ಶಿವಮೊಗ್ಗ ಜಿಲ್ಲೆಯಲ್ಲಿ ಅಡಕೆ, ಭತ್ತ, ಮೆಕ್ಕೆಜೋಳ, ಶುಂಠಿ, ಚಿಕ್ಕಮಗಳೂರು ಜಿಲ್ಲೆಯಲ್ಲಿ ಕಾಫಿ, ಹಾಸನ ಜಿಲ್ಲೆಯಲ್ಲಿ ರಾಗಿ ಜೋಳ, ಕಾಫಿ, ಕಾಳುಮೆಣಸು, ಮಂಡ್ಯದಲ್ಲಿ ಭತ್ತ, ರಾಗಿ, ಕಲಬುರಗಿ, ಬೀದರ್ ಸೇರಿದಂತೆ ಕಲ್ಯಾಣ ಕರ್ನಾಟಕ ಪ್ರದೇಶದ ಜಿಲ್ಲೆಗಳಲ್ಲಿ ತೊಗರಿ, ಜೋಳ, ಈರುಳ್ಳಿ ಬೆಳೆಗಳು ಮಳೆಯಿಂದ ಹಾನಿಗೊಳಗಾಗಿವೆ. ಬೆಳೆಹಾನಿ ಮಾತ್ರವಲ್ಲ ಹಲವು ಜಿಲ್ಲೆಗಳಲ್ಲಿ ಕೃಷಿಗೆ ಆಧಾರವಾಗಿದ್ದ ಸಾಕುಪ್ರಾಣಿಗಳು ಬಲಿಯಾಗಿವೆ. ಕೆಲವೆಡೆ ಆಸ್ತಿಪಾಸ್ತಿ ಹಾನಿ, ಜೀವಹಾನಿಯ ಘಟನೆಗಳೂ ವರದಿಯಾಗಿವೆ. ಹಿಂಗಾರು ಬೆಳೆಗಳು ಕೈಹಿಡಿಯಲಿವೆ ಎಂಬ ನಿರೀಕ್ಷೆಯಲ್ಲಿದ್ದ ರೈತರು ನಿರಾಶರಾಗಿದ್ದಾರೆ. ವಾಯುಭಾರ ಕುಸಿತವೇ ಅಕಾಲಿಕ ಮಳೆಗೆ ಕಾರಣವಾಗಿದ್ದು, ಹಾನಿಯ ನಿಖರ ಪ್ರಮಾಣ ಮುಂದಿನ ದಿನಗಳಲ್ಲಿ ಗೊತ್ತಾಗಲಿದೆ. ಕೃಷಿರಂಗದ ಪಾಲಿಗೆ ಇದು ಮಗದೊಂದು ಆಘಾತ. ಕರೊನಾ ಸೋಂಕಿನ ಹಾವಳಿ ಮತ್ತು ಅದನ್ನು ನಿಯಂತ್ರಿಸಲು ಜಾರಿಗೆ ತರಲಾದ ಲಾಕ್ಡೌನ್ ಪರಿಣಾಮ ಹಲವು ರಂಗಗಳಂತೆ ಕೃಷಿರಂಗವೂ ತುಂಬ ನಷ್ಟ ಅನುಭವಿಸಿದೆ. ಈಗ ಗಾಯದ ಮೇಲೆ ಬರೆ ಎಳೆದಂತೆ ಅಕಾಲಿಕ ಮಳೆಯ ಅಬ್ಬರ.
