ಬೆಂಗಳೂರು: ಮುಜರಾಯಿ ಇಲಾಖೆ ವ್ಯಾಪ್ತಿಗೆ ಒಳಪಡುವ ದೇವಾಲಯಗಳ ನೌಕರರು ಹಾಗೂ ಅರ್ಚಕರಿಗೆ ಆರನೇ ವೇತನ ಆಯೋಗದ ಶಿಫಾರಸು ಜಾರಿ ಮಾಡುವ ಜತೆಗೆ ವಿಮೆ ಸೌಲಭ್ಯ ಒದಗಿಸುವ ನಿರ್ಧಾರದೊಂದಿಗೆ ರಾಜ್ಯ ಸರ್ಕಾರ ದಸರಾ ಕೊಡುಗೆ ನೀಡಿದೆ. ಸುಮಾರು 37 ಸಾವಿರ ಜನರಿಗೆ ಈ ತೀರ್ವನದಿಂದ ಅನುಕೂಲವಾಗಲಿದೆ. ದೇವಾಲಯಗಳ ಅರ್ಚಕರು, ನೌಕರರು ಆರೋಗ್ಯ ಸಮಸ್ಯೆಗೆ ಒಳಗಾದರೆ ಅವರಿಗೆ ರಕ್ಷಣೆ ಒದಗಿಸಲು ವಿಮೆ ಯೋಜನೆ ಜಾರಿ ಚಿಂತನೆಯನ್ನು ಸರ್ಕಾರ ಈ ಹಿಂದೆಯೇ ನಡೆಸಿತ್ತು. ಅದರಂತೆ ಈಗ ಆರೋಗ್ಯ ವಿಮೆ ಜಾರಿ ಮಾಡಿದೆ. ರಾಜ್ಯದ ಎ ಮತ್ತು ಬಿ ಗ್ರೇಡ್ ದೇವಾಲಯಗಳ ಅರ್ಚಕರು ಹಾಗೂ ನೌಕರರು 5ನೇ ವೇತನ ಆಯೋಗದ ವೇತನ ಪಡೆಯುತ್ತಿದ್ದಾರೆ, ಅವರಿಗೆ ಅ.1ರಿಂದಲೇ ಜಾರಿಗೆ ಬರುವಂತೆ 6ನೇ ವೇತನ ಆಯೋಗದ ಶಿಫಾರಸು ಜಾರಿಯಾಗಲಿದೆ. ದೇವಾಲಯದ ವಾರ್ಷಿಕ ಆದಾಯದಲ್ಲಿ ನೌಕರರ ವೇತನ ಶೇ.35 ಮೀರದಂತೆ 6ನೇ ವೇತನ ಆಯೋಗದ ವ್ಯಾಪ್ತಿಗೆ ಒಳಪಡಿಸುವ ಷರತ್ತು ಬೀಳಲಿದೆ.
