ಇದಲ್ಲದೆ, ರಾಷ್ಟ್ರಪತಿಗಳಿಗೆ ಕಾರ್ಯಕ್ರಮಕ್ಕೆ ಆಹ್ವಾನವನ್ನೂ ನೀಡದಿರುವುದು ಆ ಅತ್ಯುನ್ನತ ಹುದ್ದೆಯನ್ನು ಅಪಮಾನಿಸಿದಂತೆ ಎಂಬುದು ಅವುಗಳ ಟೀಕೆ. ಜತೆಗೆ, ಸಾವರ್ಕರ್ ಜನ್ಮದಿನದಂದು ಉದ್ಘಾಟನೆ ಹಮ್ಮಿಕೊಳ್ಳುವ ಜರೂರತ್ತು ಏನಿತ್ತು? ಸಂವಿಧಾನ ಜಾರಿಗೆ ಬಂದ ಜನವರಿ 26ರಂದು ಆಗಬಹುದಿತ್ತಲ್ಲ ಎಂದೂ ವಿಪಕ್ಷಗಳು ಹೇಳುತ್ತಿವೆ. ಆಡಳಿತ ಪಕ್ಷ ಇದಕ್ಕೆ ಸಮಜಾಯಿಷಿ ನೀಡಿ ತನ್ನ ಕ್ರಮವನ್ನು ಸಮರ್ಥಿಸಿಕೊಂಡಿದೆ. ಸಂಸತ್ ಭವನವನ್ನು ಪ್ರಧಾನಿ ಉದ್ಘಾಟಿಸಬೇಕೇ ಅಥವಾ ರಾಷ್ಟ್ರಪತಿ ಉದ್ಘಾಟಿಸಬೇಕೆ ಎಂಬ ವಿಷಯವಾಗಿ ಸಂವಿಧಾನದಲ್ಲಿ ಉಲ್ಲೇಖವೇನೂ ಇಲ್ಲ. ಕೆಲ ತಜ್ಞರ ಪ್ರಕಾರ, ದೇಶದ ಮುಖ್ಯಸ್ಥರಾಗಿರುವುದರಿಂದ ರಾಷ್ಟ್ರಪತಿ ಉದ್ಘಾಟಿಸುವುದು ಸೂಕ್ತ. ಇನ್ನು ಕೆಲವರ ಪ್ರಕಾರ, ಪ್ರಧಾನಿಯೇ ಸೂಕ್ತ. ಹೀಗಾಗಿ ಈ ವಿಚಾರದಲ್ಲಿ ಸ್ಪಷ್ಟತೆ ಇಲ್ಲ. ಇದೇನೇ ಇದ್ದರೂ, ವಿಪಕ್ಷಗಳು ಸಮಾರಂಭ ಬಹಿಷ್ಕರಿಸುವಂತಹ ನಿರ್ಣಯ ತಳೆದಿರುವುದು ಅಷ್ಟು ಸೂಕ್ತವಲ್ಲ ಎಂದೇ ಹೇಳಬೇಕಾಗುತ್ತದೆ. ಸರ್ಕಾರದ ನಡೆಗೆ ತಕರಾರು ಇದ್ದರೆ ಅದನ್ನು ವ್ಯಕ್ತಪಡಿಸಲು ಬೇರೆ ಬೇರೆ ಹಾದಿಗಳಿವೆ. ಜಾಗತಿಕ ದೇಶಗಳು ಭಾರತದ ಈ ವಿದ್ಯಮಾನವನ್ನು ಸೂಕ್ಷ್ಮವಾಗಿ ಗಮನಿಸುತ್ತಿವೆ ಎಂಬುದನ್ನು ಜನಪ್ರತಿನಿಧಿಗಳು ಮರೆಯಬಾರದು.
