ಬೆಂಗಳೂರು: ಅಂದಿನ ಮೈಸೂರು ರಾಜ್ಯಕ್ಕೆ ಕರ್ನಾಟಕ ಎಂದು ಮರುನಾಮಕರಣವಾಗಿ ಐವತ್ತು ವರ್ಷ ಪೂರ್ಣಗೊಂಡಿದೆ. ಈ ನಡು ಹರಯದಲ್ಲಿ ನಾಡು ಸಾಗಿ ಬಂದ ಹಾದಿಯನ್ನು ಒಮ್ಮೆ ತಿರುಗಿ ನೋಡಿದರೆ ರೋಮಾಂಚನಗೊಳ್ಳುವಂತಹ ಸಾಧನೆಗಳ ಹೆಜ್ಜೆ ಗುರುತುಗಳು ಕಣ್ಣ ಮುಂದೆ ಮೂಡುತ್ತವೆ. ಈ ಸವಿ ನೆನಪಿನ ಜತೆ ಜತೆಯಲ್ಲೇ ಬೇರೆ ಬೇರೆ ವಿಚಾರಗಳಲ್ಲಿ ರಾಷ್ಟ್ರದ ಎಷ್ಟೋ ರಾಜ್ಯಗಳಿಗಿಂತ ಮುಂಚೂಣಿಯಲ್ಲಿರುವ ನಮ್ಮ ರಾಜ್ಯ ಅಭಿವೃದ್ಧಿ ವಿಚಾರದಲ್ಲಿ ಸಾಧಿಸುವುದು ಇನ್ನೂ ಬಹಳಷ್ಟಿದೆ.
ಕರ್ನಾಟಕದ ಸುವರ್ಣ ಮಹೋತ್ಸವದ ಹಾದಿ ಹೂವಿನ ಹಾಸಾಗಿರಲಿಲ್ಲ. ಕಲ್ಲುಮುಳ್ಳಿನ ಹಾದಿಯಲ್ಲಿ ಏಳುಬೀಳು ಕಂಡು ಮುಂಚೂಣಿ ಸ್ಥಾನಕ್ಕೆ ತಲುಪಿದೆ. ಇಂದಿಗೂ ಹತ್ತಾರು ವಿಚಾರಗಳಲ್ಲಿ ರಾಷ್ಟ್ರ ಕರ್ನಾಟಕವನ್ನು ಗಮನಿಸುತ್ತಿರುತ್ತದೆ, ಅನುಕರಿಸುತ್ತದೆ ಕೂಡ. ಹೀಗಿರುವ ವಾತಾವರಣದಲ್ಲಿ ವಿಜಯವಾಣಿ ‘ಕರ್ನಾಟಕ ಮುಂದೇನು?’ ಘೋಷವಾಕ್ಯದಡಿ ಹತ್ತಾರು ಕ್ಷೇತ್ರಗಳಲ್ಲಿ ಮುಂದಿನ ದಶಕದಲ್ಲಿ ಆಗಲೇಬೇಕಿರುವ ಆಶಯ, ಕನಸುಗಳನ್ನು ಪಟ್ಟಿಮಾಡಿ ನಾಡಿನ ಮುಂದಿಡುವ ಪ್ರಯತ್ನ ಮಾಡಿದೆ. ನಿಪುಣರ ಅನುಭವ, ವಿಚಾರಧಾರೆಯು ಸರ್ಕಾರ ಹಾಗೂ ಜನ ಸಮುದಾಯಗಳಿಗೆ ಮಾರ್ಗಸೂಚಿಯಷ್ಟೇ ಅಲ್ಲ, ರಾಜ್ಯ ಸಾಗಬೇಕಾದ ದಾರಿಯ ದಿಕ್ಸೂಚಿಯೂ ಹೌದು. ಇದು ವಿಜಯವಾಣಿಯ ಕಳಕಳಿ ಕೂಡ.
