ಪ್ರತೀಕಾರ ಅಥವಾ ಪಾರಸ್ಪರಿಕ ತೆರಿಗೆಯಿಂದ ಅಮೆರಿಕದಲ್ಲಿ ಜೀವನಾವಶ್ಯಕ ವಸ್ತುಗಳ ಬೆಲೆ ಹೆಚ್ಚಲಿದ್ದು, ಹಣದುಬ್ಬರವೂ ಹೆಚ್ಚಲಿದೆ. ಹಲವು ಉತ್ಪನ್ನಗಳಿಗಾಗಿ ಅಮೆರಿಕ ಕೂಡ ಇತರ ದೇಶಗಳ ಮೇಲೆ ಅವಲಂಬಿತವಾಗಿದೆ. ಹಾಗಾಗಿ, ಆ ಉತ್ಪನ್ನಗಳು ದುಬಾರಿ ಆಗುವುದರಿಂದ, ಹಲವು ಪ್ರತಿಕೂಲ ಪರಿಣಾಮ ಬೀರಲಿದೆ. ಅಮೆರಿಕದಲ್ಲಿ ಉಪಯೋಗಿಸುವ 63% ತರಕಾರಿ ಹಾಗೂ 47% ಹಣ್ಣುಗಳು ಮೆಕ್ಸಿಕೋದಿಂದ ಬರುತ್ತವೆ. ಆದರೆ, ಮೆಕ್ಸಿಕೋದೊಂದಿಗೆ ರಾಜತಾಂತ್ರಿಕ ಸಂಬಂಧಗಳು ಹದಗೆಟ್ಟಿದ್ದು, ಮುಂದಿನ ದಿನಗಳು ಹೇಗೆ ಎಂಬ ಅನಿಶ್ಚಿತತೆ ಕಾಡುತ್ತಿದೆ. ಅಮೆರಿಕದಲ್ಲಿ ಈಗಾಗಲೇ ಉದ್ಯೋಗಸೃಷ್ಟಿ ಪ್ರಮಾಣ ತೃಪ್ತಿದಾಯಕವಾಗಿಲ್ಲ. ಹೀಗಿರುವಾಗ, ಆರ್ಥಿಕತೆ ಹಳಿ ತಪ್ಪಿದರೆ ಉದ್ಯೋಗ ಸಮಸ್ಯೆ ಮತ್ತಷ್ಟು ತೀವ್ರವಾಗಿ, ಸರ್ಕಾರ ಯುವಕರ ಆಕ್ರೋಶಕ್ಕೆ ಗುರಿಯಾಗಬೇಕಾಗುತ್ತದೆ. ಟ್ರಂಪ್ ಕ್ರಮದಿಂದ ಅಮೆರಿಕದಲ್ಲಿ ಬೆಲೆಯೇರಿಕೆ ಹೆಚ್ಚಲಿದೆ. ಜನರು ದಿನಸಿ, ವಾಹನ ಸೇರಿ ದಂತೆ ಜೀವನಾವಶ್ಯಕ ವಸ್ತುಗಳ ಖರೀದಿಗೆ ಹೆಚ್ಚಿನ ಡಾಲರ್ ನೀಡಬೇಕಾಗುತ್ತದೆ. ಕಡಿಮೆ ಆದಾಯ ಹೊಂದಿರುವ ಕುಟುಂಬಗಳ ಮೇಲೆ ಇದು ವ್ಯತಿರಿಕ್ತ ಪರಿಣಾಮ ಬೀರಲಿದೆ. ಅಲ್ಲದೆ, ಕಾಪೋರೇಟ್ ಆದಾಯ ದಲ್ಲೂ ಭಾರಿ ಇಳಿಕೆ ಕಾಣಲಿದೆ.
