ಕಾಂಗ್ರೆಸ್ ಘೋಷಿಸಿದ ಗ್ಯಾರಂಟಿ ಯೋಜನೆಗಳ ಪರ-ವಿರೋಧ ಅಭಿಪ್ರಾಯಗಳು ಏನೇ ಇರಲಿ, ಸಾಮಾನ್ಯವಾಗಿ ಇಂಥ ಬೃಹತ್ ಯೋಜನೆಗಳನ್ನು ಜಾರಿಮಾಡಲು ಹೊರಟಾಗ ಸಮಸ್ಯೆಗಳು, ಗೊಂದಲಗಳು ಏರ್ಪಡುವುದು ಸಹಜ. ಸರ್ಕಾರದ ಯೋಜನೆಗಳ ದೈನಂದಿನ ವ್ಯವಹಾರಗಳಲ್ಲಿಯೇ ತಾಂತ್ರಿಕ ತೊಂದರೆಗಳು ಮಾಮೂಲು ಎನ್ನುವಂತಾಗಿರುವಾಗ, ಇಂಥ ದೊಡ್ಡ ಯೋಜನೆಗಳು ಬಂದಾಗ ಅಡೆತಡೆ ಸಹಜವೇ. ಆದರೆ ಈ ಸಮಸ್ಯೆಗಳನ್ನು ಎಷ್ಟು ಬೇಗ ಸರಿಪಡಿಸಿ, ಜನರಿಗೆ ಅನುಕೂಲ ಮಾಡಿಕೊಡಲಾಗುತ್ತದೆ ಎಂಬುದು ಮುಖ್ಯ. ಹಾಗಾಗದಿದ್ದ ಪಕ್ಷದಲ್ಲಿ, ಯೋಜನೆಗೆ ನೋಂದಣಿ ಮಾಡಿಕೊಳ್ಳುವುದೇ ದೊಡ್ಡ ಪ್ರಯಾಸವಾಗಿಬಿಡುತ್ತದೆ; ಈ ಕಸರತ್ತಿನ ನಡುವೆ ಅರ್ಹರು ಸಹ ಯೋಜನೆಯ ವ್ಯಾಪ್ತಿಯಿಂದ ಹೊರಗುಳಿಯಬಹುದಾದ ಸಾಧ್ಯತೆ ಕೂಡ ಇರುತ್ತದೆ. ಜತೆಗೆ, ಯೋಜನೆ ಬಗ್ಗೆ ಜನರಿಗೆ ಸರಿಯಾದ ಮಾಹಿತಿ ನೀಡುವುದು ಕೂಡ ಮುಖ್ಯ. ಏಕೆಂದರೆ, ಮಧ್ಯವರ್ತಿಗಳು ಹುಟ್ಟಿಕೊಂಡು ಜನರಿಂದ ಹಣ ಪೀಕುವ ಸಾಧ್ಯತೆಗಳು ಹೆಚ್ಚಿರುತ್ತವೆ. ಹಿಂದೆ ಇಂಥ ಎಷ್ಟೋ ಪ್ರಕರಣಗಳು ಬೆಳಕಿಗೆ ಬಂದಿದ್ದಿದೆ. ಗೃಹಜ್ಯೋತಿ ಯೋಜನೆಯಲ್ಲಿ ಭ್ರಷ್ಟಾಚಾರ ನಡೆಯಬಹುದಾದ ಸಂಭವನೀಯತೆ ಹಿನ್ನೆಲೆಯಲ್ಲಿ, ಲೋಕಾಯುಕ್ತ ಅಧಿಕಾರಿಗಳು ಬೆಂಗಳೂರಿನಲ್ಲಿ ಬೆಸ್ಕಾಂ ಅಧಿಕಾರಿಗಳ ಜತೆ ಸಭೆ ನಡೆಸಿ, ಯೋಜನೆಯನ್ನು ಜನರಿಗೆ ತಲುಪಿಸುವಲ್ಲಿ ಪಾರದರ್ಶಕತೆ ಕಾಯ್ದುಕೊಳ್ಳುವಂತೆ ಹಾಗೂ ಅಕ್ರಮ ನಡೆಯದಂತೆ ಕಟ್ಟೆಚ್ಚರ ವಹಿಸಲು ಸೂಚನೆ ನೀಡಿರುವುದು ಗಮನಾರ್ಹ.
