಲ್ಲ ಶೈಕ್ಷಣಿಕ ಸಂಸ್ಥೆಗಳು ಸನ್ನದ್ಧಗೊಂಡಿವೆಯೇ ಎಂಬುದು ಮುಖ್ಯವಾದ ಪ್ರಶ್ನೆ.
