ಯೂಕ್ರೇನ್​​ ಮಹಿಳೆಯರನ್ನು ರೇಪ್​ ಮಾಡುವಂತೆ ತನ್ನ ಗಂಡನಿಗೆ ಹೇಳಿದ್ದ ರಷ್ಯಾ ಮಹಿಳೆಗೆ ಬಿಗ್​ ಶಾಕ್​! Ukraine-Russia

Ukraine-Russia : ಹೆಣ್ಣಿಗೆ ಹೆಣ್ಣೇ ಶತ್ರು ಎಂಬ ಮಾತನ್ನು ನೀವು ಕೇಳಿರುತ್ತೀರಿ. ಈ ಮಾತು ಏಕೆ ಹುಟ್ಟಿಕೊಂಡಿತು ಎಂಬುದು ಗೊತ್ತಿಲ್ಲ. ಆದರೆ, ರಷ್ಯಾದ ಮಹಿಳೆಯೊಬ್ಬಳು ವರ್ತಿಸಿದ ರೀತಿಯನ್ನು ನೋಡಿದರೆ, ಈ ಮಾತು ಆಕೆಗೆ ಸಂಪೂರ್ಣವಾಗಿ ಹೊಂದಿಕೊಳ್ಳುತ್ತದೆ. ಕಷ್ಟದಲ್ಲಿರುವ ಮಹಿಳೆಯರ ಬಗ್ಗೆ ಕರುಣೆ ತೋರಬೇಕಾದ ಮಹಿಳೆ, ಕ್ರೌರ್ಯವನ್ನು ತೋರಿದ್ದು ನಿಜಕ್ಕೂ ಆಘಾತಕಾರಿ ಸಂಗತಿ.

ಯೂಕ್ರೇನ್ ಮತ್ತು ರಷ್ಯಾ ನಡುವೆ 2022 ಏಪ್ರಿಲ್ ತಿಂಗಳಿನಿಂದಲೂ ಭೀಕರ ಯುದ್ಧ ನಡೆಯುತ್ತಿರುವುದು ಗೊತ್ತೇ ಇದೆ. ರಷ್ಯಾದ ಸೇನೆಯು ಯೂಕ್ರೇನ್ ಮೇಲೆ ಬೃಹತ್ ವೈಮಾನಿಕ ದಾಳಿ ನಡೆಸಿದೆ. ನೂರಾರು ಕಟ್ಟಡಗಳು ನಾಶವಾಗಿವೆ. ಅನೇಕ ಜನರು ಪ್ರಾಣ ಕಳೆದುಕೊಂಡಿದ್ದಾರೆ. ಲಕ್ಷಾಂತರ ಜನರು ನಿರಾಶ್ರಿತರಾಗಿದ್ದಾರೆ.

ಎರಡೂ ದೇಶಗಳ ನಡುವೆ ಭೀಕರ ಯುದ್ಧ ನಡೆಯುತ್ತಿರುವಾಗ, ಈ ಹಿಂದೆ ಓಲ್ಗಾ ಬೈಕೊವ್ಸ್ಕಯಾ ಎಂಬ ರಷ್ಯಾದ ಮಹಿಳೆ, ಸೈನ್ಯದಲ್ಲಿದ್ದ ತನ್ನ ಪತಿಯ ಜತೆ ಫೋನ್‌ನಲ್ಲಿ ಮಾತನಾಡುತ್ತಾ ಯೂಕ್ರೇನಿಯನ್ ಮಹಿಳೆಯರ ಮೇಲೆ ಅತ್ಯಾಚಾರ ಮಾಡುವಂತೆ ಒತ್ತಾಯಿಸಿದ್ದಳು.

ಬಹಳ ಹಿಂದೆ ಯೂಕ್ರೇನಿಯನ್ ಸೇನೆಯು ಇಬ್ಬರ ನಡುವಿನ ಸಂಭಾಷಣೆಯನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿತು. ಆ ಸಮಯದಲ್ಲಿ, ಈ ಆಡಿಯೋ ವೈರಲ್ ಆಯಿತು. ನಂತರ, ಪತ್ರಕರ್ತರು ದಂಪತಿಯನ್ನು ಗುರುತಿಸಿದರು. ಅವರ ಹೆಸರು ರೋಮನ್ ಬೈಕೊವ್ಸ್ಕಯಾ-ಓಲ್ಗಾ ಬೈಕೊವ್ಸ್ಕಯಾ ಎಂದು ಗೊತ್ತಾಯಿತು. ಇಬ್ಬರೂ ರಷ್ಯಾದ ಫಿಯೋಡೋಸಿಯಾದಲ್ಲಿ ವಾಸಿಸುತ್ತಿದ್ದಾರೆ ಎಂಬುದಕ್ಕೆ ಪುರಾವೆಗಳು ಕಂಡುಬಂದಿವೆ.

ಇದನ್ನೂ ಓದಿ: ಬಾಹ್ಯಾಕಾಶದಿಂದ 9 ತಿಂಗಳ ನಂತ್ರ ಮನೆಗೆ ಬಂದ ಸುನೀತಾಗೆ ಸಾಕು ನಾಯಿಗಳಿಂದ ಭಾವುಕ ಸ್ವಾಗತ: ವಿಡಿಯೋ ವೈರಲ್​! Sunita Williams

ಯುದ್ಧ ಉಲ್ಲಂಘನೆಯ ಕಾನೂನಿನ ಅಡಿಯಲ್ಲಿ ಯೂಕ್ರೇನ್, ರಷ್ಯಾದ ಮಹಿಳೆಗೆ ನೋಟಿಸ್ ಕಳುಹಿಸಿದೆ. ಇದನ್ನು ಅಂತಾರಾಷ್ಟ್ರೀಯ ವಾಂಟೆಡ್ ಪಟ್ಟಿಗೆ ಕೂಡ ಸೇರಿಸಲಾಗಿದೆ. ಅಧಿಕಾರಿಗಳು ಯೂಕ್ರೇನಿಯನ್ ಕಾನೂನಿನ ಪ್ರಕಾರ ತನಿಖೆಯನ್ನು ಪೂರ್ಣಗೊಳಿಸಿ, 2022ರ ಡಿಸೆಂಬರ್​ನಲ್ಲಿ ನ್ಯಾಯಾಲಯದಲ್ಲಿ ಆಕೆಯ ವಿರುದ್ಧ ದೋಷಾರೋಪಣೆಯನ್ನು ಸಲ್ಲಿಸಲಾಯಿತು.

ಇತ್ತೀಚೆಗೆ, ಕೈವ್‌ನ ಶೆವ್ಚೆಂಕಿವ್ಸ್ಕಿ ಜಿಲ್ಲಾ ನ್ಯಾಯಾಲಯವು ರಷ್ಯಾದ ಪ್ರಜೆ ಓಲ್ಗಾ, ಯೂಕ್ರೇನಿಯನ್ ಮಹಿಳೆಯರ ಮೇಲಿನ ಅತ್ಯಾಚಾರಕ್ಕೆ ಪ್ರಚೋದನೆ ನೀಡಿದ್ದಾಳೆ ಎಂದು ಹೇಳಿ ತಪ್ಪಿತಸ್ಥಳೆಂದು ತೀರ್ಪು ನೀಡಿದೆ. ಅಲ್ಲದೆ, ಐದು ವರ್ಷಗಳ ಜೈಲು ಶಿಕ್ಷೆಯನ್ನು ವಿಧಿಸಿದೆ. (ಏಜೆನ್ಸೀಸ್​)

https://www.vijayavani.net/what-astrology-predicted-about-sridevi-happened-exactly-as-it-happened-what-numerology-predicted-about-her-death

https://www.vijayavani.net/i-was-17-years-old-then-i-did-what-the-director-said-my-father-was-hurt-amala-paul