ಈ ಕಾರಣಕ್ಕೆ ಬುದ್ಧಚರಣ ಕೃತಿ ಆದಷ್ಟು ಬೇಗನೆ ಬಿಡುಗಡೆಯಾಗಬೇಕಿತ್ತು. ಈ ವೇಳೆಗೆ ಕರೊನಾ ಎಂಬ ಅಮೂರ್ತ ಮಾಯೆ ಜಗತ್ತನ್ನು ಆವರಿಸಿತು. ಅನೇಕ ಆಪ್ತರು ಅಗಲಿದರು. ಆಪ್ತರ ಅಗಲಿಕೆಯೂ ದುಃಖ ಎಂದು ಬುದ್ಧ ಹೇಳಿದಂತೆ, ಅನೇಕ ಅನುಭವಗಳಾಯಿತು. ಇಂದು ಯಾವುದೂ ಕೆಟ್ಟ ವಾರ್ತೆ ಬರದಿರಲಿ ಎಂದು ಕೋರುವಷ್ಟು. ಮೃತರ ಹೆಸರುಗಳು ಈಗ ಐದುನೂರು, ಸಾವಿರ ಎಂಬ ಸಂಖ್ಯೆಗಳಾಗಿವೆ. ಮನುಷ್ಯನ ಕೈಮೀರಿದಂತಹ, ಅಂಕೆಗೆ ಸಿಕ್ಕದ ದುಃಖದ ನಿವಾರಣೆ ಹೇಗೆ ಎಂಬ ಹುಡುಕಾಟವೇ ಬುದ್ಧನ ಕಡೆಗೆ ನಮ್ಮನ್ನು ಕೊಂಡೊಯ್ಯುತ್ತದೆ. ಈ ಕಾರಣದಿಂದಾಗಿ ತಲ್ಲಣ ಹೆಚ್ಚಳವಾಯಿತು. ನನ್ನ ಕೈಯಿಂದಲೇ ಈ ಪುಸ್ತಕ ಬಿಡುಗಡೆ ಮಾಡಬೇಕು ಎಂಬ ಅಪೇಕ್ಷೆಯಿತ್ತು, ಇಂದು ಮನಸ್ಸು ಶಾಂತವಾಗಿದೆ ಎಂದು ಡಾ. ಎಚ್.ಎಸ್. ವೆಂಕಟೇಶಮೂರ್ತಿ ಹೇಳಿದರು.
