ಮಹಿಳೆಯರ ಹೆಸರಿನಲ್ಲಿ ಪುರುಷರೇ ಆಡಳಿತ ನಡೆಸುವಂತಹ ಪರಿಸ್ಥಿತಿ ನಿಯಂತ್ರಿಸುವುದೇ ಮೀಸಲು ನಿಗದಿ ನಂತರ ಎದುರಾಗುವ ಸವಾಲು. ಸ್ಥಳೀಯ ಸಂಸ್ಥೆಗಳಲ್ಲಿ ಮಹಿಳಾ ಮೀಸಲು ಕ್ಷೇತ್ರಗಳಿಂದ ಆಯ್ಕೆಯಾಗುವ ಸದಸ್ಯರು ನೆಪಮಾತ್ರವಾಗಿದ್ದು, ಅವರ ಪತಿ ಇಲ್ಲವೇ ಮಕ್ಕಳೇ ಅಧಿಕಾರ ಚಲಾಯಿಸಿದ ನಿದರ್ಶನಗಳು ಇಲ್ಲದಿಲ್ಲ. ಪಂಚಾಯತ್ ರಾಜ್ ವ್ಯವಸ್ಥೆಯಲ್ಲಿ ಇಂಥ ಹಲವು ಪ್ರಕರಣಗಳು ವರದಿಯಾಗಿವೆ. ಗ್ರಾಮ ಪಂಚಾಯಿತಿ, ತಾಲೂಕು ಪಂಚಾಯಿತಿ, ಜಿಲ್ಲಾ ಪಂಚಾಯಿತಿಗಳಲ್ಲಿ ಮಹಿಳಾ ಮೀಸಲು ಕಾರಣಕ್ಕೆ ಸ್ಪರ್ಧೆಯ ಅವಕಾಶ ಕಳೆದುಕೊಂಡವರು ತಮ್ಮಪತ್ನಿ ಇಲ್ಲವೇ ಮಗಳನ್ನು ಕಣಕ್ಕಿಳಿಸಿ, ಗೆದ್ದ ನಂತರ ಅವರ ಹೆಸರಿನಲ್ಲಿ ಪುರುಷರೇ ಆಡಳಿತ ನಡೆಸಿದ್ದಾರೆ. ಅಧಿಕಾರಿಗಳೂ ಕೂಡ ಮಹಿಳಾ ಸದಸ್ಯರನ್ನು ಪರಿಗಣಿಸದೆ ಅವರ ಪತಿ ಇಲ್ಲವೇ ತಂದೆಯ ಮಾತಿಗೆ ಮನ್ನಣೆ ನೀಡಿದ ನಿದರ್ಶನಗಳೂ ಇವೆ. ಸ್ಥಳೀಯ ಸಂಸ್ಥೆಗಳಿರಲಿ, ಶಾಸನಸಭೆಗಳಿರಲಿ ಮಹಿಳಾ ಮೀಸಲು ಕ್ಷೇತ್ರಗಳಲ್ಲಿ ಆಯ್ಕೆಯಾದ ಸದಸ್ಯರ ಅಧಿಕಾರವನ್ನು ಅವರ ಕುಟುಂಬದ ಸದಸ್ಯರು ಹೇಗೆ ದುರ್ಬಳಕೆ ಮಾಡಿಕೊಂಡಿದ್ದಾರೆ? ಮಹಿಳೆ ಹೆಸರಿನಲ್ಲಿ ಹೇಗೆ ಹಿಂಬಾಗಿಲಿನಿಂದ ಅಧಿಕಾರ ಚಲಾಯಿಸಲಾಗುತ್ತಿದೆ? ಈ ರೀತಿಯ ಅಧಿಕಾರ ದುರ್ಬಳಕೆಗೆ ಹೇಗೆ ಕಡಿವಾಣ ಹಾಕಬೇಕು ಎಂಬುದೂ ಸ್ಪಷ್ಟವಾಗಬೇಕು. ಹಾಗೆಯೇ ಮಹಿಳಾ ಮೀಸಲು ಉದ್ದೇಶ ಈಡೇರಬೇಕಾದರೆ ದುರ್ಬಳಕೆ ಮಾಡಿಕೊಂಡವರನ್ನು ಶಿಕ್ಷೆಗೆ ಗುರಿಪಡಿಸುವುದು ಸೂಕ್ತವೂ ಹೌದು.
