ರಾಷ್ಟ್ರೀಯ ಹಸಿರು ಜಲಜನಕ (ಹೈಡ್ರೋಜನ್) ಮಿಷನ್ ಸ್ಥಾಪನೆಗೆ ಕೇಂದ್ರ ಸಚಿವ ಸಂಪುಟ ಅನುಮೋದನೆ ನೀಡಿ 19,744 ಕೋಟಿ ರೂ. ಅನುದಾನ ನಿಗದಿ ಮಾಡಿರುವುದು ಭಾರತವನ್ನು ಇಂಧನ ಭದ್ರತೆಯುಳ್ಳ ರಾಷ್ಟ್ರವಾಗಿ ರೂಪಿಸಬಲ್ಲ ಹಾಗೂ ಸ್ವಚ್ಛ ಇಂಧನ ತಯಾರಿಸುವ ಮೂಲಕ ಪರಿಸರ ಸಂರಕ್ಷಣೆಯುಳ್ಳ ದೂರದೃಷ್ಟಿಯ ಕ್ರಮವೆನ್ನಬಹುದು. ಜಲಜನಕವು ಒಂದು ರಾಸಾಯನಿಕ ಮೂಲಧಾತು ಆಗಿದ್ದು, ವಿಶ್ವದಲ್ಲಿ ಹೇರಳವಾಗಿ ಲಭಿಸುತ್ತದೆ. ಪ್ರಸ್ತುತ ಹಸಿರು ಜಲಜನಕ ಉತ್ಪಾದನೆಯಲ್ಲಿ ಚೀನಾ ಮುಂಚೂಣಿಯಲ್ಲಿದ್ದು ಜಾಗತಿಕವಾಗಿ ಒಟ್ಟು ಉತ್ಪಾದನೆಯ ಮೂರನೇ ಒಂದರಷ್ಟನ್ನು ಈ ದೇಶವೇ ತಯಾರಿಸುತ್ತದೆ. ತೈಲ ಹಾಗೂ ಕಲ್ಲಿದ್ದಲು ಬಳಕೆಯಿಂದ ಪರಿಸರಕ್ಕೆ ಸಾಕಷ್ಟು ಹಾನಿಯುಂಟಾದರೆ, ಜಲಜನಕ ಇಂಧನವು ಪರಿಸರಸ್ನೇಹಿಯಾಗಿದೆ. ಹಸಿರು ಜಲಜನಕವನ್ನು ನೀರಿನಿಂದ ತಯಾರಿಸುವುದರಿಂದ ಇದು ಆಮ್ಲಜನಕದ ಆವಿಯನ್ನು ಮಾತ್ರ ವಾತಾವರಣಕ್ಕೆ ಬಿಡುಗಡೆ ಮಾಡುತ್ತದೆ. ಉತ್ಪಾದಿಸುವಾಗ ಮಾತ್ರವಲ್ಲದೆ, ಬಳಸುವಾಗಲೂ ಮಾಲಿನ್ಯಕಾರಕ ಅನಿಲಗಳನ್ನು ಇದು ಹೊರಸೂಸುವುದಿಲ್ಲ.
