ಬೇಸಿಗೆಯ ಮುನ್ನವೇ ನದಿ, ಕೆರೆಗಳ ಒಡಲು ಖಾಲಿ ಆಗುತ್ತಿರುವುದನ್ನು ಮನಗಂಡು ನೀರನ್ನು ಹಿತಮಿತವಾಗಿ ಬಳಸುವಂತೆ ಸರ್ಕಾರ ಈಗಾಗಲೇ ಸೂಚಿಸಿದೆ. ಕಾವೇರಿ ಕಣಿವೆಯ ಪ್ರಮುಖ ನಾಲ್ಕು ಜಲಾಶಯಗಳಲ್ಲಿಯೂ ನೀರು ಸಂಗ್ರಹ ಈ ವರ್ಷ ಅರ್ಧದಷ್ಟು ಅಂದರೆ 59 ಟಿಎಂಸಿಗೆ ಕುಸಿದಿದೆ. ಸಮಸ್ಯೆ ಬಂದಾಗ ಮಾತ್ರ ಪರಿಹಾರಕ್ಕೆ ತಡಕಾಡುವ ಪದ್ಧತಿ ಬದಲಾಗಬೇಕು. ನದಿಗಳ ನಿರ್ವಹಣೆಗೆ, ಕೆರೆಗಳ ಸಂರಕ್ಷಣೆಗೆ ಸ್ಪಷ್ಟವಾದ ನೀತಿ ರೂಪಿಸಿ, ಅನುಷ್ಠಾನಕ್ಕೆ ತರಬೇಕು. ಕೆರೆಗಳ ಹೂಳು ತೆಗೆದರೆ ಹಲವು ವರ್ಷಗಳ ಕಾಲ ನೀರಿನ ಸಂಗ್ರಹಕ್ಕೆ ಅನುಕೂಲವಾಗುತ್ತದೆ. ಆದರೆ, ಬಹುತೇಕ ಕೆರೆಗಳ ಹೂಳು ತೆಗೆಯದೆ ಅದೆಷ್ಟೋ ವರ್ಷಗಳೇ ಕಳೆದಿವೆ. ಉದ್ಯೋಗ ಖಾತ್ರಿ ಯೋಜನೆಯಡಿ ಕೆರೆಗಳ ಹೂಳು ಎತ್ತುವ ಕಾರ್ಯವನ್ನು ಇನ್ನೂ ಪರಿಣಾಮಕಾರಿಯಾಗಿ ಕೈಗೆತ್ತಿಕೊಂಡರೆ, ಕೆರೆಗಳ ಸ್ವಚ್ಛತೆ ಜತೆಗೆ ಹೆಚ್ಚು ಮಾನವದಿನಗಳನ್ನು ಸೃಷ್ಟಿಸಿ, ಕಾರ್ವಿುಕರಿಗೆ ಕೆಲಸ ಒದಗಿಸಲು ಸಾಧ್ಯವಾಗುತ್ತದೆ. ಒಟ್ಟಾರೆ, ಕೆರೆಗಳನ್ನು ಸಂರಕ್ಷಿಸುವುದು ಮತ್ತು ಅವುಗಳನ್ನು ಮುಂದಿನ ಪೀಳಿಗೆಗೆ ಉಳಿಸುವುದು ಎಲ್ಲರ ಕರ್ತವ್ಯ. ಇಲ್ಲಿ ಸರ್ಕಾರದ ಪಾತ್ರವಂತೂ ಪ್ರಮುಖವಾಗಿದೆ. ಜತೆಗೆ, ಸಾರ್ವಜನಿಕರು ಸ್ವಯಂಪ್ರೇರಿತವಾಗಿ ಕೆರೆಗಳ ಸಂರಕ್ಷಣೆಯಲ್ಲಿ ತೊಡಗಿಕೊಳ್ಳಬೇಕು, ಇದು ಜನಾಂದೋಲನದ ಸ್ವರೂಪವನ್ನು ಪಡೆಯಲಿ.
