ಬೆಂಗಳೂರು: ನಟ ಡಾಲಿ ಧನಂಜಯ ಮತ್ತು ಡಾ. ಧನ್ಯತಾ ಮದುವೆ ಇದೇ ತಿಂಗಳ 16ರಂದು ಮೈಸೂರಿನಲ್ಲಿ ನಡೆಯಲಿದೆ. ಅಂಬಾವಿಲಾಸ ಅರಮನೆ ಮುಂಭಾಗದ ವಸ್ತುಪ್ರದರ್ಶನ ಮೈದಾನದಲ್ಲಿ ಶನಿವಾರ (ಫೆ.15) ಸಂಜೆ 6 ಗಂಟೆಯ ನಂತರ ಆರತಕ್ಷತೆ ಮತ್ತು ಭಾನುವಾರ (ಫೆ.16) ಬೆ. 8.20ರಿಂದ 10 ಗಂಟೆಯವರೆಗೆ ಮೀನ ಲಗ್ನದಲ್ಲಿ ಮಾಂಗಲ್ಯಧಾರಣೆ ಮಾಡಲಿದ್ದಾರೆ. ಈ ಬಗ್ಗೆ ಧನಂಜಯ, ‘ರಿಜಿಸ್ಟರ್ ಮ್ಯಾರೇಜ್ ಆಗಬೇಕು ಅಂದುಕೊಂಡಿದ್ದೆ. ಸರಳವಾಗಿ ಮದುವೆಯಾಗಿ ನಂತರ ಎಲ್ಲರಿಗೂ ತಿಳಿಸೋಣ ಅಂತಲೂ ಯೋಚಿಸಿದ್ದೆ. ಆದರೆ, ನಂತರ ಸಾವಿರಾರು ಪ್ರಶ್ನೆಗಳು ಸೃಷ್ಟಿಯಾಗಿ ಎಲ್ಲದಕ್ಕೂ ಉತ್ತರಿಸಬೇಕಾಗುತ್ತದೆ. ಇದೊಂದು ಒಳ್ಳೆ ಸಂದರ್ಭ ಕುಟುಂಬದವರು, ಸ್ನೇಹಿತರು, ಚಿತ್ರರಂಗದ ಗೆಳೆಯರು, ಅಭಿಮಾನಿಗಳನ್ನು ಸೇರಿಸಿ ಆಚರಿಸಬೇಕು ಅಂತನ್ನಿಸಿತು. ನನ್ನ ಬಳಗ ಕೂಡ ದೊಡ್ಡದು. ಅಮೆರಿಕ, ದುಬೈ, ಆಸ್ಟ್ರೇಲಿಯಾ ಸೇರಿ ಹಲವೆಡೆ ಫ್ರೆಂಡ್ಸ್ ಇದ್ದಾರೆ. ಅವರೂ ಮದುವೆಗೆ ಬರಲಿದ್ದಾರೆ’ ಎಂದು ಮಾಹಿತಿ ನೀಡಿದರು. ಕಳೆದ ಎರಡು ತಿಂಗಳಿನಿಂದ ಮದುವೆಯ ಸಿದ್ಧತೆಯಲ್ಲಿರುವ ಧನಂಜಯ, ಮಾರ್ಚ್ನಲ್ಲಿ ಸಿನಿಮಾ ಚಿತ್ರೀಕರಣದಲ್ಲಿ ಬಿಜಿಯಾಗಲಿದ್ದಾರೆ.
