ಅನ್ಯರಾಜ್ಯಗಳೊಂದಿಗಿನ ವಿವಾದ, ತಂಟೆಗಳ ವಿಷಯದಲ್ಲಿ ಕರ್ನಾಟಕ ಮೆಲುದನಿಯಲ್ಲೇ ಮಾತನಾಡುತ್ತಿತ್ತು. ಆದರೆ, ನೀರಾವರಿ ಯೋಜನೆಗಳು ಮತ್ತು ಇತರ ಅಭಿವೃದ್ಧಿ ಯೋಜನೆಗಳ ವಿಚಾರದಲ್ಲಿ ನೆರೆ ರಾಜ್ಯಗಳ ಅನಗತ್ಯ ಕಿರಿಕಿರಿ ಹೆಚ್ಚಿರುವುದರಿಂದ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಆಂಧ್ರಪ್ರದೇಶದ ತಿರುಪತಿಯಲ್ಲಿ ನಡೆದ ದಕ್ಷಿಣ ವಲಯ ಪರಿಷತ್ತಿನ ಸಭೆಯಲ್ಲಿ ಖಡಕ್ ಆಗಿಯೇ ಮಾತನಾಡಿದ್ದಾರೆ. ಇಂಥದ್ದೊಂದು ಸ್ಪಷ್ಟಸಂದೇಶದ ಅಗತ್ಯವೂ ಇತ್ತು. ಇಲ್ಲದಿದ್ದರೆ, ಕರ್ನಾಟಕದ ಸೌಹಾರ್ದ, ಮೃದುಧೋರಣೆಯನ್ನು ದೌರ್ಬಲ್ಯವೆಂದು ಭಾವಿಸುವ ಸಾಧ್ಯತೆ ಇತ್ತು. ‘ನೀರಾವರಿ ಯೋಜನೆಗಳ ವಿಚಾರವಾಗಿ ನೆರೆಹೊರೆ ರಾಜ್ಯಗಳಿಗೆ ಕರ್ನಾಟಕ ಎಲ್ಲ ರೀತಿಯ ಸಹಕಾರ ನೀಡುತ್ತಿದೆ, ಹಾಗೆಯೇ ನಮ್ಮ ಯೋಜನೆಗಳಿಗೆ ಅಡ್ಡಿಪಡಿಸಿದರೆ ನಮ್ಮದೂ ಆಕ್ಷೇಪ ಎದುರಿಸಬೇಕಾಗುತ್ತದೆ. ಜಲನ್ಯಾಯ ಮಂಡಳಿ ತೀರ್ಪು ಉಲ್ಲಂಘಿಸಿ ಬೃಹತ್ ಮಟ್ಟದ ಶಾಶ್ವತ ಯೋಜನೆಗಳಿಗೆ ಶಾಸನಬದ್ಧ ಅನುಮೋದನೆ ನೀಡಬಾರದು’ ಎಂದು ಮುಖ್ಯಮಂತ್ರಿಗಳು ಸ್ಪಷ್ಟವಾಗಿ ಹೇಳಿದ್ದಾರೆ. ತುಂಗಭದ್ರಾ ನದಿಗೆ ಅಡ್ಡಲಾಗಿ ಆಂಧ್ರಪ್ರದೇಶ ನಿರ್ವಿುಸುತ್ತಿರುವ ಗುಂಡ್ರವೇಲು ಯೋಜನೆ ವಿಷಯವನ್ನೂ ಪ್ರಸ್ತಾಪಿಸಿದ್ದಾರೆ. ಅಲ್ಲದೆ, ಸಹ ಜಲಾನಯನ ಪ್ರದೇಶಗಳನ್ನು ಹೊಂದಿರುವ ರಾಜ್ಯಗಳ ಪಾಲನ್ನು ನಿರ್ಧರಿಸಿಲ್ಲದಿದ್ದರೂ, ತಮಿಳುನಾಡು ಕಾವೇರಿ-ವಗೈ-ಗುಂಡಾರ್ ಸಂಪರ್ಕ ಕಾಮಗಾರಿ ಮುಂದುವರಿಸಿರುವುದು ಚರ್ಚೆಗೆ ಗ್ರಾಸವಾಗಿದೆ.
