2019ರಲ್ಲಿ ರಾಜ್ಯಕ್ಕೆ ವಿಶೇಷ ಸ್ಥಾನಮಾನ ಹಿಂತೆದುಕೊಂಡ ನಂತರ ಭಯೋತ್ಪಾದಕ ಹಿಂಸಾಚಾರ ಘಟನೆಗಳು ಮತ್ತು ಭದ್ರತಾ ಸಿಬ್ಬಂದಿಯ ಹತ್ಯೆ ಪ್ರಕರಣಗಳು ಸರಿಸುಮಾರು 50 ಪ್ರತಿಶತದಷ್ಟು ಕಡಿಮೆಯಾಗಿದೆ ಎಂದು ಸರ್ಕಾರ ಹೇಳಿದೆ. ಕಲ್ಲು ತೂರಾಟ ಘಟನೆಗಳು ಬಹುತೇಕ ಮಾಯವಾಗಿದ್ದು, ಕಾನೂನು ಮತ್ತು ಸುವ್ಯವಸ್ಥೆ ನಿಯಂತ್ರಣದಲ್ಲಿದೆ ಎಂದು ಅಂಕಿ-ಅಂಶಗಳು ಸೂಚಿಸುತ್ತವೆ. ಈ ಹಿನ್ನೆಲೆಯಲ್ಲಿ ಕಾಶ್ಮೀರದ ಸಾಮಾನ್ಯ ಸ್ಥಿತಿಯತ್ತ ಸಾಗುತ್ತಿರುವುದರ ಬಗೆಗೆ ಹೇಳಿಕೊಳ್ಳುವುದಲ್ಲದೆ, ಅದು ಬಹಿರಂಗವಾಗಿ ಗೋಚರಿಸುವಂತೆ ಮಾಡುವ ಉದ್ದೇಶವು ಸೇನೆಯನ್ನು ಒಳನಾಡು ಪ್ರದೇಶಗಳಿಂದ ಹಿಂತೆಗೆದುಕೊಳ್ಳುವ ಆಲೋಚನೆಯ ಹಿಂದಿದೆ. ಸಂಪೂರ್ಣ ಸೇನೆಯನ್ನು ಏಕಕಾಲದಲ್ಲಿ ಹಿಂತೆಗೆದುಕೊಳ್ಳದೆ, ಹಂತಹಂತವಾಗಿ ಒಂದೊಂದೇ ಜಿಲ್ಲೆಯಿಂದ ಹಿಂದೆಗೆಯಲು ಹಾಗೂ ಸೇನಾಪಡೆಯ ಬದಲು ಸಿಆರ್ಪಿಎಫ್ (ಕೇಂದ್ರೀಯ ಮೀಸಲು ಪೊಲೀಸ್ ಪಡೆ) ಸಿಬ್ಬಂದಿಯನ್ನು ನಿಯೋಜಿಸಲು ಉದ್ದೇಶಿಸಿರುವುದು ಸಮಯೋಚಿತ ಹಾಗೂ ಮುಂಜಾಗ್ರತೆಯ ಆಲೋಚನೆಯೇ ಆಗಿದೆ. ಏಕೆಂದರೆ, ಕಾಶ್ಮೀರ ಕಣಿವೆಯಲ್ಲಿ ಭಯೋತ್ಪಾದನೆ ಕೃತ್ಯಗಳು ತಗ್ಗಿವೆ ಹೊರತು ಸಂಪೂರ್ಣ ಸ್ಥಗಿತಗೊಂಡಿಲ್ಲ. ಆದರೂ, ಸೇನೆ ಹಿಂತೆಗೆದುಕೊಳ್ಳುವ ಪ್ರಸ್ತಾಪವನ್ನು ಜಾರಿಗೊಳಿಸುವ ನಿಟ್ಟಿನಲ್ಲಿ ಮಹತ್ವದ ಸಂಗತಿಯೊಂದು ಅನುಕೂಲಕರವಾಗಿ ಪರಿಣಮಿಸಬಹುದಾಗಿದೆ. ಅದೆಂದರೆ, ಪಾಕಿಸ್ತಾನವು ಸದ್ಯ ಆರ್ಥಿಕವಾಗಿ ದಿವಾಳಿ ಸ್ಥಿತಿಯತ್ತ ಸಾಗಿರುವುದು ಹಾಗೂ ಕಾಶ್ಮೀರದ ಭಯೋತ್ಪಾದನೆಯನ್ನು ಪೋಷಿಸಿಕೊಂಡು ಬಂದಿರುವ ಈ ವೈರಿ ರಾಷ್ಟ್ರವೇ ಈಗ ಭಯೋತ್ಪಾದನೆ ದುಷ್ಕೃತ್ಯಗಳಿಂದ ತತ್ತರಿಸಿರುವುದು. ಕಾಶ್ಮೀರದಲ್ಲಿ ತಗ್ಗಿಸಬಹುದಾದ ಸೇನಾಬಲವನ್ನು ಚೀನಾದ ಗಡಿಗಳತ್ತ ನಿಯೋಜನೆ ಮಾಡುವ ಸಾಧ್ಯತೆ ಬಗ್ಗೆ ರಕ್ಷಣಾ ತಜ್ಞರು ಗಮನಸೆಳೆದಿದ್ದಾರೆ.
