ಜಮೀನು, ನಿವೇಶನ ಮಾರಾಟದಲ್ಲಿ ವಂಚನೆ ತಡೆಯುವ ನಿಟ್ಟಿನಲ್ಲಿ ಕಾನೂನುಬದ್ಧವಾಗಿ ಭೂದಾಖಲೆಗಳನ್ನು ಪರಿಶೀಲಿಸಿ ಖರೀದಿದಾರರಿಗೆ ಅಧಿಕೃತ ಮಾಹಿತಿ ಒದಗಿಸಲು ಏಜೆನ್ಸಿಗಳನ್ನು ಸ್ಥಾಪಿಸಲು ರಾಜ್ಯ ಸರ್ಕಾರ ಮುಂದಾಗಿರುವುದು ಕಂದಾಯ ಆಡಳಿತದಲ್ಲಿ ಮತ್ತೊಂದು ಪ್ರಮುಖ ನಿರ್ಧಾರವಾಗಿದ್ದು, ಸೂಕ್ತ ರೀತಿಯಲ್ಲಿ ಅನುಷ್ಠಾನಕ್ಕೆ ತಂದರೆ ಇದೊಂದು ಜನಸ್ನೇಹಿ ವ್ಯವಸ್ಥೆಯಾಗಿ ರೂಪುಗೊಳ್ಳುವುದು ನಿಶ್ಚಿತ. ಭೂಮಿ ಖರೀದಿಯಲ್ಲಿ ಎಣೆಯಿಲ್ಲದಷ್ಟು ಅಕ್ರಮ, ಅವ್ಯವಹಾರ, ವಂಚನೆಗಳು ನಿರಂತರವಾಗಿ ವರದಿಯಾಗುತ್ತಲೇ ಇರುತ್ತವೆ. ಜಮೀನಿನ ನೈಜ ಮಾಲಿಕರ ಬದಲು ಪಹಣಿ ಪತ್ರಿಕೆಯಲ್ಲಿ ಇನ್ನಾರದೋ ಹೆಸರು ಇರುತ್ತದೆ. ಒಂದೇ ನಿವೇಶನವನ್ನು ಅನೇಕರ ಹೆಸರಲ್ಲಿ ನೋಂದಣಿ ಮಾಡಲಾಗುತ್ತದೆ. ಖಾಲಿ ನಿವೇಶನಗಳ ನಕಲಿ ದಾಖಲೆಗಳನ್ನು ಸೃಷ್ಟಿಸಿ ಮಾರಾಟ ಮಾಡಲಾಗುತ್ತದೆ. ಸಿಎ (ನಾಗರಿಕ ಸೌಲಭ್ಯ) ನಿವೇಶನಗಳನ್ನು ಕೂಡ ಮಾರಾಟ ಮಾಡಲಾಗುತ್ತದೆ. ಹೀಗೆ ತರಹೇವಾರಿ ರೀತಿಯಲ್ಲಿ ಭೂ ಮಾರಾಟದಲ್ಲಿ ವಂಚನೆ ನಡೆಯುತ್ತಲೇ ಇದೆ. ಸಾಮಾನ್ಯವಾಗಿ ಜನರು ಯಾವುದೇ ಜಮೀನು ಅಥವಾ ನಿವೇಶನ ಖರೀದಿಸುವಾಗ ವಕೀಲರ ಬಳಿ ಕಾನೂನು ಅಭಿಪ್ರಾಯ ಪಡೆದುಕೊಳ್ಳುತ್ತಾರೆ. ಖರೀದಿಸುವ ಭೂಮಿಗೆ ಸಾಲ ಪಡೆಯಲು ಮುಂದಾದರೆ ಬ್ಯಾಂಕ್ಗಳೇ ಸೂಚಿಸಿದ ವಕೀಲರಿಂದ ಲೀಗಲ್ ಒಪಿನಿಯನ್ ಪಡೆದುಕೊಳ್ಳಬೇಕಾಗುತ್ತದೆ. ಈ ವಕೀಲರು ದಾಖಲೆಗಳನ್ನು ಪರಿಶೀಲಿಸಿ ಜಮೀನು ಖರೀದಿಗೆ ಯೋಗ್ಯವಾಗಿದೆ ಎಂದು ಅಭಿಪ್ರಾಯ ನೀಡಿದರೂ ವಂಚನೆ ಆಗುವುದಿಲ್ಲ ಎಂಬ ಖಾತರಿ ಇರುವುದಿಲ್ಲ. ಏಕೆಂದರೆ, ಒಬ್ಬ ವ್ಯಕ್ತಿ ಜಮೀನು ಅಥವಾ ನಿವೇಶನ ಖರೀದಿಸಿದ ನಂತರ ಅದು ಉತಾರದಲ್ಲಿ ದಾಖಲಾಗಲು 30ರಿಂದ 45 ದಿನಗಳ ಕಾಲಾವಕಾಶ ಬೇಕಾಗುತ್ತದೆ. ಈ ಅವಧಿಯಲ್ಲಿ ಜಮೀನನ್ನು ಬೇರೊಬ್ಬರಿಗೆ ಮಾರುವ ಸಂಚನ್ನು ವಂಚಕರು ರೂಪಿಸುವ ಸಾಧ್ಯತೆಗಳು ಇರುತ್ತವೆ. ಅಲ್ಲದೆ, ವಕೀಲರು ದಾಖಲೆ ಪರಿಶೀಲಿಸುವ ರೀತಿಯನ್ನು ಬಲ್ಲ ವಂಚಕರು ಅದಕ್ಕೆ ತಕ್ಕಂತೆಯೇ ದಾಖಲೆಗಳನ್ನು ಸೃಷ್ಟಿಸುವ ಕಲೆಯನ್ನು ಕರಗತ ಮಾಡಿಕೊಂಡಿರುತ್ತಾರೆ.
