ಹಳದಿ ಲೋಹಕ್ಕೆ ಡಿಮಾಂಡೋ ಡಿಮಾಂಡು!

ಚಿನ್ನದ ದರದ ನಾಗಾಲೋಟ ಮಾರುಕಟ್ಟೆ ವಿಶ್ಲೇಷಕರನ್ನೂ ಅಚ್ಚರಿಗೆ ತಳ್ಳಿದೆ. 2025ರ ಆರಂಭದಲ್ಲಿ 79,300ರ ಆಸುಪಾಸಿನಲ್ಲಿ ಇದ್ದ 10 ಗ್ರಾಂ ಚಿನ್ನದ ದರ 100 ದಿನಗಳ ಅಲ್ಪಾವಧಿಯಲ್ಲೇ 90 ಸಾವಿರದ ಗಡಿಯನ್ನು ದಾಟಿದೆ. ಅಂದರೆ, ಮೂರೇ ತಿಂಗಳ ಅವಧಿಯಲ್ಲಿ ಚಿನ್ನ ಶೇಕಡ 14.31ರಷ್ಟು ಹೆಚ್ಚಳ ದಾಖಲಿಸಿದೆ. ಬೆಂಗಳೂರಿನಲ್ಲಿ ಈಗಾಗಲೇ 10 ಗ್ರಾಂ ಸ್ಟಾಂಡರ್ಡ್​ ಚಿನ್ನದ ದರ 92 ಸಾವಿರ ರೂ.ಗೆ ತಲುಪಿದೆ.

ಬೆಳ್ಳಿಯ ದರ ಕೆ.ಜಿಗೆ ಕಳೆದ ವಾರವೇ 1 ಲಕ್ಷ ರೂ. ದಾಟಿದ್ದು, ಪ್ರಸ್ತುತ 1,02,500 ರೂ.ಗೆ ತಲುಪಿದೆ. ಅಲ್ಲದೆ, ಏರಿಕೆಯ ಈ ಗ್ರಾಫ್ ಇಲ್ಲಿಗೆ ನಿಲ್ಲುವುದಿಲ್ಲ. ಮೂರು ತಿಂಗಳಲ್ಲಿ ಶೇ.14ಕ್ಕೂ ಅಧಿಕ ಜಿಗಿತ ಕಂಡಿರುವ ಚಿನ್ನದ ಬೆಲೆ, ಇನ್ನಷ್ಟು ಹೆಚ್ಚಾಗಲಿದೆ. ಅಂದರೆ, 2025ರ ವರ್ಷಾಂತ್ಯದಲ್ಲೇ 10 ಗ್ರಾಂ ಬಂಗಾರ ಖರೀದಿಸಲು 1 ಲಕ್ಷ ರೂ. ಪಾವತಿಸುವ ಸನ್ನಿವೇಶ ಸೃಷ್ಟಿಯಾಗಬಹುದು ಎನ್ನುತ್ತಾರೆ ಮಾರುಕಟ್ಟೆ ತಜ್ಞರು. ಏಪ್ರಿಲ್ ಮತ್ತು ಮೇ ತಿಂಗಳಲ್ಲಿ ದೇಶದಲ್ಲಿ ಲಕ್ಷಾಂತರ ಮದುವೆಗಳು ನಡೆಯಲಿದ್ದು, ಚಿನ್ನ ಖರೀದಿ ಪ್ರಮಾಣ ಹೆಚ್ಚಲಿದೆ. ಅಕ್ಟೋಬರ್-ನವೆಂಬರ್​ನಲ್ಲಿ ದಸರಾ ಮತ್ತು ದೀಪಾವಳಿ ಹಬ್ಬದ ಋತುವಿನಲ್ಲೇ ಚಿನ್ನದ ದರ 1 ಲಕ್ಷ ರೂ.ಗೆ ಏರಿದರೆ ಆಶ್ಚರ್ಯ ಪಡಬೇಕಿಲ್ಲ ಎಂಬುದು ವಿಶ್ಲೇಷಕರ ಅಭಿಪ್ರಾಯ. ದೇಶೀಯ ಆಭರಣ ತಯಾರಕರಿಂದ ಮತ್ತು ಗ್ರಾಹಕರಿಂದ ಖರೀದಿ ಪ್ರಮಾಣ ಹೆಚ್ಚಾಗಿದ್ದರಿಂದ ನವದೆಹಲಿ, ಮುಂಬೈ ಚಿನಿವಾರ ಪೇಟೆಯಲ್ಲಿ ಚಿನ್ನದ ಧಾರಣೆ ಏರಿಕೆ ಯಾಗುತ್ತಲೇ ಇದೆ.

ಇನ್ನೂ ಹೆಚ್ಚಲಿದೆ ಧಾರಣೆ

ಷೇರುಪೇಟೆಯಲ್ಲಿ ಏರಿಳಿತ ಮುಂದುವರಿದಿರುವಂತೆಯೇ ಹೂಡಿಕೆಗಾಗಿ ಬಹುತೇಕರ ಗಮನ ಬಂಗಾರದ ಮೇಲಿದೆ. ಚಿನ್ನಾಭರಣ ಖರೀದಿ ಒಂದೆಡೆಯಾದರೆ, ಚಿನ್ನದ ಗಟ್ಟಿ ಖರೀದಿ ಮಾಡಿಟ್ಟು ಕೊಳ್ಳವವರು ಇನ್ನೊಂದಿಷ್ಟು ಜನ. ಈ ನಡುವೆ ಬಂಗಾರದ ಬೆಲೆ ಗಗನಮುಖಿಯಾಗಿದ್ದು, ಇದು ಮುಂದಿನ ದಿನಗಳಲ್ಲಿ ಮತ್ತಷ್ಟು ಹೆಚ್ಚಲಿದೆ ಎನ್ನುತ್ತಾರೆ ಮಾರುಕಟ್ಟೆ ತಜ್ಞರು. ಭಾರತದ ಮಟ್ಟಿಗೆ ಹೇಳುವುದಾದರೆ ದೇಶದ ಒಟ್ಟಾರೆ ಚಿನ್ನದ ಬೇಡಿಕೆಯಲ್ಲಿ ಶೇಕಡ 60ರಷ್ಟು ಬೇಡಿಕೆ ಗ್ರಾಮೀಣ ಪ್ರದೇಶದಿಂದ ಬರುತ್ತದೆ. ಕಳೆದ ಎರಡು ದಶಕಗಳಲ್ಲಿ ಗ್ರಾಮೀಣ ಜನರ ಆದಾಯ ಮತ್ತು ಅವರು ಮಾಡುವ ವೆಚ್ಚದಲ್ಲಿ ಏರಿಕೆಯಾಗಿದೆ. ಇದರಿಂದ ಅವರು ಹೆಚ್ಚು ಹೆಚ್ಚು ಚಿನ್ನ ಖರೀದಿಗೆ ಮುಂದಾಗುತ್ತಿದ್ದಾರೆ. ಇನ್ನು, ಮೇಲ್ಮಧ್ಯಮ ವರ್ಗದವರು ಸುರಕ್ಷಿತ ಹೂಡಿಕೆ ಎಂದು ಚಿನ್ನದ ಕಡೆ ಮುಖ ಮಾಡಿದ್ದಾರೆ.

ಬಂಗಾರದ ದರ ಹೆಚ್ಚಳಕ್ಕೆ ಪ್ರಮುಖ ಕಾರಣ

• ಡೊನಾಲ್ಡ್ ಟ್ರಂಪ್ ಅಮೆರಿಕ ಅಧ್ಯಕ್ಷರಾಗುತ್ತಿದ್ದಂತೆ ಪಾರಸ್ಪರಿಕ ತೆರಿಗೆ ಸಮರಕ್ಕೆ ನಾಂದಿ ಹಾಡಿದ್ದಾರೆ. ಇದು ಕೆನಡಾ, ಮೆಕ್ಸಿಕೋ ಜತೆಗಿನ ಸಂಬಂಧದಲ್ಲಿ ಬಿರುಕು ಉಂಟುಮಾಡಿದ್ದರೆ ಚೀನಾ ವಿಶ್ವ ವ್ಯಾಪಾರ ಸಂಸ್ಥೆಗೆ ದೂರು ನೀಡಿದೆ. ಕರ ಸಮರದಿಂದ ಜಾಗತಿಕವಾಗಿ ಅನಿಶ್ಚಿತತೆಯ ಸ್ಥಿತಿ ಉಂಟಾಗಿದ್ದು, ಸುರಕ್ಷಿತ ಹೂಡಿಕೆಯಾಗಿ ಚಿನ್ನದತ್ತ ಜನರು ಮುಖ ಮಾಡಿದ್ದಾರೆ.
• ಜಗತ್ತಿನ ವಿವಿಧ ದೇಶಗಳ ಕೇಂದ್ರೀಯ ಬ್ಯಾಂಕುಗಳು ಹಿಂದೆಂದೂ ಕಾಣದ ರೀತಿಯಲ್ಲಿ ಚಿನ್ನದ ಖರೀದಿಯನ್ನು ಹೆಚ್ಚಿಸುತ್ತಿವೆ. ರಷ್ಯಾ-ಯೂಕ್ರೇನ್ ಸಂಘರ್ಷದ ನಂತರ ಶುರುವಾದ ಈ ಬೆಳವಣಿಗೆ ಈಗಲೂ ಮುಂದುವರಿದೆ.
• ಬೆಲೆಯೇರಿಕೆಗೆ ಕಡಿವಾಣ ಹಾಕಲು ಅಮೆರಿಕದ ಫೆಡರಲ್ ರಿಸರ್ವ್ ಬ್ಯಾಂಕ್ ಬಡ್ಡಿ ದರ ಇನ್ನಷ್ಟು ಕಡಿತಗೊಳಿಸುವ ಸಾಧ್ಯತೆ ದಟ್ಟವಾಗಿ ಇರುವುದರಿಂದ, ಜನರು ಚಿನ್ನ ಖರೀದಿಗೆ ಮುಗಿಬಿದ್ದಿದ್ದಾರೆ.
• ಪ್ರಸ್ತುತ ಚಾಲ್ತಿಯಲ್ಲಿರುವ ಭೌಗೋಳಿಕ ರಾಜಕೀಯ ಬಿಕ್ಕಟ್ಟು ಕೂಡ ಬಂಗಾರದ ಬೆಲೆ ಏರಿಕೆಗೆ ಪ್ರಮುಖ ಕಾರಣ. ವಾಣಿಜ್ಯ ಸಮರ, ನಿರ್ಬಂಧ, ಜಾಗತಿಕ ಬಿಕ್ಕಟ್ಟು ಎಲ್ಲವೂ ಪರಿಣಾಮ ಬೀರಿವೆ. * ಡಾಲರ್ ಎದುರು ರೂಪಾಯಿ ಮೌಲ್ಯ ಸತತವಾಗಿ ಕುಸಿಯುತ್ತಿರುವುದು ಚಿನ್ನದ ದರದ ಮೇಲೆ ಪರಿಣಾಮ ಬೀರಿದೆ.
• ಜಾಗತಿಕ ಸ್ತರದಲ್ಲಿ ಬೆಲೆಯೇರಿಕೆ ಪ್ರಮಾಣ ಈಗಲೂ ಚಿಂತಾಜನಕ ಸ್ಥಿತಿಯಲ್ಲಿದ್ದು, ಜನರು ಚಿನ್ನದಲ್ಲಿ ಹೂಡಿಕೆಯೇ ಸುರಕ್ಷಿತ ಎಂಬ ಮಾರ್ಗ ಕಂಡುಕೊಂಡಿದ್ದಾರೆ.
• ಷೇರು ಮಾರುಕಟ್ಟೆಯ ಕುಸಿತವೂ ಜನರಿಗೆ ಚಿನ್ನ ಖರೀದಿಗೆ ಪ್ರೇರೇಪಿಸಿದೆ.

ನಿಮಗೆ ಗೊತ್ತೆ?

ದೇಶಕ್ಕೆ ಸ್ವಾತಂತ್ರ್ಯ ಬಂದಾಗ ಅಂದರೆ 1947ರಲ್ಲಿ 24 ಕ್ಯಾರೆಟ್​ನ 10 ಗ್ರಾಂ ಚಿನ್ನದ ಬೆಲೆ ಬರೀ 32 ರೂ. ಇತ್ತು. 1964ರಲ್ಲಿ 63 ರೂ., 1974ರಲ್ಲಿ 506 ರೂ., 1984ರಲ್ಲಿ 1,970 ರೂ., 1990-3,200 ರೂ. ಇತ್ತು.

2023ರಲ್ಲಿಯೂ ಹೆಚ್ಚಳ

2023ರ ಉದಾಹರಣೆಯನ್ನೇ ತೆಗೆದುಕೊಂಡರೆ ಚಿನ್ನದ ಬೆಲೆ ಒಂದೇ ವರ್ಷದಲ್ಲಿ 10 ಗ್ರಾಂಗೆ 8 ಸಾವಿರಕ್ಕಿಂತ ಅಧಿಕ ಹೆಚ್ಚಳ ಕಂಡಿತ್ತು. 2023ರ ಜನವರಿಯಲ್ಲಿ 54,867 ರೂ. ಇದ್ದ ದರ 2023ರ ಡಿಸೆಂಬರ್​ನಲ್ಲಿ 63,246 ರೂ.ಗೆ ತಲುಪಿತು. ಅಂದರೆ, 8,379 (ಶೇಕಡ 16) ರೂ.ಗಳಷ್ಟು ಹೆಚ್ಚಳ ಕಂಡುಬಂತು. 2023ರ ಜನವರಿಯಲ್ಲಿ 1 ಕೆಜಿ ಬೆಳ್ಳಿಯ ಬೆಲೆ 68,092 ರೂ. ಇದ್ದದ್ದು 2023ರ ಡಿಸೆಂಬರ್​ನಲ್ಲಿ 73,395 ರೂ.ಗೆ ತಲುಪಿ, 5,303 ರೂ.ಗಳ ಏರಿಕೆ ದಾಖಲಿಸಿತು. 2024ರಲ್ಲಿ ಶೇಕಡ 27ರಷ್ಟು ಹಾಗೂ 2025ರ ಆರಂಭದ ಮೂರು ತಿಂಗಳಲ್ಲೇ ಶೇ.14ರಷ್ಟು ಏರಿಕೆ ಕಂಡಿದೆ.

https://www.vijayavani.net/ranya-rao-husband-tells-court-about-seperation