ಪತಿವ್ರತೆ ಅನಸೂಯೆಯನ್ನು ಪರೀಕ್ಷಿಸಲೆಂದು ತ್ರಿಮೂರ್ತಿಗಳು ಒಮ್ಮೆ ಬ್ರಾಹ್ಮಣರ ವೇಷದಲ್ಲಿ ಆಶ್ರಮಕ್ಕೆ ಬಂದು, ಇಚ್ಛಾಭೋಜನ ನೀಡುವಂತೆ ಕೇಳಿದರು. ಆತಿಥ್ಯ ಸ್ವೀಕರಿಸುವ ವೇಳೆ, ‘ನೀನು ವಿವಸ್ತ್ರಳಾಗಿ ನಮಗೆ ಉಣ್ಣಲು ನೀಡಿದರೆ ಮಾತ್ರ ನಾವು ಸ್ವೀಕರಿಸುವೆವು’ ಎಂದರು. ಅನಸೂಯೆ ತನ್ನ ಪಾತಿವ್ರತ್ಯ ಬಲದಿಂದ ಅವರನ್ನು ನವಜಾತ ಶಿಶುಗಳನ್ನಾಗಿಸಿ ಹಾಲುಣಿಸಿದಳು. ಸಂತೃಪ್ತರಾದ ಅವರು, ತಮ್ಮ ನಿಜ ಸ್ವರೂಪದಿಂದ ದರ್ಶನವಿತ್ತು, ‘ನಾವೇ ನಿನ್ನ ಮಕ್ಕಳಾಗುವೆವು’ ಎಂದು ಅನುಗ್ರಹಿಸಿದರು. ಬ್ರಹ್ಮಾಂಶದಿಂದ ಚಂದ್ರನೂ, ವೈಷ್ಣವಾಂಶದಿಂದ ದತ್ತನೂ ಮತ್ತು ಶಿವಾಂಶದಿಂದ ದೂರ್ವಾಸನೂ ಜನಿಸಿದರು. ಮುಂದೆ, ಬ್ರಹ್ಮ ಮತ್ತು ಶಿವ ತಪಸ್ಸಿಗೆ ತೆರಳಲು ಅನುಮತಿ ನೀಡುವಂತೆ ಕೋರಿದರು. ಅದಕ್ಕೆ ಅನಸೂಯೆ ಸಮ್ಮತಿಸಿದರು. ಮುಂದೆ, ದತ್ತದೇವರು ಒಂದು ಮನೆಯ ಮುಂದೆ ಭಿಕ್ಷೆಗೆ ಹೋದರು. ಆ ಮನೆಯಲ್ಲಿ ಅಂದು ಶ್ರಾದ್ಧ ನಡೆಯುತ್ತಿದ್ದರೂ, ಭಿಕ್ಷೆಗೆ ಬಂದವರನ್ನು ವಾಪಸ್ ಕಳಿಸಬಾರದೆಂದು ಆ ಮನೆಯ ತಾಯಿ ಭಿಕ್ಷೆ ನೀಡಿದಳು. ಇದರಿಂದ, ಪ್ರಸನ್ನರಾದ ದತ್ತದೇವರು ಮುಂದೆ ಅದೇ ಮನೆಯಲ್ಲಿ ಅವತಾರವೆತ್ತಿದ್ದರು ಎಂಬ ಐತಿಹ್ಯವೂ ಇದೆ. ಲೋಕೋದ್ಧಾರಕ್ಕಾಗಿ ಅವತಾರವೆತ್ತಿರುವ ದತ್ತಾತ್ರೇಯರ ಶಕ್ತಿ ಅಸಾಧಾರಣ, ಅನನ್ಯ.
