ಗಾಜಾ ಶಾಂತಿ ಮಾತುಕತೆ​ ​​​ವಿಳಂಬವು ಭಾರಿ ರಕ್ತಪಾತಕ್ಕೆ ಕಾರಣವಾಗಬಹುದು: ಡೊನಾಲ್ಡ್​ ಟ್ರಂಪ್​ ಎಚ್ಚರಿಕೆ | Donald Trump

Donald Trump: ಗಾಜಾ ಶಾಂತಿ ಮಾತುಕತೆಗೆ ಇಸ್ರೇಲ್ ಮತ್ತು ಹಮಾಸ್ ವೇಗವಾಗಿ ಮುಂದುವರಿಯಬೇಕು ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸೋಮವಾರ (ಸೆಪ್ಟೆಂಬರ್​,06) ಒತ್ತಾಯಿಸಿದ್ದಾರೆ.

ಈ ಬಗ್ಗೆ ಟ್ರೂತ್​ ಸೋಷಿಯಲ್​​​ನಲ್ಲಿ ಪೋಸ್ಟ್​ ಮಾಡಿರುವ ಟ್ರಂಪ್, ಗಾಜಾ ಶಾಂತಿ ಮಾತುಕತೆಯ​ ​​​ವಿಳಂಬವು ಭಾರಿ ರಕ್ತಪಾತಕ್ಕೆ ಕಾರಣವಾಗಬಹುದು ಎಂದು ಎಚ್ಚರಿಸಿದ್ದಾರೆ. ಅಲ್ಲದೆ, ಸಂಭಾವ್ಯ ಕದನ ವಿರಾಮದ ಭರವಸೆಯ ನಡುವೆ ಇಸ್ರೇಲ್ ಮತ್ತು ಹಮಾಸ್ ಇಂದು ಈಜಿಪ್ಟ್‌ನಲ್ಲಿ ಪರೋಕ್ಷ ಮಾತುಕತೆ ನಡೆಸಲು ಸಜ್ಜಾಗಿರುವ ಸಂದರ್ಭದಲ್ಲಿ ಟ್ರಂಪ್​ರಿಂದ ಈ ಹೇಳಿಕೆಗಳು ಬಂದಿವೆ.

ಗಾಜಾ ಸಂಘರ್ಷವನ್ನು ನಿರಂತರವಾಗಿ ಗಮನಿಸುತ್ತೇವೆ: ಟ್ರಂಪ್

ಈ ಬಗ್ಗೆ ಟ್ರೂತ್​ ಸೋಶಿಯಲ್​ನಲ್ಲಿ ಪೋಸ್ಟ್​ ಮಾಡಿರುವ ಟ್ರಂಪ್, ಇಸ್ರೇಲ್​ ಒತ್ತೆಯಾಳುಗಳನ್ನು ಬಿಡುಗಡೆ ಮಾಡಲು, ಗಾಜಾದಲ್ಲಿ ಯುದ್ಧವನ್ನು ಕೊನೆಗೊಳಿಸಲು ಮತ್ತು ಮುಖ್ಯವಾಗಿ ಮಧ್ಯಪ್ರಾಚ್ಯದಲ್ಲಿ ಶಾಂತಿಯನ್ನು ಬಯಸಲು ಹಮಾಸ್ ಮತ್ತು ಪ್ರಪಂಚದಾದ್ಯಂತದ ದೇಶಗಳೊಂದಿಗೆ ಸಕಾರಾತ್ಮಕ ಚರ್ಚೆಗಳು ನಡೆದಿವೆ ಎಂದು ಟ್ರಂಪ್ ಹೇಳಿದ್ದಾರೆ.

ಇದನ್ನೂ ಓದಿ: Karur Stampede | ಕರೂರ್​ ಘಟನೆಗೆ ಆಡಳಿತ ವೈಫಲ್ಯವೇ ಕಾರಣ..ಇಬ್ಬರು ಹೆಣ್ಣುಮಕ್ಕಳ ಕಳೆದುಕೊಂಡ ತಂದೆಯ ಆಕ್ರಂದನಕ್ಕೆ ಮೂಕಪ್ರೇಕ್ಷಕವಾದ ಎನ್​​​ಡಿಎ ಟೀಮ್​

ಗಾಜಾ ಶಾಂತಿ ಮಾತುಕತೆಗಳು ಬಹಳ ಯಶಸ್ವಿಯಾಗಿದ್ದು, ವೇಗವಾಗಿ ಮುಂದುವರೆದಿವೆ. ಅಂತಿಮ ವಿವರಗಳನ್ನು ಪರಿಶೀಲಿಸಲು ಮತ್ತು ಸ್ಪಷ್ಟಪಡಿಸಲು ತಾಂತ್ರಿಕ ತಂಡಗಳು ಸೋಮವಾರ ಈಜಿಪ್ಟ್‌ನಲ್ಲಿ ಮತ್ತೆ ಸಭೆ ಸೇರಲಿವೆ ಎಂದು ಟ್ರಂಪ್​ ಸ್ಟಪ್ಟಪಡಿಸಿದ್ದಾರೆ.

ಮೊದಲ ಹಂತವು ಮಾತುಕತೆಗಳು ಈ ವಾರ ಪೂರ್ಣಗೊಳ್ಳಬೇಕು ಎಂದು ನನಗೆ ಹೇಳಲಾಗಿದೆ. ಅಲ್ಲದೆ, ಎಲ್ಲರೂ ವೇಗವಾಗಿ ಚಲಿಸುವಂತೆ ನಾನು ಕೇಳಿಕೊಳ್ಳುತ್ತಿದ್ದೇನೆ. ಈ ಶತಮಾನಗಳಷ್ಟು ಹಳೆಯದಾದ ಸಂಘರ್ಷವನ್ನು ನಾನು ಗಮನಿಸುವುದನ್ನು ಮುಂದುವರಿಸುತ್ತೇನೆ. ಸಮಯ ಕಳೆದಂತೆ ಭಾರೀ ರಕ್ತಪಾತವಾಗುತ್ತದೆ ಟ್ರಂಪ್ ತಿಳಿಸಿದ್ದಾರೆ.

ಇಂದು ಇಸ್ರೇಲ್-ಹಮಾಸ್ ಮಾತುಕತೆ

ಟ್ರಂಪ್​ರ ಗಾಜಾ ಯೋಜನೆಯ ಕುರಿತು ಮಾತುಕತೆ ನಡೆಸಲು ಹಮಾಸ್‌ನ ಹಿರಿಯ ನಾಯಕ ಖಲೀಲ್ ಅಲ್-ಹಯ್ಯ ನೇತೃತ್ವದ ನಿಯೋಗವು ಈಜಿಪ್ಟ್‌ಗೆ ಆಗಮಿಸಿದೆ. ಅಲ್ಲದೆ, ಶರ್ಮ್ ಎಲ್-ಶೇಖ್‌ನಲ್ಲಿ ನಡೆಯಲಿರುವ ಮಾತುಕತೆಗಾಗಿ ತನ್ನ ಸಂಧಾನಕಾರರು ಸೋಮವಾರ ಹೊರಡಲಿದ್ದಾರೆ ಎಂದು ಇಸ್ರೇಲ್ ತಿಳಿಸಿದೆ.

ಅಮೆರಿಕದ ಯೋಜನೆಯ ಕೆಲವು ಅಂಶಗಳನ್ನು ಒಪ್ಪಿಕೊಂಡಿರುವ ಹಮಾಸ್​ ಉಗ್ರಗಾಮಿ ಗುಂಪಿನ ಹೇಳಿಕೆಯನ್ನು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸ್ವಾಗತಿಸಿದ ನಂತರ ಮಾತುಕತೆಗಳು ನಡೆಯಲಿವೆ. ಯುದ್ಧವನ್ನು ಕೊನೆಗೊಳಿಸುವ ಅಮೆರಿಕದ ಹೊಸ ಪ್ರಯತ್ನವನ್ನು ಬೆಂಬಲಿಸುವುದಾಗಿ ಇಸ್ರೇಲ್ ಈ ಹಿಂದೆ ಹೇಳಿತ್ತು.

ಪ್ಯಾಲೆಸ್ಟೀನಿಯನ್ ಕೈದಿಗಳಿಗೆ ಇಸ್ರೇಲಿ ಒತ್ತೆಯಾಳುಗಳ ವಿನಿಮಯದ ಕುರಿತು ಚರ್ಚಿಸಲು ಈಜಿಪ್ಟ್ ಸೋಮವಾರ ಇಸ್ರೇಲ್ ಮತ್ತು ಹಮಾಸ್ ನಿಯೋಗಗಳನ್ನು ಆಯೋಜಿಸಲಿದೆ ಎಂದು ಈಜಿಪ್ಟ್ ವಿದೇಶಾಂಗ ಸಚಿವಾಲಯ ತಿಳಿಸಿದೆ. (ಏಜೆನ್ಸೀಸ್)

https://www.vijayavani.net/hikaru-nakamura-slammed-by-netizens-for-his-act-on-d-gukesh