ಭಾರತ ಆತಿಥ್ಯ ವಹಿಸುತ್ತಿರುವ ಈ ಶೃಂಗಸಭೆಯ ಕಾಲವು ಸವಾಲಿನಿಂದ ಕೂಡಿದೆ. ಪ್ರಸ್ತುತ ಜಾಗತಿಕ ಆರ್ಥಿಕ ಚಟುವಟಿಕೆಯಲ್ಲಿ ಮಂದಗತಿ ಇದೆ. ಭೌಗೋಳಿಕ- ರಾಜಕೀಯ ಬಿಕ್ಕಟ್ಟುಗಳೂ ಸಾಕಷ್ಟಿವೆ. ಕೋವಿಡ್ ಸಾಂಕ್ರಾಮಿಕ ರೋಗದಿಂದ 2 ವರ್ಷಗಳ ಕಾಲ ನಲುಗಿದ ಜಗತ್ತು ಚೇತರಿಸಿಕೊಳ್ಳುವ ಹೊತ್ತಿನಲ್ಲಿಯೇ ರಷ್ಯಾ- ಯೂಕ್ರೇನ್ ಸಮರ ಸಾಗಿದೆ. ಇದರಿಂದಾಗಿ ಆಹಾರ ಮತ್ತು ಸಾಮಗ್ರಿಗಳ ಪೂರೈಕೆ ಸರಪಳಿಗಳು ತುಂಡರಿಸಿವೆ. ಇಂಧನ ಬೆಲೆಗಳು ಗಗನಮುಖಿಯಾಗಿವೆ. ಬೆಲೆ ಏರಿಕೆಯಿಂದಾಗಿ ಜೀವನ ನಿರ್ವಹಣೆ ಕಷ್ಟಕರವಾಗುತ್ತಿದೆ. ಹವಾಮಾನ ಬದಲಾವಣೆ, ಭಯೋತ್ಪಾದನೆ, ಗಡಿ ಬಿಕ್ಕಟ್ಟು ಮೊದಲಾದ ಸಮಸ್ಯೆಗಳು ಬಾಧಿಸುತ್ತಿವೆ. ಹಸಿರು ಭವಿಷ್ಯಕ್ಕಾಗಿ, ಸುಸ್ಥಿರ ಅಭಿವೃದ್ಧಿಗಾಗಿ ಜಗತ್ತು ಎದುರು ನೋಡುತ್ತಿದೆ. ಈ ಹಿನ್ನೆಲೆಯಲ್ಲಿಯೇ ಭಾರತವು ತನ್ನ ಆಧ್ಯಾತ್ಮಿಕ ಪ್ರತಿಪಾದನೆಯಾದ ವಸುಧೈವ ಕುಟುಂಬಕಂ ಉಕ್ತಿಯನ್ನು ವಿಸ್ತರಿಸಿ, ‘ಒಂದು ಭೂಮಿ, ಒಂದು ಕುಟುಂಬ, ಒಂದು ಭವಿಷ್ಯ’ ಎಂಬ ಘೋಷಣೆಯನ್ನು ಜಿ 20 ಶೃಂಗಸಭೆಗೆ ನೀಡಿರುವುದು ಈ ಎಲ್ಲ ಜಾಗತಿಕ ಸಮಸ್ಯೆಗಳಿಗೆ ಪರಿಹಾರದ ಪ್ರಕಾಶವಾಗಿ ಗೋಚರಿಸುತ್ತದೆ.
