ಈ ಅಧಿಕಾರ ಹಂಚಿಕೆ ಸೂತ್ರದ ಮತ್ತೊಂದು ಸಮಸ್ಯೆ ಎಂದರೆ ಆಂತರಿಕ ಒಪ್ಪಂದದ ಪ್ರಕಾರ ಯಾರಾದರೂ ಅಧ್ಯಕ್ಷ ಸ್ಥಾನಕ್ಕೆ ರಾಜೀನಾಮೆ ನೀಡದಿದ್ದರೆ ಕಾನೂನು ಸಮರ ಆರಂಭವಾಗುತ್ತದೆ. ಇಂತಹ ಹಲವಾರು ನಿದರ್ಶನಗಳು ರಾಜ್ಯದಲ್ಲಿ ಇದ್ದು, ಕಾನೂನು ಸಮರದ ಕಾಲದಲ್ಲಿ ಆಡಳಿತ ವ್ಯವಸ್ಥೆ ಹಳಿ ತಪ್ಪುತ್ತಿದೆ. ಈ ಅಲಿಖಿತ ಅಧಿಕಾರ ಹಂಚಿಕೆ ಸೂತ್ರದ ದುಷ್ಪರಿಣಾಮ ಸರ್ಕಾರದ ಗಮನಕ್ಕೆ ಬಂದಿರಲಿಕ್ಕೂ ಸಾಕು. ಈ ಕಾರಣದಿಂದಲೋ ಏನೋ ಅಧ್ಯಕ್ಷ-ಉಪಾಧ್ಯಕ್ಷರ ಅವಧಿಯನ್ನು 60 ತಿಂಗಳಿಗೆ ವಿಸ್ತರಿಸಲು ಚಿಂತನೆ ಮಾಡಿರುವುದು ಒಳ್ಳೆಯ ಬೆಳವಣಿಗೆ. ಆದರೆ, ಸರ್ಕಾರ ಏನೇ ಮಾಡಿದರೂ ರಂಗೋಲಿ ಕೆಳಗೆ ನುಸುಳುವವರು ಇದ್ದೇ ಇರುತ್ತಾರೆ. ಹೀಗಾಗಿ, ಬೆರಳೆಣಿಕೆ ತಿಂಗಳ ಲೆಕ್ಕದಲ್ಲಿ ಅಧಿಕಾರ ಹಂಚುವ ಅವಕಾಶ ಇಲ್ಲದಂತೆ, ಅವಧಿಪೂರ್ಣ (60 ತಿಂಗಳು) ಆಡಳಿತ ನಡೆಸಲು ಅನುವಾಗುವಂತೆ ಕಾಯ್ದೆ ರೂಪಿಸುವುದು ಒಳ್ಳೆಯದು. ಹಾಗೆಯೇ 60 ತಿಂಗಳು ಸಿಕ್ಕಿದೆ ಎಂದು ಬೇಕಾಬಿಟ್ಟಿ ಆಡಳಿತ ನಡೆಸುವ ಅಧ್ಯಕ್ಷ - ಉಪಾಧ್ಯಕ್ಷರಿಗೂ ಕಡಿವಾಣ ಹಾಕುವ ಅಸ್ತ್ರವೂ ಇರಬೇಕಾಗುತ್ತದೆ.
