ಕರೊನಾ ಸೋಂಕು ಮತ್ತು ದಿಗ್ಬಂಧನ ತಂದೊಡ್ಡಿರುವ ಆರ್ಥಿಕ ಸಂಕಷ್ಟದ ವಿರುದ್ಧ ಹೋರಾಡಲು ಕೇಂದ್ರ ಸರ್ಕಾರ ಇತ್ತೀಚೆಗಷ್ಟೇ 20 ಲಕ್ಷ ಕೋಟಿ ರೂಪಾಯಿ ಪ್ಯಾಕೇಜ್ ಘೋಷಿಸಿ, ಶ್ರಮಿಕ, ರೈತ, ಸಣ್ಣ ಮತ್ತು ಮಧ್ಯಮ ಕೈಗಾರಿಕೆ ಸೇರಿ ಹಲವು ವಲಯಗಳಿಗೆ ನೆರವಾಗಿದೆ. ಇದರಿಂದ ಆರ್ಥಿಕ ಚಟುವಟಿಕೆಗಳು ಮತ್ತೆ ಸಾಮಾನ್ಯಗೊಳ್ಳಲು ನೆರವಾಗಲಿದೆ. ಈ ಹಿಂದೆ ಕೂಡ ಹಲವು ಚೇತರಿಕೆ ಕ್ರಮಗಳನ್ನು ಪ್ರಕಟಿಸಿದ್ದ ಆರ್ಬಿಐ ಶುಕ್ರವಾರ ಮತ್ತಷ್ಟು ಸೌಲಭ್ಯ, ವಿನಾಯ್ತಿಗಳನ್ನು ಘೋಷಿಸಿದೆ. ರೆಪೊ ದರದಲ್ಲಿ (ಆರ್ಬಿಐ ಬ್ಯಾಂಕುಗಳಿಗೆ ನೀಡುವ ಸಾಲದ ಮೇಲಿನ ಬಡ್ಡಿದರ) 40 ಅಂಶ ಕಡಿತ ಮಾಡಿ, ಶೇಕಡ 4ಕ್ಕೆ ನಿಗದಿ ಪಡಿಸಿದೆ. ರಿವರ್ಸ್ ರೆಪೊ ದರವನ್ನು ಶೇ.3.75ರಿಂದ ಶೇ.3.35ಕ್ಕೆ ಇಳಿಸಲಾಗಿದೆ. ಕಳೆದ ತಿಂಗಳಷ್ಟೇ ರೆಪೊ ದರದಲ್ಲಿ 75 ಅಂಶ ಕಡಿತ ಮಾಡಿ, ಶೇ.4.4ಕ್ಕೆ ನಿಗದಿ ಮಾಡಲಾಗಿತ್ತು. ಅದೇ ರೀತಿ ರಿವರ್ಸ್ ರೆಪೊ ದರ ಶೇ.025ರಷ್ಟು ಕಡಿತ ಮಾಡಿದ್ದರಿಂದ ಶೇ.3.75ಕ್ಕೆ ಇಳಿಸಲಾಗಿತ್ತು. ಅಲ್ಲದೆ, ಇಎಂಐ ಪಾವತಿಗೆ ನೀಡಿದ್ದ ಮೂರು ತಿಂಗಳ ಅವಕಾಶವನ್ನು ಮತ್ತೆ ಮೂರು ತಿಂಗಳಿಗೆ (ಆಗಸ್ಟ್ 31ರವರೆಗೆ) ವಿಸ್ತರಿಸಲಾಗಿದೆ. ಕರೊನಾ ಸಂಕಷ್ಟ ಹಿನ್ನೆಲೆಯಲ್ಲಿ ದೇಶದ ರಫ್ತು ಪ್ರಮಾಣ ಶೇ.60.5 ಕಡಿಮೆ ಆಗಿದೆ. ಕೈಗಾರಿಕೆ ಉತ್ಪಾದನೆಯೂ ಕುಸಿದಿದೆ.
